হাৰিয়ানী গীত ‘তাতেৰী’ বিতৰ্কত বিপৰ্যস্ত বাদশ্বাহ। ইপিনে বলীউডৰ জনপ্ৰিয় ৰেপাৰ বাদশ্বাহে সকলোকে আচৰিত কৰি জীৱনৰ এক নতুন অধ্যায় আৰম্ভ কৰিছে। কেইবাবছৰ ধৰি পাঞ্জাবী মডেল তথা অভিনেত্ৰী ঈশা ৰিখীৰ সৈতে তেওঁৰ প্ৰেমৰ গুঞ্জন চলিছিল। এইবাৰ সেই সম্পৰ্কই স্থায়ী ৰূপ পালে।
ঈশাৰ মাতৃ পুনম ৰিখীয়ে ছ’চিয়েল মিডিয়াত কেইবাখনো ছবি পোষ্ট কৰি নৱবিবাহিত দম্পতীক আশীৰ্বাদ দিছে। দুয়োজনে দৰা-কইনা হিচাপে বিবাহ অনুষ্ঠান সম্পাদন কৰা দেখা গৈছে।
ভাইৰেল ছবিখনত বাদশ্বাহক বাদামী ৰঙৰ কুৰ্তা আৰু সোণালী ৰঙৰ চাফা (পাগুৰি) পিন্ধা দেখা গৈছে। আনহাতে ঈশাই ৰঙা ৰঙৰ ছালৱাৰ চুট পিন্ধিছিল। দুয়োহাতত ওলমি আছে সোণালী কলিৰা (এবিধ অলংকাৰ)। দৰা-কইনাৰ ডিঙিত মালা। পৰিয়ালৰ ঘনিষ্ঠ সদস্যৰ উপস্থিতিত সম্পূর্ণ ঘৰুৱা পদ্ধতিৰে অনুষ্ঠিত হয় বিবাহ অনুষ্ঠান৷ যদিও বাদশ্বাহ বা ঈশাই এতিয়ালৈকে আনুষ্ঠানিকভাৱে একো নিশ্চিত কৰা নাই।
জানিব পৰা মতে, বাদশ্বাহ আৰু ঈশাই বিগত চাৰি বছৰ ধৰি ইজনে সিজনৰ লগত ডেটিং কৰি আহিছে। বন্ধু এজনৰ জৰিয়তে ঈশাক পাৰ্টিত লগ পাইছিল, যিটো পিছলৈ প্ৰেমলৈ পৰিণত হয়। ২০১৩ চনত ‘জাট বয়জ পুট যতন দে’ ছবিৰ জৰিয়তে অভিনয় যাত্ৰা আৰম্ভ কৰা ঈশাই ২০১৮ চনত বৰুণ ধাৱনৰ সৈতে ‘নবাবজাদে’ ছবিতো কাম কৰিছিল।
উল্লেখযোগ্য যে এয়া বাদশ্বাহৰ দ্বিতীয় বিবাহ। ইয়াৰ পূৰ্বে জেচমিন মাছিহৰ সৈতে তেওঁৰ বিবাহ হৈছিল। তেওঁলোকৰ এগৰাকী কন্যাও আছে। যাৰ নাম জেচেমি গ্ৰেচ মাছিহ সিং। প্ৰায় ছবছৰ আগতে অৰ্থাৎ ২০২০ চনত তেওঁলোকৰ মাজত বিচ্ছেদ ঘটিছিল। বদশ্বাহে ইয়াৰ পূৰ্বে এটা প’ডকাষ্টত কৈছিল যে তেওঁলোকে নিজৰ ছোৱালীজনীৰ ভৱিষ্যত বিবেচনা কৰি আৰু পৰিয়ালৰ পৰিৱেশ সুস্থ ৰখাৰ বাবে পৃথক হোৱাৰ সিদ্ধান্ত লৈছিল। বৰ্তমান তেওঁলোকৰ কন্যা লণ্ডনত থাকে।
