যোৱা ২৪ এপ্ৰিলৰ পৰা ২৭ এপ্ৰিললৈকে চাৰিটা দিনত পঞ্জাৱৰ অমৃতসৰৰ আটাৰী-ৱাঘা সীমান্তৰে ৯জন কূটনীতিবিদ আৰু চৰকাৰী বিষয়াসহ ৫৩৭জন পাকিস্তানী নাগৰিকে ভাৰতৰ পৰা ওলাই গৈছে। একে সময়তে ১৪ জন কূটনীতিবিদ আৰু বিষয়াকে ধৰি ৮৫০ জন ভাৰতীয় পাকিস্তানৰ পৰা উভতি আহিছে বুলি চৰকাৰী সূত্ৰৰ পৰা জানিব পৰা গৈছে।
যোৱা ২২ এপ্ৰিলত দক্ষিণ কাশ্মীৰৰ পেহেলগামত সংঘটিত হোৱা ভয়ানক সন্ত্ৰাসবাদী আক্ৰমণত ২৬ জন পৰ্যটকৰ মৃত্যু হোৱাৰ পিছতে এই পদক্ষেপ গ্ৰহণ কৰা হৈছে। এই আক্ৰমণৰ পিছতে ভাৰত চৰকাৰে ১২ জন হ্ৰস্বম্যাদী ভিছাধাৰীক ‘ভাৰত ত্যাগ’ৰ জাননী জাৰি কৰে।
চৰকাৰী তথ্য অনুসৰি ২৭ এপ্ৰিল দেওবাৰে ভাৰতৰ পৰা ২৩৭ জন পাকিস্তানী নাগৰিক পাকিস্তানলৈ উভতি গৈছে। ইয়াৰ আগতে ২৬ এপ্ৰিলত ৮১ জন, ২৫ এপ্ৰিলত ১৯১ জন আৰু ২৪ এপ্ৰিলত ২৮ জন পাকিস্তানী নাগৰিকে দেশ এৰিছে।
একেদৰে, এই সময়তভাৰতীয় নাগৰিকসকলৰ মাজত ২৭ এপ্ৰিলত ১১৬জন, ২৬ এপ্ৰিলত ৩৪২জন, ২৫ এপ্ৰিলত ২৮৭জন আৰু ২৪ এপ্ৰিলত ১০৫জনে পাকিস্তানৰ পৰা ভাৰতলৈ উভতি আহিছে।
ভাৰত আৰু পাকিস্তানৰ মাজত পোনপটীয়া বিমান সংযোগ নাই যদিও এই সময়ত একাংশ পাকিস্তানী নাগৰিকে বিমানযোগেও ভাৰত এৰি যাব পাৰে বুলি আটাৰী সীমান্তৰ প্ৰট’কল বিষয়া অৰুণ মহলে জানিবলৈ দিয়ে। তেনে ক্ষেত্ৰত তেওঁলোকে আন এখন দেশৰ মাজেৰে গন্তব্যস্থান পাব পাৰে।
চৰকাৰী নিৰ্দেশনা অনুসৰি ছাৰ্ক ভিছাধাৰীৰ বাবে প্ৰস্থানৰ সময়সীমা আছিল ২৬ এপ্ৰিল। মেডিকেল ভিছাধাৰীৰ বাবে এয়া ২৯ এপ্ৰিললৈ বৃদ্ধি কৰা হৈছে। ভিছাৰ ১২টা কেটেগুৰিত আছে —ভিছা অন এৰাইভেল, ব্যৱসায়, চলচ্চিত্ৰ, সাংবাদিক, ট্ৰেনজিট, সন্মিলন, পৰ্বতাৰোহণ, ছাত্ৰ, দৰ্শক, পৰ্যটক দল, তীৰ্থযাত্ৰী আৰু দলীয় তীৰ্থযাত্ৰী ভিছা।
ইয়াৰ উপৰিও ২৩ এপ্ৰিলত ভাৰতে পাকিস্তানী প্ৰতিৰক্ষা সম্পৰ্কীয় তিনিজন বিষয়া-সেনা, নৌসেনা আৰু বিমান উপদেষ্টাক ‘পাৰ্ছনা নন গ্ৰেটা’ বুলি ঘোষণা কৰি এসপ্তাহৰ ভিতৰত দেশ এৰি যাবলৈ নিৰ্দেশ দিয়ে। তেওঁলোকক সমৰ্থন কৰা পাঁচজন কৰ্মচাৰীকো ভাৰত এৰি যাবলৈ কোৱা হয়।
অৱশ্যে দীৰ্ঘম্যাদী আৰু কূটনৈতিক বা চৰকাৰী ভিছাধাৰীসকলক এই ‘ভাৰত ত্যাগ’ আদেশৰ অন্তৰ্ভুক্ত কৰা হোৱা নাই।
