আজিৰ পৰা প্ৰযোজ্য হৈছে ATM ৰ পৰা টকা উলিওৱাৰ ক্ষেত্ৰত নতুন নিয়ম। ATM ৰ লেনদেনৰ ক্ষেত্ৰত বিনামূলীয়াকৈ ধন উলিওৱাৰ সীমা অতিক্ৰম কৰিলে আৰু অধিক চাৰ্জ ভৰিব লাগিব।
বিনামূলীয়া সৰ্বোচ্চ সীমা অতিক্ৰম কৰিলেই বৰ্তমান গ্ৰাহকে প্ৰতিটো লেনদেনত ২০ টকা ভৰিবলগীয়া হয় যদিও সেয়া আজিৰ পৰা ২১টকালৈ বৃদ্ধি কৰা হৈছে আৰু ইয়াৰ লগত জিএছটি যোগ কৰা হ’ব।
ভাৰতীয় ৰিজাৰ্ভ বেংকে যোৱা জুন মাহতেই এটিএমৰ পৰা টকা উলিওৱাৰ নিৰ্দ্ধাৰিত সীমা অতিক্ৰম কৰিলে অতিৰিক্ত ১ টকা চাৰ্জ লোৱাৰ অনুমতি দিছিল।
সেইদৰে, ২০টকাৰ পৰিৱৰ্তে প্ৰতিটো অতিৰিক্ত লেনদেনত ২১টকা কৰাত অনুমোদন দিছে আৰবিআইয়ে।
এতিয়া কোনো গ্ৰাহকে যদি মাহত এটিএমৰ পৰা টকা উলিওৱাৰ সৰ্বোচ্চ সীমা অতিক্ৰম কৰে তেতিয়াহ’লে আজিৰ পৰা প্ৰতিটো লেনদেনৰ বাবে ৰাষ্ট্ৰীয়কৃত বেংক তথা বেচৰকাৰী বেংকসমূহে ২১ টকা কৰ্তন কৰিব পাৰিব।
উল্লেখ্য যে গ্ৰাহকসকলে নিজৰ বেংকৰ এটিএমৰ পৰা প্রতিমাহত বিনামূলীয়াকৈ পাঁচবাৰ লেনদেনৰ (বিত্তীয় তথা আন লেনদেন) সুযোগ পাব।
আনহাতে, মেট্ৰ’ চহৰৰ আন বেংকৰ এটিএমৰ পৰা মাহত তিনিবাৰ বিনামূলীয়া লেনদেন কৰিব পাৰিব। মেট্ৰ’ৰ বাহিৰে বাকী চহৰত পাঁচবাৰ এই লেনদেন কৰিব পাৰিব।