টাইৱানত সংঘটিত হৈছে এটি শোকাৱহ দুৰ্ঘটনা।
শুকুৰবাৰে দেশখনৰ এটা ৰেল দুৰ্ঘটনাত কমেও ৪৮জনকৈ যাত্ৰীৰ মৃত্যু হোৱাৰ লগতে ৭২জন লোক আঘাতপ্ৰাপ্ত হৈছে।
ট্ৰেইনখনে এটা সুৰংগৰে যাত্ৰা কৰি থকা অৱস্থাত এখন ট্ৰাকক খুন্দা মাৰে আৰু দুৰ্ঘটনাত পতিত হয়।
এইটো যোৱা চাৰিটা দশকৰ ভিতৰত দেশখনৰ আটাইতকৈ বৃহৎ ৰেল দুৰ্ঘটনা।
বিভাগীয় সূত্ৰই জনোৱামতে, ট্ৰেইনখনে দেশখনৰ ৰাজধানী টাইপেইৰ পৰা টাইটুং নামৰ ঠাইখনলৈ যাত্ৰা কৰি আছিল।
ট্ৰেইনখনত ৩৫০ জন যাত্ৰীকে ধৰি কেইবাজনো পৰ্যটকো আছিল।
দেশখনৰ পূব প্ৰান্তৰৰ হুৱালিয়েন নামৰ ঠাইখনত ট্ৰেইনখন দুৰ্ঘটনাত পতিত হয়।
ইতিমধ্যে ট্ৰেইনখনৰ প্ৰথম চাৰিটা দবাৰ পৰা প্ৰায় ১০০ জন লোকক উদ্ধাৰ কৰাৰ বিপৰীতে পাঁচৰ পৰা আঠ নম্বৰ দবাকেইটা সম্পূৰ্ণৰূপে ভাঙি যোৱাৰ বাবে উদ্ধাৰকাৰ্য কঠিন হৈ পৰিছে।
সংবাদমাধ্যমত প্ৰকাশ পোৱা মতে, ট্ৰেইনখনে খুন্দা মৰা ট্ৰাকখন ভালদৰে পাৰ্কিং কৰা হোৱা নাছিল।
উল্লেখযোগ্য যে ট্ৰেইনখনে যাত্ৰা কৰা টাইৱানৰ পূব প্ৰান্তৰ পৰ্যটকৰ কেন্দ্ৰবিন্দু।
ৰাজধানী টাইপেইৰ পৰা পূব প্ৰান্তৰলৈ যোৱা ৰেল লাইনটো ৰোমাঞ্চকৰ যাত্ৰাৰ বাবে বিখ্যাত।
শুকুৰবাৰে সংঘটিত হোৱা ৰেল দুৰ্ঘটনাটোৰ উপৰিও ২০১৮ আৰু ১৯৮১ চনতো দেশখনত বৃহৎ ৰেল দুৰ্ঘটনা সংঘটিত হৈছিল।
২০১৮ চনত দেশখনৰ উত্তৰপূব অঞ্চলৰ এটা ৰেল দুৰ্ঘটনাত ১৮জন যাত্ৰীৰ প্ৰাণহানি হোৱাৰ বিপৰীতে ১৭৫ জন লোকে আঘাতপ্ৰাপ্ত হৈছিল।
আনহাতে ১৯৮১ চনত দেশখনৰ উত্তৰ অঞ্চলত ৩০ জন যাত্ৰীৰ মৃত্যু হৈছিল।
