ছয় জনগোষ্ঠীৰ জনজাতিকৰণৰ দাবীত তাই আহোম যুৱ ছাত্ৰ পৰিষদ আৰু তাই আহোম ছাত্ৰ সন্থাই আজি আহ্বান জনোৱা ১২ ঘণ্টীয়া অসম বন্ধৰ সময়ছোৱাত একাংশ বন্ধ সমৰ্থকে তিনিচুকীয়া জিলাৰ বিভিন্ন ঠাইত চৰম উদ্ভণ্ডালিৰ সৃষ্টি কৰে।
একাংশ উদণ্ড বন্ধ সমৰ্থকে মাৰ্ঘেৰিটা ক’ল ইণ্ডিয়াৰ চকু চিকিৎসক ডাঃ দিব্যা সিং বৰঠাকুৰে ডিগবৈ পৰা নিজৰ মাৰুটি চুফিট এ এছ ০৬ কিও ৫৬৩৬ নম্বৰৰ গাড়ীখনেৰে আহি থকা অৱস্থাত ডিগবৈৰ গোলাইত শিলগুটি নিক্ষেপ কৰাত চিকিৎসকগৰাকী আহত হোৱাৰ লগতে গাড়ীখনৰো ক্ষতি হয়।
এইদৰে কৰ্তব্যৰত এগৰাকী চিকিৎসকক আক্ৰমণ কৰা ঘটনাই অঞ্চলটোত তীব্ৰ প্ৰতিক্ৰিয়াৰ সৃষ্টি কৰা লগতে সচেতন মহলে ইয়াক তীব্ৰ ভাষাৰে নিন্দা কৰিছে আৰু দোষীক শীঘ্ৰে আটক কৰি শাস্তী দিয়াৰ দাবী জনাইছে।
আনহাতে আজিৰ এই বন্ধৰ সময়ছোৱাত প্ৰতিবাদকাৰীসকলে ৰাজপথত টায়াৰ জ্বলোৱাৰ লগতে তিনিচুকীয়াৰ কেইবা ঠাইতো গাড়ীত শিলগুটি নিক্ষেপ কৰাৰ ফলত কেইবখনো মালবাহি আৰু ব্যক্তিগত গাড়ী কম বেছি পৰিমাণে ক্ষতিসাধন হ’য়।
উল্লেখযোগ্য যে ইয়াৰ পূৰ্বৰ অসম বন্ধৰ সময়তো ক’ল ইণ্ডিয়াৰ আন এজন চিকিৎসক, লেখক ডাঃ ভিংগেশ্বৰ শৰ্মাই ডিব্ৰুগড়লৈ গৈ থকা এম্বুলেঞ্চখনৰ ওপৰতো বন্ধ সমৰ্থকে শিলগুটিৰে আক্ৰমণ চলাইছিল। দুবাৰকৈ কৰ্তব্যৰত চিকিৎসকৰ ওপৰত এনেদৰে আক্ৰমণ চলা ঘটনাই চিকিৎসকসকলক চিন্তিত কৰি তুলিছে।