বিশ্বৰ অন্যতম অশান্ত অঞ্চল পশ্চিম এছিয়াত ইৰাণ আৰু আমেৰিকাৰ মাজত সৃষ্টি হোৱা সামৰিক সংঘৰ্ষৰ পৰিণতিত গোলকীয় ইন্ধন যোগান ব্যৱস্থা ব্যাহত হৈ পৰিছে। ইয়াৰ ফলত চুবুৰীয়া দেশ বাংলাদেশত এক ভয়াবহ শক্তি সংকটে দেখা দিছে। এই জটিল পৰিস্থিতি চম্ভালিবলৈ বাংলাদেশে অসমৰ নুমলীগড় তেল শোধনাগাৰৰ পৰা জৰুৰীকালীনভাৱে ৫,০০০ টন ডিজেল যোগান ধৰিবলৈ ভাৰত চৰকাৰক আনুষ্ঠানিকভাৱে অনুৰোধ জনাইছে।
উল্লেখ্য যে ২০১৭ চনৰ পৰাই ‘ভাৰত-বাংলাদেশ মৈত্ৰী পাইপলাইন’ৰ জৰিয়তে নুমলীগড়ৰ পৰা বাণিজ্যিক ভিত্তিত বাংলাদেশলৈ ডিজেল সৰবৰাহ কৰি থকা হৈছে। ভাৰতে সদায় চুবুৰীয়া দেশখনৰ সৈতে থকা চুক্তিবদ্ধ দায়বদ্ধতা পালন কৰি আহিছে। ঢাকাৰ পৰা লাভ কৰা শেহতীয়া অনুৰোধ সন্দৰ্ভত চৰকাৰী বিষয়াসকলে জনাইছে যে ভাৰতৰ ঘৰুৱা প্ৰয়োজনীয়তা আৰু বজাৰৰ বৰ্তমানৰ অৱস্থা পৰীক্ষা কৰাৰ পাছতহে এই অতিৰিক্ত ইন্ধন যোগানৰ সিদ্ধান্ত গ্ৰহণ কৰা হ’ব।
সাম্প্ৰতিক সময়ত বাংলাদেশৰ পৰিস্থিতি অতিশয় উদ্বেগজনক হৈ পৰিছে। ইন্ধনৰ নাটনিৰ বাবে দেশখনত জৰুৰীকালীন ব্যৱস্থা গ্ৰহণ কৰিবলগীয়া হৈছে। শক্তি সংৰক্ষণৰ উদ্দেশ্যে চৰকাৰে সকলো চৰকাৰী আৰু ব্যক্তিগত বিশ্ববিদ্যালয় বন্ধ কৰি দিয়াৰ লগতে দৈনিক ইন্ধন ৰেশ্যনিং (Rationing) ব্যৱস্থা প্ৰৱৰ্তন কৰিছে। আনকি ইন্ধনৰ অপচয় ৰোধ কৰিবলৈ পবিত্ৰ ঈদ-উল-ফিটৰৰ ছুটিও আগুৱাই দিয়া হৈছে। যোৱা সপ্তাহত ইন্ধনৰ নাটনি হ’ব পাৰে বুলি আতংকিত হৈ গ্ৰাহকে অধিক পৰিমাণে তেল ক্ৰয় কৰিবলৈ লোৱাত বজাৰত হাহাকাৰৰ সৃষ্টি হৈছে। স্মৰ্তব্য যে বাংলাদেশ নিজৰ শক্তিৰ প্ৰয়োজনীয়তাৰ প্ৰায় ৯৫ শতাংশই আমদানিৰ ওপৰত নিৰ্ভৰ কৰে।
ঢাকাৰ সংবাদমাধ্যমত প্ৰকাশিত তথ্য অনুসৰি, বাংলাদেশৰ বিত্ত মন্ত্ৰী আমিৰ খচৰু মাহমুদ চৌধুৰীয়ে ভাৰতীয় উচ্চায়ুক্ত প্ৰণয় বাৰ্মাৰ সৈতে অনুষ্ঠিত এক বৈঠকত এই বিষয়টো উত্থাপন কৰে। বাংলাদেশে অনাগত চাৰি মাহৰ বাবে অতিৰিক্ত ৫০,০০০ টন ডিজেল বিচাৰিছে যাতে দেশখনৰ ইন্ধনৰ ভাণ্ডাৰ সুস্থিৰ কৰি ৰাখিব পৰা যায়। ইফালে গোলকীয় পৰ্যায়ত আমেৰিকাৰ ৰাষ্ট্ৰপতি ড’নাল্ড ট্ৰাম্পে যুদ্ধ ‘প্ৰায় সম্পূৰ্ণ’ হোৱা বুলি ঘোষণা কৰাৰ পাছত অপৰিশোধিত তেলৰ মূল্য কিছু হ্ৰাস পাইছে যদিও বাংলাদেশৰ দৰে আমদানিনিৰ্ভৰ দেশসমূহৰ বাবে সংকট এতিয়াও দূৰ হোৱা নাই।
