গ্ৰাহকৰ অধিকাৰৰ পক্ষত যোৱা এটা ব্যতিক্ৰমী ৰায়দানত চণ্ডীগড়ৰ এখন কনজুমাৰ ফ’ৰামে ‘বাটা’ নামৰ জোতা নিৰ্মাতা কোম্পানিটোক ৯ হাজাৰ টকাৰ জৰিমনা বিহিছে। Shoemaker Bata India Limited নামৰ জনপ্ৰিয় আৰু ভাৰতৰ বিখ্যাত জোতা কোম্পানিটোক এই জৰিমনা বিহা হয় এজন গ্ৰাহকক তেওঁ কিনা জোতাযোৰ ভৰাই দিয়া কেৰিবেগটোৰ ৩ টকা দিবলৈ বাধ্য কৰা বাবে।
এই ঘটনাটো এতিয়া সমগ্ৰ ভাৰতৰ আৰু লগতে অসমৰো ছ’চিয়েল মিডিয়া য়ুজাৰে ব্যাপক হাৰত শ্বেয়াৰ কৰিছে। অসমত ‘বাটা’ৰ উপৰি বিগ বজাৰ, ৰিলায়েন্স, বিশাল আদি কোম্পানিৰ বিক্ৰীকেন্দ্ৰবোৰৰ একেই অন্যায় সহি অহা গ্ৰাহকসকলে ৰায়টোক নিজৰ কণ্ঠ হিচাপে অনুভৱ কৰিছে।
ইণ্ডিয়া টুডেকে ধৰি অন্যান্য সংবাদ পত্ৰবোৰত প্ৰকাশ পোৱা বিৱৰণ মতে, চণ্ডীগড়ৰ দীনেশ প্ৰসাদ ৰাতুৰী নামৰ গ্ৰাহকজনে তেওঁক দিয়া কেৰিবেগটোৰ বাবদ ৩ টকা অতিৰিক্ত লোৱাৰ পিছতে জোতা নিৰ্মাতা কোম্পানিটোৰ বিৰুদ্ধে কনজুমাৰ ফ’ৰামৰ কাষ চাপে। ঘটনাটোৰ বিচাৰৰ পিছত ‘বাটা’ক ফ’ৰামে গ্ৰাহকজনৰ পৰা পেপাৰবেগটোৰ বাবে ৩ টকা বিচৰা বাবে ভৰ্ৎসনা কৰে।
কনজুমাৰ ফ’ৰামক ৰাতুৰীয়ে জানিবলৈ দি কয় যে তেওঁ বাটা ষ্ট’ৰৰ পৰা যোৱা ৫ ফেব্ৰুৱাৰিত এযোৰ জোতা কিনাৰ পিছতে ষ্ট’ৰ কৰ্তৃপক্ষই তেওঁৰ পৰা পেপাৰবেগটোৰ বাবত ৩ টকা লয় আৰু মুঠ বিল হয় ৪০২ টকা। ৩ টকা লোৱাৰ লগতে বেগটোৰ ওপৰত বাটাৰ ব্ৰেণ্ড নেইমটোও ছপোৱা আছিল, যিটো ন্যায়সংগত নহয়।
ৰায়টোত কনজুমাৰ ফ’ৰামে কয়, যদিহে কোম্পানিবোৰ প্ৰকৃততেই পৰিৱেশৰ বাবে চিন্তিত, সেইবোৰে গ্ৰাহকসকলক পৰিৱেশ-অনুকূল বিনামূলীয়া বেগ দিয়া উচিত। কনজুমাৰ ফ’ৰামে বাটাই গ্ৰাহকক হাৰাশাস্তি কৰা বুলি কোৱাৰ উপৰি তেওঁলোকৰ গ্ৰাহকৰ প্ৰতি সেৱাক “অসম্পূৰ্ণ” আখ্যা দিয়ে।
অৱশেষত ফ’ৰামে বাটা ষ্ট’ৰৰ কৰ্তৃপক্ষক কেৰিবেগটোৰ মূল্য ৩ টকাটো গ্ৰাহকজনক ঘূৰাই দিবলৈ আৰু মামলা খৰচ হিচাপে ১০০০ টকা দিবলৈ নিৰ্দেশ দিয়ে। ইয়াৰ লগতে মানসিক অশান্তি দিয়া বাবে গ্ৰাহকজনক আৰু ৩০০০ টকা ক্ষতিপূৰণ আৰু State Consumer Disputes Redressal Commission -অৰ আইনী সাহায্য শিতানত ৫০০০ টকা দিবলৈ নিৰ্দেশটোত কোৱা হয়।
গ্ৰাহকক কৰি থকা অন্যায় আৰু শোষণৰ বিৰুদ্ধে এই দৃষ্টান্তমূলক ৰায়টোৱে অসমতো প্ৰভাৱ পেলোৱাৰ সম্ভাৱনা আছে। অসমৰ গ্ৰাহকেও বাটা-ৰ উপৰি বিশাল, বিগ বজাৰ, খাদিমৰ দৰে শ্ব’পিং মল আৰু শ্ব’ৰূমবোৰত এইদৰে অন্যায় আৰু হাৰাশাস্তিৰ সন্মুখীন হৈ আহিছে।
