বাংলাদেশৰ প্ৰধানমন্ত্ৰী তাৰিক ৰহমানৰ উপদেষ্টা ডাঃ জাহেদ উৰ ৰহমানক দিল্লীত প্ৰৱেশ কৰাত বাধা দিয়াৰ ঘটনাৰ বিৰুদ্ধে কঠোৰ পদক্ষেপ গ্ৰহণ কৰিছে বাংলাদেশৰ বৈদেশিক মন্ত্ৰালয়ে।
সোমবাৰে বিয়লি ঢাকাত থকা ভাৰতীয় দূতাবাসৰ চাৰ্জ ডি এফেয়াৰ্ছ তথা উপ-উচ্চায়ুক্ত পৱন বাধেক মাতি নি তীব্ৰ প্ৰতিবাদ সাৱ্যস্ত কৰা হয়। বাংলাদেশৰ বৈদেশিক মন্ত্ৰালয়ে ভাৰত চৰকাৰক পাৰস্পৰিক সন্মান আৰু বুজাবুজিৰ জৰিয়তে শীঘ্ৰে উপযুক্ত ব্যৱস্থা গ্ৰহণ কৰিবলৈও অনুৰোধ জনাইছে।
সূত্ৰ অনুসৰি সোমবাৰে উপ উচ্চায়ুক্ত পৱন বাধেক ৰাষ্ট্ৰীয় অতিথিশালা পদ্মালৈ মাতি নিয়া হয়। তাত বাংলাদেশৰ বৈদেশিক মন্ত্ৰালয়ৰ বিষয়াসকলে তেওঁৰ পৰা বিতং ব্যাখ্যা বিচাৰি এই ঘটনাৰ তীব্ৰ প্ৰতিবাদ সাব্যস্ত কৰে।
ইয়াৰ পূৰ্বে বাংলাদেশৰ বৈদেশিক মন্ত্ৰী খলিলুৰ ৰহমানে প্ৰধানমন্ত্ৰীৰ নীতি আৰু কৌশল উপদেষ্টা ড০ জাহেদ উৰ ৰহমান দিল্লী বিমানবন্দৰৰ পৰা দেশলৈ উভতি যোৱা ঘটনাটোক ‘অবাঞ্চিত আৰু দুখজনক’ বুলি অভিহিত কৰিছিল। লগতে এই সন্দৰ্ভত বিহিত ব্যৱস্থা গ্ৰহণ কৰা হৈছে বুলিও তেওঁ জনায়।
তেওঁ কৈছিল, ‘এয়া এক অভাৱনীয় ঘটনা। লগতে দুৰ্ভাগ্যজনক। এই সন্দৰ্ভত বিহিত ব্যৱস্থা গ্ৰহণ কৰিছে বৈদেশিক পৰিক্ৰমা মন্ত্ৰালয়ে। আমি দিনটোৰ শেষত আপোনালোকক এই বিষয়ে অৱগত কৰিম।’ বৈদেশিক মন্ত্ৰীৰ মন্তব্যৰ কেইমিনিটমানৰ ভিতৰতে পোহৰলৈ আহিল ভাৰতীয় দূতক তলব কৰাৰ খবৰ।
ভাৰত মহাসাগৰীয় ৰিম এছ’চিয়েশ্যনৰ জ্যেষ্ঠ বিষয়া সমিতিৰ ২৮ সংখ্যক বৈঠকৰ আয়োজন কৰা হৈছে নতুন দিল্লীত। ১৫ আৰু ১৬ জুনত ভাৰতৰ বৈদেশিক পৰিক্ৰমা মন্ত্ৰালয়ৰ নেতৃত্বত অনুষ্ঠিত হৈছে এই বৈঠক। বাংলাদেশৰ প্ৰধানমন্ত্ৰী তাৰিক ৰহমানৰ অন্যতম উপদেষ্টা জাহেদ উৰ ৰহমান বাংলাদেশৰ প্ৰতিনিধি হিচাপে এই বৈঠকত অংশগ্ৰহণ কৰিবলৈ আহিছিল। কিন্তু অভিযোগ কৰা হৈছে যে ইমিগ্ৰেচন বিভাগৰ বিষয়াসকলে প্ৰথমে তেওঁক তাতেই ৰখায়। দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত আবদ্ধ হৈ আছিল আঢ়ৈ ঘন্টা সময়। ইয়াৰ পিছত চহৰখনত প্ৰৱেশৰ বাবে প্ৰয়োজনীয় অনুমতি পায়।
অৱশ্যে জাহেদে পুনৰ দিল্লীত প্ৰৱেশ কৰিব নিবিচাৰিলে। শ্ৰীলংকাৰ কলম্বো হৈ ঢাকালৈ উভতি যায়। ঢাকাত থকা বৈদেশিক মন্ত্ৰালয়ৰ এজন বিষয়াৰ উদ্ধৃতি দি বাংলাদেশৰ সংবাদ মাধ্যম প্ৰথম আলোৱে প্ৰকাশ কৰা অনুসৰি শুকুৰবাৰে ভাৰতৰ বৈদেশিক মন্ত্ৰালয়ক কূটনৈতিক পত্ৰৰ জৰিয়তে আনুষ্ঠানিকভাৱে জনোৱা হৈছিল যে জাহেদে আইঅ’ৰাৰ বৈঠকত বাংলাদেশক প্ৰতিনিধিত্ব কৰিব আৰু দেওবাৰে সন্ধিয়া আহিব। দিল্লীত থকা বাংলাদেশৰ উচ্চায়ুক্ত এম ৰিয়াজ হামিদুল্লাইও এই সন্দৰ্ভত সংশ্লিষ্ট মন্ত্ৰালয়ৰ বিষয়াগৰাকীৰ সৈতে ফোনযোগে কথা পাতিছিল।ইয়াৰ পিছত এই পৰিস্থিতি কিয় উদ্ভৱ হ’ল সেয়া স্পষ্ট হোৱা নাই। এই সন্দৰ্ভত এতিয়াও কোনো মন্তব্য কৰা নাই ভাৰতে।
মহম্মদ ইউনুছৰ চৰকাৰৰ দিনত ভাৰত আৰু বাংলাদেশৰ মাজত দ্বিপাক্ষিক সম্পৰ্কৰ অৱনতি ঘটিছিল। আশা কৰা হৈছিল যে তাৰিক ৰহমানৰ কাৰ্যকালত স্থিতি সলনি হ’ব। অৱশ্যে ইয়াৰ মাজতে এই ঘটনা সংঘটিত হয়।
প্ৰধানমন্ত্ৰী তাৰিক ৰহমানৰ উপদেষ্টাক প্ৰৱেশ কৰিবলৈ নিদিয়াৰ ঘটনাৰ পৰিপ্ৰেক্ষিতত ৰাজনৈতিক ভাষ্যকাৰ প্ৰতিম ৰঞ্জন বসুৱে শেহতীয়া পৰিঘটনাক বাংলাদেশৰ বিএনপি নেতৃত্বাধীন চৰকাৰৰ প্ৰতি নতুন দিল্লীৰ কঠোৰ স্থিতিৰ ইংগিত বুলি অভিহিত কৰে। ‘এক্স’ত এটা পোষ্টত তেওঁ কয়, ‘ফেব্ৰুৱাৰী মাহত বিএনপি ক্ষমতালৈ অহাৰ পিছত ভাৰতে প্ৰথমবাৰৰ বাবে নিজৰ স্থিতি কঠোৰ কৰিছে।’
