অসমৰ উচ্চ মাধ্যমিক পৰ্যায়ৰ ইতিহাস পাঠ্যক্ৰম সংশোধন কৰা হ’ব বুলি শুকুৰবাৰে এক গুৰুত্বপূৰ্ণ ঘোষণা কৰে মুখ্যমন্ত্ৰী হিমন্ত বিশ্ব শৰ্মাই। মুছলমান সম্প্ৰদায়ক লৈ কৰা তেওঁৰ শেহতীয়া মন্তব্যক কেন্দ্ৰ কৰি চলি থকা ৰাজনৈতিক বিতৰ্কৰ মাজতে এই সিদ্ধান্তই বিশেষ চৰ্চা লাভ কৰিছে।
কেন্দ্ৰীয় গৃহমন্ত্ৰী অমিত শ্বাহৰ উপস্থিতিত মুখ্যমন্ত্ৰীয়ে জানিবলৈ দিয়ে যে তেওঁ ইতিমধ্যে শিক্ষা বিভাগক পাঠ্যপুথি সংশোধনৰ প্ৰক্ৰিয়া আৰম্ভ কৰিবলৈ নিৰ্দেশ দিছে। শিক্ষা মন্ত্ৰী ৰণোজ পেগুক এই সিদ্ধান্তৰ বিষয়ে অৱগত কৰা হৈছে। উল্লেখযোগ্য যে, মুখ্যমন্ত্ৰীয়ে বিদ্যমান পাঠ্যপুথিত কিছুমান ঐতিহাসিক চৰিত্ৰৰ চিত্ৰণক লৈ প্ৰশ্ন উত্থাপন কৰিছে।
মুখ্যমন্ত্ৰীয়ে বিশেষকৈ আহোম যুগৰ সেনানী বাঘ হাজৰিকাৰ প্ৰসংগ উত্থাপন কৰি দাবী কৰে যে শৰাইঘাটৰ যুদ্ধত আহোম সেনাপতি লাচিত বৰফুকনৰ সৈতে বাঘ হাজৰিকাই অংশগ্ৰহণ কৰা নাছিল। কাৰেং চাপৰিত অনুষ্ঠিত দশম মিচিং যুৱ মহোৎসৱৰ সামৰণি অনুষ্ঠানত ভাষণ দি শৰ্মাই কয় যে কামৰূপত মোগল বাহিনীৰ বিৰুদ্ধে প্ৰতিৰোধৰ নেতৃত্ব মিচিং নেতা মিৰি সন্দিকৈয়েহে দিছিল, বাঘ হাজৰিকাই নহয়।
অৱশ্যে বহু ঐতিহাসিকে উল্লেখ কৰে যে বাঘ হাজৰিকা ওৰফে ইছমাইল ছিদ্দিকি ১৭ শতিকাৰ এজন বীৰ আছিল, তেঁও শৰাইঘাটৰ যুদ্ধত মোগলৰ বিৰুদ্ধে আহোমৰ হৈ যুঁজিছিল। বাঘ হাজৰিকা বৰ্তমানৰ শিৱসাগৰ জিলাৰ এটা মুছলমান পৰিয়ালৰ আছিল বুলি লোকবিশ্বাস প্ৰচলিত আছে।
ৰাজ্যৰ খিলঞ্জীয়া মুছলমান আৰু বঙালীভাষী মুছলমানৰ মাজত থকা পাৰ্থক্যৰ বিষয়ে মুখ্যমন্ত্ৰী আৰু শাসকীয় বিজেপি দলে চৰ্চা কৰি থকাৰ সময়তে এই ঘোষণা কৰিছে মুখ্যমন্ত্ৰীয়ে। তেওঁ মিচিং সম্প্ৰদায়ৰ কৰ্ম-সংস্কৃতিৰ শলাগ লোৱাৰ লগতে উজনি অসমত বঙালীভাষী মুছলমানৰ বসতি বিস্তাৰ ৰোধ কৰাত এই সম্প্ৰদায়টোৰ ভূমিকাৰো প্ৰশংসা কৰে।
উক্ত অনুষ্ঠানতে মুখ্যমন্ত্ৰীয়ে মিচিং যুৱ মহোৎসৱৰ বাবে ১০০ কোটি টকা আৰু ‘ডনী-প’ল’ সমাজ’ৰ সৈতে জড়িত পদক্ষেপসমূহৰ বাবে অতিৰিক্ত ১০ কোটি টকাৰ বিত্তীয় সাহায্য আগবঢ়োৱাৰ কথাও ঘোষণা কৰে।
