অসমৰ চাহ বাগিচাসমূহত অবৈধ সুৰা সম্পুৰ্ণৰূপে নিষিদ্ধ কৰাৰ দাবীৰে আজি সদৌ অসম চাহ জনজাতি ছাত্ৰ সন্থাই ডিব্ৰুগড়ত ৩৭ নং ৰাষ্ট্ৰীয় ঘাইপথ অৱৰোধ কৰে। চাহ বাগিচাৰ শতাধিক শ্ৰমিকে হাতে হাতে প্লে-কাৰ্ড লৈ প্ৰতিবাদ সাব্যস্ত কৰি ৰাষ্ট্ৰীয় ঘাইপথৰ স্বাভাবিক জীৱন যাত্ৰা ব্যাহত কৰি তোলে।
সংগঠনটোৰ ডিব্ৰুগড় জিলা সমিতিৰ সম্পাদক সুনীল পাটৰে চৰকাৰক চাহ বাগিচাসমূহত চুলাইৰ প্ৰচলন সম্পুৰ্ণৰূপে বন্ধ কৰাৰ বাবে দাবী জনায়। প্ৰতিবছৰে চাহ বাগিচাৰ অঞ্চলসমূহত বহু সংখ্যক লোক চুলাইপান কৰি মৃত্যু মুখত পৰি আহিছে বুলি উল্লেখ কৰি এই ক্ষেত্ৰত চুলাইৰ ভয়াবহতা সম্পৰ্কত চাহ বাগিচা সমূহত আটছাই সজাগতা অভিযান আৰম্ভ কৰিব বুলি সদৰী কৰে।
আনহাতে, সংগঠনটোৱে গোলাঘাট আৰু যোৰহাট জিলাত বিষাক্ত সুৰাপান কৰি মৃত্যু হোৱা ডেৰ শতাধিক লোকৰ পৰিয়াললৈ চৰকাৰৰ তৰফৰ পৰা ১০ লাখ টকাৰ সাহায্য দাবী কৰে। অসম চৰকাৰে ইতিমধ্যে এই ঘটনাত মৃত্যু হোৱা লোকসকলৰ পৰিয়াললৈ ২ লাখ টকা আৰু আহত সকললৈ ৫০০০০ টকাৰ ক্ষতিপুৰণ ঘোষণা কৰিছে।
উল্লেখযোগ্য যে, আটছাৰ প্ৰচাৰ সম্পাদক লক্ষ্যহীৰে কুৰ্মীয়ে অবৈধ সুৰাৰ ব্যৱসায়ত জড়িত লোক সকলৰ বিৰুদ্ধে চৰকাৰক কঠোৰ হবলৈ আহ্বান জনাই শীঘ্ৰে ইয়াৰ লগত জড়িত সকলক কৰায়ত্ত কৰি শাস্তি প্ৰদান কৰাৰ বাবে দাবী জনায়।
