অসম আৰু অসমীয়াৰ স্বাভিমান আৰু আৱেগত আঘাত সানি মহাপুৰুষ শ্ৰীমন্ত শঙ্কৰদেৱ, কীৰ্তন-নামঘোষা, নামঘৰ আদি সম্পৰ্কে তীব্ৰ আপত্তিজনক মন্তব্য কৰি পুনৰ বিতৰ্কত সোমাই পৰিছে যোগগুৰু বাবা ৰামদেৱৰ পতঞ্জলি যোগপীঠ৷
দৰং জিলাৰ দুনীৰ এক যোগ শিবিৰত অতি বিতৰ্কিত মন্তব্যৰে অসমীয়া জাতীয় জীৱনৰ পুৰোধা মহাপুৰুষজনাৰ লগতে প্ৰতিজন অসমীয়াই অতি শ্ৰদ্ধাৰে শিৰত ৰখা কীৰ্তন-নামঘোষা সম্পৰ্কে কালি অপমানসূচক মন্তব্য কৰিছিল বাবা ৰামদেৱৰ তথাকথিত শিষ্য জনৈক সীতানাথে।
মহাপুৰুষ শ্ৰীমন্ত শঙ্কৰদেৱৰ জন্মস্থান বটদ্ৰৱাটো এই মন্তব্যই তীব্ৰ প্ৰতিক্ৰিয়াৰ সৃষ্টি কৰিছে। যোগ সাধনাক পতঞ্জলিৰ বিজ্ঞাপনৰ মাধ্যম হিচাপেহে ব্যৱহাৰ কৰা এনে তথাকথিত যোগগুৰুৰ জ্ঞানহীন মন্তব্যৰ ঘোৰ বিৰোধিতা কৰি দেওবাৰে বটদ্ৰৱা থানত বটদ্ৰৱা থান পৰিচালনা সমিতিয়ে এক সংবাদমেল অনুষ্ঠিত কৰে।
শ্ৰীশ্ৰী বটদ্ৰৱা থান পৰিচালনা সমিতিৰ সাধাৰণ সম্পাদক ব্ৰজেন কাকতি, সহকাৰী সম্পাদকদ্বয় ইন্দ্ৰ মোহন বৰুৱা, যোগেন শইকীয়াসহ কেইবাগৰাকীও কাৰ্যকৰী সদস্য উপস্থিত থকা সংবাদমেলখনত পৰিচালনা সমিতিয়ে গুৰুজনাৰ সন্দৰ্ভত কৰা মন্তব্যৰ তীব্ৰ গৰিহনা দিয়ে৷
বটদ্ৰৱা থান পৰিচালনা সমিতিয়ে অসম তথা অসমীয়া কৃষ্টি-সংস্কৃতিৰ সম্পৰ্কে সাম্যক জ্ঞান নথকা কিছু অনা-অসমীয়াৰ এনে মন্তব্যক অতি গৰ্হিত আখ্যা দি অতি শীঘ্ৰে অসমবাসীৰ ওচৰত মন্তব্যকাৰীয়ে ৰাজহুৱা ক্ষমা বিচাৰিবলৈ সকিয়াই দিয়ে৷ তদুপৰি অসম তথা জাতিৰ অভিভাৱক হিচাপে মুখ্যমন্ত্ৰীগৰাকীয়ে এনে স্পৰ্শকাতৰ বিষয় গুৰুত্বসহকাৰে গ্ৰহণ কৰি দোষীৰ বিৰুদ্ধে অতিশীঘ্ৰে বিহিত ব্যৱস্থা লৈ জাতিৰ প্ৰতি নিজৰ দায়বদ্ধতা প্ৰকাশ কৰিবলৈও আহ্বান জনায় শ্ৰীশ্ৰী বটদ্ৰৱা থান পৰিচালনা সমিতিয়ে৷
আনহাতে, স্বদেশী ব্ৰেণ্ডৰ নামত অসমত ব্যৱসায় বৃদ্ধি কৰি থকা পতঞ্জলিয়ে অসমত নিয়োগ কৰা লোকসকলক অসমৰ ধৰ্মীয় আবেগ, কলা-সংস্কৃতি সম্পৰ্কে সম্যক জ্ঞান প্ৰদান কৰিহে নিয়োজিত কৰিব লাগে বুলি মন্তব্য কৰি অতি শীঘ্ৰে বিতৰ্কিত আৰু আপত্তিজনক মন্তব্য সন্দৰ্ভত পতঞ্জলিয়ে স্পষ্টীকৰণ দি ৰাজহুৱা ক্ষমা বিচাৰিবলৈ দাবী জনায়৷
তেজপুৰৰ বালিপাৰাত হাজাৰ হাজাৰ বিঘা মাটি বাবা ৰামদেৱৰ পতঞ্জলিক দি ধন্য হোৱা পৰিবৰ্তনশীল চৰকাৰখনৰ বৰমূৰীয়াসকলে গুৰুজনাৰ সন্দৰ্ভত অপমানসূচক মন্তব্যৰে সামাজিক পৰিবেশ বিনষ্ট কৰিবলৈ দুঃসাহস কৰা সীতানাথৰ দৰে ব্যক্তিৰ বিৰুদ্ধে কি ব্যৱস্থা গ্ৰহণ কৰে সাধাৰণ জনতাৰ মাজত গুৰুত্বপূৰ্ণ বিষয় হিচাপে পৰিলক্ষিত হৈছে।
উল্লেখযোগ্য যে এই বাতৰি সংবাদ মাধ্যমত প্ৰকাশ হোৱাৰ পিছত ৰাজ্যখনৰ সৰ্বত্ৰে পতঞ্জলি আৰু যোগগুৰুজনৰ বিৰুদ্ধে উদ্গীৰণ হৈছে তীব্ৰ ক্ষোভ আৰু বিষেদ্গাৰ৷ অসমত ব্যৱসায় কৰিবলৈ আহি অসমীয়া জাতিৰ প্ৰাণ প্ৰতিষ্ঠাতাজনকে চূড়ান্তভাৱে অপমান কৰা কাৰ্যক একেমুখে ধিক্কাৰ দিছে বহুজনে।
চ’ছিয়েল মিডিয়া ভৰি পৰিছে পতঞ্জলি আৰু এনে জ্ঞানশূন্যহীন অনা অসমীয়াৰ মন্তব্যক লৈ। বহুজনে শীঘ্ৰে এই বহুবল্কি তথাকথিত যোগগুৰুজনক গ্ৰেপ্তাৰ কৰি উচিত শাস্তি দিবলৈ চৰকাৰ প্ৰশাসনক দাবী জনোৱাৰ বিপৰীতে আকৌ একাংশই পতঞ্জলিৰ সকলো সামগ্ৰী অনতিপলমে বৰ্জন কৰি উচিত শিক্ষা দিবলৈ আহ্বান জনাইছে।
