পূজা আগবঢ়োৱাৰ সময়তে ঘটিল কৰুণ পৰিণতি। বিহাৰৰ নালন্দাৰ ঐতিহাসিক শীতলা মন্দিৰত হোৱা পদপিষ্টৰ ঘটনাত কমেও ৮ জন ভক্ত নিহত হয়। আৰক্ষী আৰু স্থানীয় প্ৰশাসনৰ সূত্ৰ অনুসৰি এই ভয়াবহ ঘটনাত আৰু ১২ জন লোক গুৰুতৰভাৱে আহত হয়। আজি (মঙলবাৰে) পুৱা সংঘটিত হয় এই দুৰ্ঘটনা। ইতিমধ্যে আহতসকলক উদ্ধাৰ কৰি স্থানীয় চিকিৎসালয়ত ভৰ্তি কৰোৱা হৈছে।
দীপনগৰ আৰক্ষী থানা এলেকাৰ নালন্দাৰ পৰা ৫ কিলোমিটাৰ নিলগৰ মাঘৰা গাঁৱত সংঘটিত হয় এই ঘটনা। এই গাঁৱত প্ৰাচীন শীতলা মন্দিৰ আছে। জনা যায় যে প্ৰতি মঙলবাৰে শ শ লোক এই মন্দিৰত পূজা কৰিবলৈ সমবেত হয়। অৱশ্যে আজি চ’ত মাহৰ মঙলবাৰ হোৱাৰ বাবে আন দিনতকৈ লোকৰ সংখ্যা লক্ষণীয়ভাৱে বেছি আছিল।
আৰক্ষীৰ সূত্ৰ অনুসৰি পুৱাৰে পৰা দৰ্শনৰ বাবে দীঘলীয়া শাৰী হৈছিল। হঠাৎ শাৰীত থিয় হৈ থকা তীৰ্থযাত্ৰীসকলৰ মাজত এক বিৰাট হুলস্থুল আৰম্ভ হ’ল। ভিৰপ ঠেলাহেঁচাত বহুতেই মাটিত পৰি যায় আৰু পদপিষ্ট হয়। অৱশ্যে এই হঠাৎ আতংক আৰু হুলস্থুলৰ সঠিক কাৰণ এতিয়াও স্পষ্ট হোৱা নাই। মৃত আটাইকেইগৰাকী মহিলা ভক্ত বুলি জানিব পৰা গৈছে।
খবৰ পোৱাৰ লগে লগে স্থানীয় আৰক্ষী আৰু প্ৰশাসনৰ শীৰ্ষ বিষয়াসকলে বৃহৎ আৰক্ষী বাহিনী লৈ সেই স্থানত উপস্থিত হয়। অঞ্চলটোৰ এছডিপিঅ’ও উপস্থিত হয়। ভিৰ নিয়ন্ত্ৰণ কৰাৰ উপৰিও আহতসকলক ক্ষীপ্ৰতাৰে উদ্ধাৰ কৰি চিকিৎসাৰ ব্যৱস্থা কৰা হয়।
এই মৰ্মান্তিক দুৰ্ঘটনাক লৈ শোক প্ৰকাশ কৰিছে বিহাৰৰ উপ-মুখ্যমন্ত্ৰী তথা গৃহমন্ত্ৰী সম্ৰাট চৌধাৰীয়ে। তেওঁ মৃতকৰ পৰিয়াললৈ গভীৰ শোক প্ৰকাশ কৰাৰ লগতে আহত তীৰ্থযাত্ৰীসকলৰ আশু আৰোগ্য কামনা কৰে।
ইতিমধ্যে বিহাৰ চৰকাৰে মৃতকৰ পৰিয়াললৈ মুঠ ৬ লাখ টকা আৰ্থিক সাহায্য হিচাপে ঘোষণা কৰিছে। ইয়াৰ ভিতৰত দুৰ্যোগ ব্যৱস্থাপনা বিভাগৰ পৰা মৃতকৰ পৰিয়ালক ৪ লাখ টকা আৰু মুখ্যমন্ত্ৰীৰ সাহায্য পুঁজিৰ পৰা ২ লাখ টকা দিয়া হ’ব বুলি প্ৰশাসনে অৱগত কৰিছে। সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে।
