ৰাজ্যত অস্বাভাৱিক হাৰত যি গাহৰি মৃত্যু হৈছে সেয়া সাধাৰণ ছোৱাইন ফিভাৰ নহয়। প্ৰাথমিক পশু বিভাগে কৰা নমুনা পৰীক্ষাত আফ্ৰিকান ছোৱাইন ফিভাৰ পোৱা গৈছে। ভূপালৰ পৰীক্ষাৰ ফলাফলত নিশ্চিত হ’ব সকলো কথা৷ সংবাদ মাধ্যমৰ আগত এই মন্তব্য কৰে পশুধন তথা কৃষি বিভাগৰ মন্ত্ৰী অতুল বৰাৰ৷
লগতে মন্ত্ৰী বৰাই কয় “আফ্ৰিকান ছোৱাইন ফেভাৰৰ ঔষধ আজিলৈ ওলোৱা নাই, ইও এক প্ৰকাৰৰ ক’ৰ’নাই৷ যদি ৰাজ্যত গাহৰি মৃত্যু কাৰণ সেয়াই হয় তেন্তে ভাৰত চৰকাৰৰ গাইড লাইন মানিব লাগিব। আফ্ৰিকান ছোৱাইন ফেভাৰ হ’লে কোৱাৰেন্টাইন কৰি আচুতীয়া কৈ ৰাখিব লাগিব যাতে ভাল গাহৰি সমূহলৈ সংক্ৰমন হ’ব নোৱাৰে।”
আফ্ৰিকান ছোৱাইন ফেভাৰ হ’লে আক্রান্ত গাহৰি পৰা মানুহৰ দেহলৈ ৰোগটো সংক্ৰমন হ’ব নোৱাৰে। এই কথা পশু বিশেষজ্ঞ সকলে স্পষ্ট ভাৱে কৈছে বুলি উল্লেখ কৰি মন্ত্ৰী বৰাই কয়, “মাংসসমূহ উষ্ণতাত গৰম কৰি খোৱা ব্যৱস্থা কৰিব৷ চিকিৎসকসকলৰ বাবে পিপিই থাকিব৷ লগতে পিপিই ক্ৰয় কৰাৰ বাবে সিদ্ধান্ত লয় বিভাগে।”
মন্ত্ৰী বৰাই প্ৰকাশ কৰা অনুসৰি উজনি অসমৰ ৬ খন জিলাত বৰ্তমান সময়লৈকে ২২৮২টা গাহৰিৰ মৃত্যু হৈছে। মৃত্যু হোৱা গাহৰিসমূহৰ ৰোগৰ যি লক্ষণ সেয়া পূৰ্বতে ৰাজ্যৰ পশু চিকিৎসকসকলে দেখা নাই বুলি উল্লেখ কৰি কয়, “আমি ভয় খাইছো ৰাজ্য বনৰীয়া গাহৰি সমূহলৈ এই ৰোগ সংক্ৰমন হব বুলি।”
ইফালে সংক্ৰমণ ৰোধ কৰাৰ বাবে নিৰ্দিষ্ট জিলাসমূহৰ বিভাগৰ বিষয়া সকললৈ কঠোৰ নির্দেশনা প্ৰদান কৰা হৈছে। এনেদৰে কঠোৰ নিৰ্দেনা জাৰি কৰি সংক্ৰমণ ৰোধ কৰিব পৰা যাব। নামনি অসমৰ কোনো জিলাত এই ৰোগ হোৱা নাই। মন্ত্ৰী বৰাই কয়।
অনাগত দিনত ৰাজ্য কৃষি খণ্ডত অধিক গুৰুত্ব দিব লাগিব। ৰাজ্যৰ গৰিষ্ঠ মানুহ কৃষিৰ লগত জড়িত বুলি উল্লেখ কৰি বৰাই কয়, “পৰম্পৰাগত ভাৱে আমি হাঁহ, কুকুৰা, গাহৰি, পাৰ আদি পুহি আহিছোঁ। বৰ্তমান আমি বাণিজ্যক ভিত্তিত পুহিব লাগিব। কাৰণ আমাৰ অৰ্থনীতি বহুতখিনি ইয়াৰ ওপৰত নিৰ্ভৰশীল। চৰকাৰেও ইয়াৰ ওপৰত অধিক গুৰুত্ব দিব।”
ল’কডাউনৰ সময়ত ক্ষতিগ্ৰস্ত হোৱা ৰাজ্যৰ কৃষক সকলক দুৰ্যোগ ব্যৱস্থাপনা আইনৰ অধীনত সাহায্য দিয়াৰ কথা ঘোষণা কৰিছে মন্ত্ৰী বৰাই।
আজি গুৱাহাটী মহানগৰীৰ চেনিকুঠিস্থিত পশুপালন বিভাগৰ সঞ্চালকৰ কাৰ্যালয়ত এক পৰ্যালোচনা সভা অনুষ্ঠিত হয়৷ সভাত পশুধন তথা কৃষি বিভাগৰ মন্ত্ৰী অতুল বৰা আৰু পশুপালন বিভাগৰ অধ্যক্ষ মনোজ শইকীয়া উপস্থিত থাকে ৷
