COVID patients dead in fire হাস্পাতালৰ ICUত সংঘটিত হোৱা এক ভয়ংকৰ অগ্নিকাণ্ডৰ ঘটনাত কমেও ১০জন কৰ’না ৰোগীৰ মৃত্যু ঘটিছে। মহাৰাষ্ট্ৰৰ আহমেদনগৰৰ জিলা হাস্পাতালৰ আইচিইউত সংঘটিত হৈছে এই অগ্নিকাণ্ডৰ ঘটনা।
আহমেদনগৰৰ জিলা উপায়ুক্তই সংবাদমাধ্যমক জানিবলৈ দিয়া মতে কমেও ১০জন কৰ’না আক্ৰান্ত ৰোগীৰ মৃত্যু হৈছে আৰু আন এজনৰ অৱস্থা সংকটজনক।
শনিবাৰে পুৱা ১১বজাত অগ্নিকাণ্ডৰ ঘটনা সংঘটিত হোৱাৰ সময়ত হাস্পাতালখনত ১৭জন কৰ’না আক্ৰান্ত ৰোগী ভৰ্তি হৈ আছিল।
কেনেকৈ এই অগ্নিকাণ্ডৰ ঘটনা সংঘটিত হ’বলৈ পালে সেয়া জানিব পৰা হোৱা নাই যদিও শ্বৰ্ট শ্বাৰ্কিটৰ ফলতেই হাস্পাতালখনত অগ্নিকাণ্ড সংঘটিত হোৱা বুলি অনুমান কৰা হৈছে।
ৰাজ্যখনৰ হাস্পাতালত অগ্নিকাণ্ডৰ ঘটনা নতুন কথা নহয়। দেশত অতিমাৰীৰ ত্ৰাস আৰম্ভ হোৱাৰ পাছৰে পৰা ৰাজ্যখনৰ বিভিন্ন প্ৰান্তৰ হাস্পাতালত অগ্নিকাণ্ডৰ ঘটনাত কৰ’না ৰোগীৰ মৃত্যুৰ ঘটনা ঘটিছে।
বিগত এপ্ৰিল মাহত পালঘৰৰ বীৰাৰৰ বিজয় বল্লভ কোভিড হাস্পাতালত সংঘটিত অগ্নিকাণ্ডত কমেও ১৩জন লোকৰ মৃত্যু ঘটিছিল।
আনহাতে, চলিত বছৰৰ আৰম্ভণিতেই ভাণ্ডাৰা জিলা হাস্পাতালৰ শিশু বিভাগত অগ্নিকাণ্ডৰ ঘটনাত কমেও ১০টি নৱজাতকৰ মৃত্যু হৈছিল।
মহাৰাষ্ট্ৰৰ আহমেদনগৰৰ হাস্পাতালত সংঘটিত এই শোকাবহ ঘটনাত শোকপ্ৰকাশ কৰিছে প্ৰধানমন্ত্ৰী নৰেন্দ্ৰ মোদী আৰু ৰাষ্ট্ৰপতি ৰামনাথ কোৱিন্দে।
ইপিনে. মহাৰাষ্ট্ৰ বিধানসভাৰ বিৰোধী দলপতি তথা প্ৰাক্তন মুখ্যমন্ত্ৰী দেবেন্দ্র ফাৰ্ণবিছে এই ঘটনাৰ বিতং তদন্তৰ দাবী কৰিছে।