অযোধ্যাৰ ৰাম মন্দিৰৰ দানৰ ধন অপব্যৱহাৰ আৰু চুৰিৰ ঘটনাই সমগ্ৰ দেশতে তীব্ৰ চাঞ্চল্যৰ সৃষ্টি কৰাৰ মাজতে এক ডাঙৰ খবৰ পোহৰলৈ আহিছে। শ্ৰীৰাম জন্মভূমি তীৰ্থ ক্ষেত্ৰ ট্ৰাষ্টৰ সাধাৰণ সম্পাদক চম্পত ৰায় আৰু অন্যতম ট্ৰাষ্টী অনিল মিশ্ৰই শুকুৰবাৰে নিজৰ পদৰ পৰা পদত্যাগ কৰিছে। মন্দিৰৰ ধন চুৰিৰ ঘটনাক লৈ সৃষ্টি হোৱা বিতৰ্কৰ পাছত নৈতিক দায়িত্ব স্বীকাৰ কৰি দুয়োগৰাকী নেতাই ট্ৰাষ্টৰ ওচৰত পদত্যাগ পত্ৰ দাখিল কৰা বুলি জানিব পৰা গৈছে। এই ঘটনাৰ তদন্তৰ বাবে গঠন কৰা বিশেষ তদন্তকাৰী দল চমুকৈ এছ আই টিৰ প্ৰাৰম্ভিক প্ৰতিবেদনত মন্দিৰৰ দান সংগ্ৰহ আৰু হিচাপ ৰখাত গুৰুতৰ গাফিলতি ধৰা পৰাৰ পিছতে এই ডাঙৰ পদক্ষেপ গ্ৰহণ কৰা হৈছে।
এছ আই টিৰ পৰামৰ্শ অনুসৰি এই গোচৰৰ সন্দৰ্ভত ইতিমধ্যে প্ৰথমখন এজাহাৰ ৰুজু কৰা হৈছে। ট্ৰাষ্টৰ সদস্য কৃষ্ণ মোহনে এই এজাহাৰ দাখিল কৰিছিল, যিয়ে পূৰ্বৰ ট্ৰাষ্টী কামেশ্বৰ চৌপালৰ মৃত্যুৰ পিছত যোৱা ২০২৫ চনৰ ছেপ্টেম্বৰ মাহত ট্ৰাষ্টত যোগদান কৰিছিল। এজাহাৰ ৰুজু হোৱাৰ কেইঘণ্টামানৰ পিছতে উত্তৰ প্ৰদেশ আৰক্ষীয়ে বৃহস্পতিবাৰে এই কাণ্ডৰ সৈতে জড়িত আটাইকেইজন অভিযুক্তক গ্ৰেপ্তাৰ কৰে। গ্ৰেপ্তাৰ হোৱা লোকসকলৰ ভিতৰত অবিনাশ শুক্লা, অনুকিল্প মিশ্ৰ, লৱকুশ মিশ্ৰ, মণীশ কুমাৰ যাদৱ, কৰুণেশ পাণ্ডে, ৰমাশংকৰ মিশ্ৰ, সুভাষ শ্ৰীবাস্তৱ আৰু ৰাম শংকৰ যাদৱ ওৰফে তিনু অন্যতম। আৰক্ষীয়ে বৰ্তমান তেওঁলোকক সোধা-পোছা কৰাৰ লগতে আইনী প্ৰক্ৰিয়া সম্পূৰ্ণ কৰিছে। তেওঁলোকৰ বিৰুদ্ধে চুৰি, বিশ্বাসভংগ, অপৰাধমূলক ষড়যন্ত্ৰ আৰু দুৰ্নীতি প্ৰতিৰোধ আইনৰ বিভিন্ন ধাৰাত গোচৰ ৰুজু কৰা হৈছে।
উত্তৰ প্ৰদেশ চৰকাৰে যোৱা ১৩ জুনত মন্দিৰৰ দান সংগ্ৰহ, সংৰক্ষণ আৰু হিচাপ-নিকাচৰ অনিয়মৰ তদন্তৰ বাবে তিনিজনীয়া এছ আই টি গঠন কৰিছিল। এছ আই টিৰ প্ৰাৰম্ভিক তদন্তত পোহৰলৈ আহিছে যে মন্দিৰৰ পৰা ট্ৰাষ্টৰ কাৰ্যালয় আৰু বেংকত ধন জমা কৰাৰ প্ৰক্ৰিয়াত কেইবাটাও স্তৰত আসোঁৱাহ আছিল। ইয়াত কৰ্মচাৰীসকলৰ পৰীক্ষণ প্ৰক্ৰিয়াত অভাৱ আছিল, গুৰুত্বপূৰ্ণ স্থানত চিচিটিভি কেমেৰাৰ পৰ্যবেক্ষণ দুৰ্বল আছিল আৰু ধন গণনাৰ বাবে বাহিৰৰ এজেন্সীৰ কৰ্মচাৰী ব্যৱহাৰ কৰা হৈছিল। ইয়াৰ উপৰিও ভক্তসকলে দান কৰা সোণ, ৰূপ আৰু অন্যান্য অলংকাৰৰ হিচাপতেও খেলিমেলি থকাৰ কথা ধৰা পৰিছে আৰু বৰ্তমান সেইবোৰৰো নথি-পত্ৰ পৰীক্ষা কৰি থকা হৈছে।
আনহাতে বিজেপি কৰ্মী ড০ ৰজনীশ সিঙে এই সন্দৰ্ভত প্ৰধানমন্ত্ৰী নৰেন্দ্ৰ মোডীলৈ পত্ৰ লিখি হস্তক্ষেপ বিচাৰিছিল। তেওঁ কয় যে কেৱল পদত্যাগ কৰিয়েই এই বিষয়টো অন্ত পৰিব নোৱাৰে আৰু ইয়াৰ বিৰুদ্ধে অধিক আইনী ব্যৱস্থা গ্ৰহণ কৰিব লাগে। ড০ ৰজনীশে পদত্যাগ কৰা দুই মুখিয়াল ব্যক্তিৰ ভূমিকা আৰু সম্পত্তিৰো বিতং তদন্ত কৰিবলৈ দাবী জনাইছে। অৱশ্যে এইসমূহ তেওঁৰ ব্যক্তিগত অভিযোগ আৰু ইয়াৰ কোনো চৰকাৰী সত্যতা এতিয়ালৈ প্ৰমাণ হোৱা নাই। ড০ সিঙে কয় যে কোটি কোটি হিন্দু ধৰ্মাৱলম্বী লোকৰ আস্থা ইয়াৰ লগত জড়িত হৈ আছে, গতিকে তেওঁ কোনো ব্যক্তিৰ বিৰুদ্ধে নহয়, বৰং সমগ্ৰ বিষয়টোৰ এক নিৰপেক্ষ আৰু উচ্চ পৰ্যায়ৰ তদন্ত বিচাৰে যাতে প্ৰকৃত সত্য পোহৰলৈ আহে। ইয়াৰ পূৰ্বে তেওঁ প্ৰায় ৭ ৰ পৰা ৭.৫ কোটি টকাৰ কেলেংকাৰী হোৱাৰ অভিযোগ তুলি চিবিআই বা ইডিৰ দ্বাৰা তদন্তৰ দাবী কৰিছিল।
এই ঘটনাক লৈ বৰ্তমান ৰাজনৈতিক মহলতো তীব্ৰ বাক-বিতণ্ডাৰ সৃষ্টি হৈছে। সমাজবাদী পাৰ্টীৰ মুৰব্বী অখিলেশ যাদৱে এই ধন অন্তৰ্ধান হোৱাৰ ঘটনাক লৈ ন্যায়িক হস্তক্ষেপৰ দাবী জনাইছে। তেওঁ প্ৰশ্ন উত্থাপন কৰিছে যে কেৱল তলতীয়া কৰ্মচাৰীৰ বিৰুদ্ধেহে ব্যৱস্থা লোৱা হ‘ব নে শীৰ্ষ পৰ্যায়ৰ লোকসকলকো জবাবদিহি কৰা হ’ব। উত্তৰ প্ৰদেশৰ মুখ্যমন্ত্ৰী যোগী আদিত্যনাথে এই সন্দৰ্ভত কয় যে সনাতন মূল্যবোধ আৰু জনসাধাৰণৰ বিশ্বাসৰ সৈতে খেলা কৰা যিকোনো প্ৰচেষ্টাৰ বিৰুদ্ধে চৰকাৰে কঠোৰ ব্যৱস্থা গ্ৰহণ কৰিব আৰু এই ক্ষেত্ৰত কোনো আপোচ কৰা নহ’ব। এছ আই টিৰ প্ৰতিবেদন অহাৰ পিছতে চৰকাৰে এই পদক্ষেপ লৈছে আৰু আগন্তুক দিনত ৰাম মন্দিৰ ট্ৰাষ্টৰ প্ৰশাসনিক গাঁথনিত আৰু অধিক সালসলনি হোৱাৰ সম্ভাবনা আছে।
