চৰকাৰৰ অনুমোদন নহয়, অসমৰ জাতীয় সংগঠনসমূহৰ অনুমতি মৰ্মেহে নিশ্চিত হ’ব ২৬টা বাঙালী সংগঠনে আহ্বান কৰা সমাৱেশ।
বাঙালী সংগঠনকেইটাৰ ঐক্যমঞ্চ চি আৰ পি এফ এ-ই ১৭ নৱেম্বৰত আহ্বান কৰা সমাৱেশকখনক লৈ সমগ্ৰ অসম উত্তপ্ত হৈ থকাৰ মাজতে বৃহস্পতিবাৰে ঐক্যমঞ্চৰ সৈতে অসম সাহিত্য সভাৰ আলোচনা সভাত এই সিদ্ধান্ত গ্ৰহণ কৰা হয়।
“জাতীয় সংগঠনৰ সন্মতি অবিহনে পাতিব নোৱাৰিব এই সমাৱেশ,” এই সিদ্ধান্ত বৃহস্পতিবাৰৰ বৈঠকৰ।
বৈঠকত অসম সাহিত্য সভাৰ নেতৃত্বত এখন সমন্বয় সমিতি গঠন কৰা হৈছে আৰু এই সমিতিয়ে অসমৰ বিভিন্ন জাতীয় সংগঠনৰ লগত আলোচনা কৰিহে বাঙালী সংগঠনে পাতিব বিচৰা মৈত্ৰী সমাৱেশ অনুষ্ঠিত কৰা সন্দৰ্ভত সিদ্ধান্ত ল’ব।
সমাৱেশখনক লৈ “ভুল বুজাবুজি” হোৱা বুলি পুনৰ দোহাৰি মঞ্চৰ নেতা সৌমেন ভাৰাতীয়াই লগতে ঘোষণা কৰে যে এই সমাৱেশত নাগৰিকত্ব বিধেয়কক লৈ কোনো আলোচনা নহয়।
অৱশ্যে পূৰ্বে বাঙালী সংগঠনৰ মঞ্চটোৱে বিজেপি উত্থাপিত বিধেয়কখনৰ সমৰ্থনত সমাৱেশখন আয়োজন কৰা বুলি হোৱা চৰ্চা সন্দৰ্ভত সাংবাদিকৰ প্ৰশ্ন এৰাই চলে বাঙালী মঞ্চৰ নেতা ভাৰাতীয়াই।
লগতে পঢ়ক– এইবাৰ আলফা নেতাৰ ‘খাটাং’ সকীয়নি বিজেপিৰ শিলাদিত্যক
বিধেয়কখনৰ সমৰ্থনত মঞ্চৰ মুখ্য আহ্বায়ক তথা বিজেপি বিধায়ক শিলাদিত্য দেবে কৰি অহা মন্তব্যই ধাৰাৱাহিকভাৱে বিতৰ্কৰ সৃষ্টি কৰি অহাৰ বিপৰীতে বৃহস্পতিবাৰৰ বৈঠকত তাৎপৰ্য্যপূৰ্ণভাৱে এই বিষয়ক লৈ কাকো বিতৰ্কিত মন্তব্য নকৰিবলৈ “আহ্বান’’ জনোৱা হয়।
সাহিত্য সভাৰ গুৱাহাটীৰ কাৰ্যালয়ত অনুষ্ঠিত হোৱা বৈঠকখনত চি আৰ পি এফ এ-ৰ প্ৰতিনিধি শিলাদিত্য দেব, সুকুমাৰ বিশ্বাস, সৌমেন ভাৰাতীয়া আদি নেতা আৰু সভাৰ সভাপতি ডঃ পৰমানন্দ ৰাজবংশী, প্ৰধান সম্পাদক পদুম ৰাজখোৱাকে ধৰি বিষয়ববীয়াসকল উপস্থিত আছিল।
