কটন বিশ্ববিদ্যালয় (পূৰ্বে কটন কলেজ) ৰ ইংৰাজী বিভাগৰ প্ৰাক্তন অধ্যাপক বসন্ত বৰুৱা দেৱৰ আজি ৰাতিপুৱা ১১.৩০ বজাত সুন্দৰপুৰৰ বৰজীয়ৰীৰ ঘৰত ৯২ বছৰ বয়সত পৰলোকপ্ৰাপ্তি ঘটে। মৃত্যুৰ সময়ত তেখেতে ইহ সংসাৰত পত্নী, দুগৰাকী জী আৰু জোৱাই, নাতিনী আৰু বহু গুণমুগ্ধক এৰি থৈ যায়।
নিজৰ প্ৰকৃত নামতকৈ ‘মণিপুৰী’ হিচাপে জনসমাজত বহুলভাবে পৰিছিত বৰুৱা অসুস্থ হৈ বৰজীয়ৰীৰ ঘৰত আছিল। বৰ্তমান তেখেতৰ নশ্বৰ দেহ নবগ্ৰহলৈ অন্তিম সংস্কাৰৰ বাবে লৈ যোৱা হৈছে। তেওঁৰ এগৰাকী গুণমুগ্ধই কয় যে বৰুৱা ছাৰক মণিপুৰী বুলি কলেহে অঞ্চলটোৰ ৰাইজে ভালকৈ চিনি পাই।
বসন্ত বৰুৱাৰ জন্ম হৈছিল ১৯২৭ চনত। গুৱাহাটীৰ চেনিকুঠি প্ৰাথমিক বিদ্যালয়ত স্কুলীয়া শিক্ষা আৰম্ভ কৰা বৰুৱাই কটন কলেজিয়েটত হাইস্কুলীয়া শিক্ষা সমাপ্ত কৰি কটন কলেজত নাম ভৰ্তি কৰে। কটন কলেজত ভৰ্তি হোৱাৰ সময়তে তেখেতে ভাৰতৰ স্বাধীনতা আন্দোলনত অংশগ্ৰহণ কৰাৰ বিৰল সুযোগ লাভ কৰে।
বৰুৱাই কটন কলেজৰ পৰা ইংৰাজী বিষয়ত সন্মান সহকাৰে স্নাতক ডিগ্ৰী লাভ কৰাৰ পাছত স্নাতকোত্তৰ ডিগ্ৰী সমাপ্ত কৰি বৰপেটাৰ এম চি মহাবিদ্যালয়ত ইংৰাজী বিষয়ৰ প্ৰবক্তা হিচাপে যোগদান কৰে। পাছত তেখেতে আকৌ ইংৰাজী ‘বি গ্ৰুপ’ত পঢ়িবৰ বাবে কলিকতা বিশ্ববিদ্যালয়লৈ যায়।
১৯৫৬ চনত দ্বিতীয়বাৰলৈ স্নাতকোত্তৰ ডিগ্ৰী লাভ কৰি বৰুৱাই শ্বিলঙৰ লেডী কিন কলেজত অধ্যাপনা কৰিবলৈ লয় যদিও কিছুদিন পাছতে গুৱাহাটীৰ কটন কলেজত প্ৰবক্তা হিচাপে যোগদান কৰি একেখন কলেজৰ পৰা অৱসৰ গ্ৰহণ কৰে।
বসন্ত বৰুৱাৰ মৃত্যুত চেনিকুঠি অঞ্চলত শোকৰ ছাঁ পৰে। শিক্ষাবিদগৰাকীৰ মৃত্যু অসমৰ শিক্ষা জগতৰ বাবে এক ডাঙৰ ক্ষতি বুলি গুণমুগ্ধসকলে উল্লেখ কৰে।
