ভুলেই হওক শুদ্ধই হওক, জাতিটোৰ স্বাৰ্থত, স্বাধীন অসমৰ স্বপ্নত সশস্ত্ৰ বিদ্ৰোহৰ পথ বাছি লোৱা এগৰাকী নাৰী। নাম তেওঁৰ বেবী মৰাণ। ঘটনাৰ পাকচক্ৰত পৰৱৰ্তী এসময়ত তেওঁৰ জীৱন অভাৱনীয় বিপৰ্য্যয়ৰ গৰাহত পৰে। বৰ্ণনাতীতভাৱে কৰুণ গাঁথাত পৰিণত হয় তেওঁৰ জীৱন। মানসিক ভাৰসাম্য হেৰুৱাই পেলোৱা বেবী মৰাণ হৈ পৰে ‘পাগলী’।
কিন্তু কেইজনমান প্ৰাক্তন সতীৰ্থ, কেইজনমান সদাশয় ব্যক্তি আৰু নাজিৰাৰ ‘মানৱ কল্যাণ সমাজ’ৰ মানৱীয় চেষ্টাত প্ৰায় এবছৰৰ পিছত বেবী মৰাণে এতিয়া পুনৰ জীৱন ঘূৰাই পাইছে।
উল্লেখযোগ্য যে বেবী মৰাণ আছিল এসময়ৰ আলফাৰ নেত্ৰী তথা আলফাৰ কেপ্টেইন প্ৰয়াত দীনেশ বৰুৱাৰ পত্নী। ভুটানৰ অল ক্লিয়েৰ অপাৰেইশ্যনৰ পিছতে তেওঁৰ স্বামী দীনেশ বৰুৱাৰ সৈতে আৰক্ষীৰ হাতত গ্ৰেপ্তাৰ হৈছিল। তাৰ পিছতে দুয়োজন ডিব্ৰুগড়ৰ কাৰাগাৰত ভালেমান দিন অতিবাহিত কৰে। পিছত কাৰাগাৰৰ পৰা ওলায় যদিও ৰোগাক্ৰান্ত কেপ্টেইন দীনেশ বৰুৱাৰ মৃত্যু হয়।
স্বামীৰ মৃত্যুৰ পিছতে লাহে লাহে মানসিকভাৱে ভাগি পৰে বেবী মৰাণ ওৰফে অম্বিকা বৰুৱা। তেওঁ স্বামীগৃহ ত্যাগ কৰি ডিব্ৰুগড় চহৰৰ কিছু নিলগত থকা তিতা ডিমৰু মৰাণচুক গাৱঁৰ পিতৃগৃহলৈ গুচি যায়। তাৰ পিছতে ক্ৰমে তেওঁ মানসিক ভাৰসাম্য হেৰুৱাই পেলায় আৰু এক প্ৰকাৰৰ বাটে-পথে ঘূৰি ফুৰিবলৈ ধৰে।
কিন্তু আজিৰ পৰা প্ৰায় এবছৰ পূৰ্বে অসম জাতীয়তাবাদী যুৱ ছাত্ৰ পৰিষদৰ লাহোৱাল আঞ্চলিকৰ বিজিত দত্ত নামৰ সদস্য এজনে তেওঁৰ জীৱন কাহিনী ফটোৰ সৈতে ফেচবুক পোষ্টৰ জৰিয়তে পোষ্ট কৰাত কথাটো পোহৰলৈ আহে।
ইয়াৰ পিছতে তাৎক্ষণিকভাৱে আলোচনাপন্থী নেতা জিতেন দত্তই আগভাগ লৈ আলফা নেত্ৰীগৰাকীক চিকিৎসাৰ ব্যৱস্থা কৰোৱায়। তেওঁ সদলবলে বেবী মৰাণৰ পিতৃগৃহত উপস্থিত হয়গৈ আৰু নাজিৰাস্থিত মানৱ কল্যাণ সমাজ (এইচ্ছ ডব্লিউ এছ)ৰ সৈতে যোগাযোগ কৰি তেওঁলোকৰ তাত ৰাখি চিকিৎসাৰ যাৱতীয় ব্যৱস্থা কৰিছিল। আজি প্ৰায় এবছৰৰ ধৰি চিকিৎসা আৰু পৰিচৰ্য্যা কৰাৰ অন্তত নাজিৰাৰ মানৱ কল্যাণ সমাজ (এইচ্ছ ডব্লিউ এছ)-এ জানিবলৈ দিছে যে বেবী মৰাণ প্ৰায় সম্পূৰ্ণ সুস্থ হৈ উঠিছে আৰু দুই এদিনতে তেওঁক পিতৃগৃহলৈ প্ৰেৰণ কৰাৰ কথা চিন্তা কৰা হৈছে।
উল্লেখযোগ্য যে আলফা নেতা জিতেন দত্তৰ উপৰি আন বিভিন্নজনেও বেবী মৰাণৰ দুৰ্ভাগ্যজনক অৱস্থাৰ খবৰ পোৱাৰ লগে লগে সহায় কৰিবলৈ আগ বাঢ়ি আহিছিল। বেবী মৰাণে পুনৰ জীৱন লাভ কৰাৰ নেপথ্যত থকা এই ব্যক্তিসকলৰ ভূমিকা শলাগিব লগীয়া। নেত্ৰীগৰাকী আকৌ সুস্থ জীৱনৰ মাজলৈ অহাটোত গভীৰ সন্তুষ্টি প্ৰকাশ কৰিছে বিভিন্ন পক্ষই।