চৰকাৰী চাকৰিৰ সংৰক্ষণক লৈ দেশজুৰি বিয়পি পৰা মাৰাত্মক অশান্তিৰ পৰিপ্ৰেক্ষিতত বাংলাদেশৰ কৰ্তৃপক্ষই দেশজুৰি সান্ধ্য আইন জাৰি কৰিছে। ছাত্ৰ প্ৰতিবাদকাৰী আৰু আৰক্ষীৰ মাজত হোৱা সংঘৰ্ষৰ ফলত কমেও ১০৫ জন লোকৰ মৃত্যু হৈছে বুলি সংবাদ সংস্থা এ এফ পিৰ তথ্যত প্ৰকাশ পাইছে।
ইফালে, কমেও তিনি সপ্তাহ ধৰি চলি থকা প্ৰতিবাদ চলিত সপ্তাহত তীব্ৰতৰ হোৱাৰ লগে লগে শুকুৰবাৰে উত্তৰ-পূবৰ সীমান্ত পইণ্টেৰে পাৰ হৈ প্ৰায় ২৪৫ জন ভাৰতীয় নাগৰিক ঘৰলৈ উভতি যায়।
দেশবাসীক টেলিভিছনযোগে দিয়া ভাষণত প্ৰধানমন্ত্ৰী শ্বেখ হাছিনাই শান্তিপূৰ্ণভাৱে সমস্যাটোৰ সমাধান বিচাৰিবলৈ ছাত্ৰ-ছাত্ৰীসকলক আলোচনাৰ বাবে আমন্ত্ৰণ জনায়। কিন্তু বৰ্তমানৰ পৰিস্থিতিৰ প্ৰতি লক্ষ্য ৰাখি ছাত্ৰ-ছাত্ৰীসকলে চৰকাৰৰ প্ৰস্তাৱ গ্ৰহণ কৰিব নে নকৰে সেয়া স্পষ্ট হোৱা নাই।
বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে কয় যে এই প্ৰতিবাদ বাংলাদেশৰ আভ্যন্তৰীণ বিষয়। এম ই এয়ে কয় যে বৰ্তমান বাংলাদেশত বাস কৰা ৮৫০০ ছাত্ৰ-ছাত্ৰীকে ধৰি ১৫ হাজাৰ ভাৰতীয় নিৰাপদ। চৰকাৰে ১২৫ জন ছাত্ৰ-ছাত্ৰীকে ধৰি ২৪৫ জন ভাৰতীয়ক ঘূৰি অহাৰ সুবিধা প্ৰদান কৰিছে।
মধ্য বাংলাদেশৰ নাৰ্চিংডি জিলাৰ এখন কাৰাগাৰত ছাত্ৰ প্ৰতিবাদকাৰীয়ে জুই জ্বলোৱাৰ পূৰ্বে শতাধিক কয়দীক মুকলি কৰি দিয়ে বুলি আৰক্ষী বিষয়া এজনে এএফপিক জনায়।
১৯৭১ চনত পাকিস্তানৰ সৈতে স্বাধীনতা যুদ্ধত যুঁজ দিয়া লোকসকলৰ পৰিয়ালৰ বাবে চৰকাৰী চাকৰিৰ ৩০% সংৰক্ষণ বাতিল কৰিবলৈ বাংলাদেশ চৰকাৰক দাবী জনাইছে বিক্ষোভকাৰীয়ে।
মেঘালয়ৰ মুখ্যমন্ত্ৰী কনৰাড চাংমাই কয় যে ৰাজ্যখনৰ পৰা ৬৩ জন ছাত্ৰ-ছাত্ৰী বাংলাদেশৰ পৰা নিৰাপদে উভতি আহিছে। লগতে বাংলাদেশত থকা ভাৰতীয় উচ্চায়ুক্তৰ সৈতে অহৰহ যোগাযোগ কৰি থকা বুলিও তেওঁ কয় যে তাৰ পৰা অধিক ছাত্ৰ-ছাত্ৰীক উলিয়াই আনিব লাগে।
ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছে জড়িত সকলো পক্ষৰ পৰা সংযমৰ আহ্বান জনাইছে আৰু কৰ্তৃপক্ষক সকলো হিংসাত্মক কাৰ্য্যৰ পুংখানুপুংখ তদন্ত কৰি দোষীক জবাবদিহি কৰাটো নিশ্চিত কৰিবলৈ আহ্বান জনাইছে।
