লকডাউনৰ ফলত সকলো খণ্ডতে আৰ্থিক ক্ষতিৰ প্ৰভাৱ পৰিছে। আনকি বিশ্বৰ আটাইতকৈ ধনী ক্ৰিকেট বোৰ্ড বিচিচিআইয়েও তাৰকা ক্ৰিকেটাৰসকলক আদায় দিয়া নাই দৰমহা।
জানিব পৰা মতে, যোৱা বছৰৰ অক্টোবৰ মাহৰ পৰা তাৰকা ক্ৰিকেটাৰ বিৰাট কোহলি, ৰোহিত শৰ্মাকে ধৰি বোৰ্ডৰ সৈতে চুক্তিবদ্ধ ২৭জনকৈ ক্ৰিকেটাৰে দৰমহা লাভ কৰা নাই।
নিয়ম অনুসৰি, চাৰি মাহৰ মূৰে মূৰে তেওঁলোকে নিজৰ পাবলগীয়া দৰমহা লাভ কৰি থাকে।
যোৱা ডিচেম্বৰৰ পৰা টীম ইণ্ডিয়াই যি দুখন টেষ্ট মেচ, আঠখনকৈ টী-২০ আৰু নখন এদিনীয়া মেচ খেলিছে তাৰ পইচা এতিয়াও পাবলৈ বাকী আছে।
বিভিন্ন কেটেগৰিত চুক্তিত আৱদ্ধ হোৱা ক্ৰিকেটাৰসকলক দৰমহা দিয়াৰ নামত বছৰি বিচিচিআইৰ ব্যয় হয় ৯৯কোটি টকা।
বোৰ্ডৰ চুক্তিবদ্ধ আঠজনকৈ ক্ৰিকেটাৰে যোৱা ১০মাহ ধৰি তেওঁলোকে দৰমহা নোপোৱাৰ কথা সদৰী কৰিছে।
বিচিচিআইৰ শেহতীয়া বেলেন্স শ্বিট অনুসৰি ইয়াৰ নগদ তথা বেংক বেলেন্সৰ পৰিমান হৈছে ৫হাজাৰ ৫২৬কোটি টকা।
সেইদৰে, ফিক্সড ডিপ’জিটৰ পৰিমান হৈছে ২হাজাৰ ৯৯২কোটি টকা।
তদুপৰি, ২০১৮ চনত এপ্ৰিল মাহত ষ্টাৰ টিভিৰ সৈতে হোৱা বোৰ্ডৰ সম্প্ৰচাৰ স্বত্ত্ব অনুসৰি চুক্তি হৈছিল ৬হাজাৰ ১৩৮কোটি টকাত।
বাতৰি অনুসৰি, যোৱা ডিচেম্বৰ মাহৰ পৰাই বোৰ্ডৰ কোনো বিত্তীয় বিষয়া নাই। যোৱা মাহৰ পৰা জেনেৰেল মেনেজাৰ তথা চিইঅ’ৰ পদো খালী আছে।
সংবিধান অনুসৰি বোৰ্ডৰ সভাপতি সৌৰভ গাংগুলী আৰু সচিব জয় শ্বাহৰ কাৰ্যকালো উকলিছে। ক’বলৈ গ’লে ঢাল নাই তৰোৱাল নাই, নিধিৰাম চৰ্দাৰৰ দৰে হৈছে বিচিচিআই।
ইয়াৰ মাজতে দেশৰ হৈ খেলা ক্ৰিকেটাৰসকলে এতিয়া তেওঁলোকৰ প্ৰাপ্য দৰমহাৰ বাবে হামৰাও কাঢ়িব লগা হৈছে।