সাৱধান হওঁক আপুনি! এইবাৰ পুৰুষ ডকাইতৰ সন্ত্ৰাস নহয়; যুৱতী ডকাইতে সন্ত্ৰাস চলাইছে মহানগৰ গুৱাহাটীত। অসমীয়া ‘সুন্দৰী’ দস্যুৰাণীৰূপী যুৱতীৰ ডকাইতিয়ে কঁপাইছে গুৱাহাটী।
নিজৰ বিয়ালৈ নিমন্ত্ৰণ দিবলৈ অহাৰ চলেৰে তথা কোনো আত্মীয় বুলি পৰিচয় দি আপোনাৰ পৰা লুটি লৈ যাব পাৰে গহনা, আ-অলংকাৰ।
তেনে এক ঘটনাই সংঘটিত হৈছে মহানগৰীৰ ছয়মাইলস্থিত চন্দন নগৰত।
যোৱা ১০ অক্টোবৰৰ সন্ধিয়া প্ৰায় ৫:৩০ বজাত অঞ্জনা দত্তৰ বাসগৃহত পাঠশালাৰ দীবাংক্ষী ভুঞা নামৰ যুৱতী এগৰাকীয়ে নিজকে দত্তৰ স্বামীৰ গাঁৱৰ ওচৰ-চুবুৰীয়া বুলি পৰিচয় দি বিয়ালৈ নিমন্ত্ৰণ জনাবলৈ আহে।
অঞ্জনা দত্তৰ লগত প্ৰায় এঘন্টা সময় বাৰ্তালাপ কৰি যুৱতীগৰাকীয়ে আ-অলংকাৰৰ প্ৰসংগ উত্থাপন কৰি আলোচনাৰ চলৰে দত্তৰ আ-অলংকাৰসমূহ চাব বিচাৰে। দত্তয়ো বিশ্বাস কৰি তেওঁৰ অলংকাৰসমূহ যুৱতীগৰাকীক দেখুৱাবৰ বাবে লৈ আহে।
সেই আ-অলংকাৰসমূহ চাই থকাৰ মাজতে যুৱতীগৰাকীয়ে তেওঁৰ ফোন অহাত যাব লাগে বুলি কয়। তাৰ পাছত দৰ্জাখন খুলি যুৱতীগৰাকীক বিদায় দিবলৈ লওঁতেই দীবাংক্ষীয়ে তাইৰ বেগৰ পৰা হাতুৰী এটা উলিয়াই মহিলাগৰাকীৰ মূৰত তিনিবাৰকৈ উপৰ্যুপৰি আঘাত কৰাত দত্তৰ ৰক্তক্ষৰণ হৈ মজিয়াত ঢলি পৰে বুলি অভিযোগ কৰে পৰিয়ালৰ লোকে।
তেনেতে দত্তৰ স্বামী ভিতৰৰ পৰা ওলাই অহাত যুৱতীগৰাকী তাৰ পৰা তৎক্ষণাত পলায়ন কৰে।
ইতিমধ্যে, ঘটনা সন্দৰ্ভত অঞ্জনা দত্ত আৰু তেওঁৰ স্বামী প্ৰবোধ কুমাৰ দত্তই দিছপুৰ আৰক্ষী থানাত এজাহাৰ দাখিল কৰে। আৰক্ষীয়েও এজাহাৰৰ ভিত্তিত ২৩৫৬/২০ নম্বৰত ভাৰতীয় দণ্ডবিধিৰ ৩২৫ নং ধাৰাত এক গোচৰ ৰুজু কৰে।
অৱশ্যে, দিছপুৰ আৰক্ষীয়ে তদন্ত কৰি আছে যদিও বৰ্তমানো যুৱতীগৰাকীক কৰায়ত্ত কৰিবলৈ সক্ষম হোৱা নাই।
মহিলাগৰাকী বৰ্তমান ছয়মাইলস্থিত জিএনআৰচিত চিকিৎসাধীন হৈ আছে বুলি জানিব পৰা গৈছে।
এনেদৰেই এতিয়া যুৱ প্ৰজন্মৰ মাজত অপৰাধ প্ৰৱণতা বৃদ্ধি পাই আহিছে। বিয়াৰ নিমন্ত্ৰণ দিবলৈ অহাৰ দৰে এনে কেতবোৰ কৌশল অৱলম্বন কৰি আপোনাৰ লগতো ডকাইতে চলাব পাৰে লুট-পাত।
গতিকে সময় থাকোতে আপুনিও মহানগৰবাসী হিচাপে সজাগ আৰু সচেতন হওঁক, অনথ্যা আপোনালৈয়ো আহিব পাৰে বিপদ।
