এগৰাকী যুৱতীক এক অমানুষিক নিৰ্যাতন চলোৱাৰ ভাইৰেল ভিডিঅ’ৰ সৈতে জড়িত অভিযুক্ত কেইজনক আৰক্ষীয়ে অৱশেষত গ্ৰেপ্তাৰ কৰিবলৈ সক্ষম হৈছে।
বাংগালুৰুৰ ৰামমূৰ্থি আৰক্ষীয়ে এই ঘটনাৰ সৈতে জড়িত ৬জনক গ্ৰেপ্তাৰ কৰে। ইয়াৰে দুগৰাকী মহিলা বুলি জানিব পৰা গৈছে।
ভাইৰেল ভিডিঅ’টোত দেখা যোৱা নিৰ্যাতনৰ বলি যুৱতীগৰাকীৰ লগতে অভিযুক্ত আটাইয়ে বাংলাদেশৰ নাগৰিক বুলি পোহৰলৈ আহিছে।
ভাৰতীয় নাগৰিকৰ নথিপত্ৰ তৈয়াৰ কৰি ভাৰতত অবৈধভাৱে প্ৰৱেশ কৰি বাংগালুৰুত থাকিবলৈ লৈছিল এই চক্ৰটোৱে। চক্ৰটো নাৰী সৰবৰাহৰ সৈতে জড়িত বুলি আৰক্ষীয়ে অনুসন্ধানত জানিব পাৰে।
ঘটনাটোত নিৰ্যাতনৰ বলি হোৱা ২২বছৰীয়া যুৱতীগৰাকী বৰ্তমান আন এখন ৰাজ্যত থকা বুলি আৰক্ষীয়ে জানিব পাৰিছে আৰু আৰক্ষীয়ে যুৱতীগৰাকীৰ সন্ধান চলাই আছে। যুৱতীগৰাকীক বিচাৰি পোৱাৰ পাছতে তেওঁৰ ভাষ্যও আৰক্ষীয়ে লিপিবদ্ধ কৰিব।
অভিযুক্তকেইগৰাকীয়ে যুৱতীগৰাকীক অমানুষিক নিৰ্যাতন চলোৱাৰ লগতে দলবদ্ধভাৱে ধৰ্ষণ কৰা বুলি কোৱা হৈছে।
আৰক্ষীয়ে এই নাৰী সৰবৰাহকাৰী চক্ৰটোৰ সৱিশেষ উলিওৱাৰ বাবে ব্যাপক অনুসন্ধানত নামি পৰিছে।
ছচিয়েল মিডিয়াতো ভিডিঅ’ ভাইৰেল হৈ পৰা এই ঘটনাটো বাংগালুৰুত প্ৰায় ছয়দিন পূৰ্বে সংঘটিত হোৱা বুলি কোৱা হৈছে।
বাংগালুৰুৰ আৰক্ষীয়ে জানিবলৈ দিয়ে যে ভিডিঅ’ ক্লিপৰ বিষয়বস্তৰ ওপৰত ভিত্তি কৰি তথা অভিযুক্তসকলে জেৰাত প্ৰকাশ কৰা ভাষ্যৰ ভিত্তিত এটা ধৰ্ষণ, নিৰ্যাতন আৰু আইনৰ সংশ্লিষ্ট ধাৰা অভিযুক্তসকলৰ বিৰুদ্ধে আৰোপ কৰা হৈছে।
‘’এতিয়ালৈকে পোৱা তথ্য মতে এই আটাইকেইজনে একেটা চক্ৰৰে জড়িত আৰু বাংলাদেশৰ পৰা অহা বুলি জানিব পৰা গৈছে। টকা-পইচাৰ মতানৈক্যৰ বাবে অপৰাধীকেইজনে বাংলাদেশৰ পৰা মানৱ সৰবৰাহৰ বাবে অনা যুৱতীগৰাকীৰ ওপৰত অকথ্য নিৰ্যাতন চলাইছিল,’’-আৰক্ষীয়ে জানিবলৈ দিয়ে।
উল্লেখ্য যে ভাইৰেল ভিডিঅ’টোৰ ঘটনাই বিশেষকৈ উত্তৰ-পূৰ্বাঞ্চলত তীব্ৰ প্ৰতিক্ৰিয়াৰ সৃষ্টি কৰিছিল। ভিডিঅ’টো প্ৰত্যক্ষ কৰি ঘটনাৰ বলি যুৱতীগৰাকী দেশৰ এই অংশৰ বুলি অনুমান কৰা হৈছিল আৰু অসম আৰক্ষীয়ে অভিযুক্তৰ তথ্য বিচাৰিছিল।
