ছাত্ৰজনে শ্ৰেণীৰ পৰা ওলাই যাবলৈ অনুমতি বিচাৰিছিল। ইয়াৰ বিপৰীতে শ্ৰেণীকোঠাৰ সকলোৰে সন্মুখত তেওঁক ‘উগ্ৰপন্থী’ বুলি অভিহিত কৰা হ’ল! বেংগালুৰুৰ এখন বিশ্ববিদ্যালয়ত সংঘটিত হৈছে এই বিতৰ্কিত ঘটনা।
ভাইৰেল ভিডিঅ’টোত অভিযুক্ত অধ্যাপকজনে ভৰ্তি শ্ৰেণীকোঠাত ছাত্ৰজনক এটাৰ পিছত এটাকৈ মন্তব্য কৰি থকা দেখা গৈছে। এটা সময়ত তেওঁ মুছলমান ছাত্ৰজনক সন্ত্ৰাসবাদী আখ্যা দিয়ে। তেওঁ দাবী কৰে যে তেনে শিক্ষাৰ্থীসকলেই ইৰাণ যুদ্ধৰ বাবে দায়ী। তেওঁলোকৰ প্ৰত্যেকেই নৰকলৈ যাব লাগে। ঘটনাটো পোহৰলৈ অহাৰ লগে লগে ইণ্টাৰনেট জগতত তোলপাৰ লাগে।
বেংগালুৰুৰ পি ই এছ বিশ্ববিদ্যালয়ত সংঘটিত হৈছে এই ঘটনা। অভিযুক্ত অধ্যাপকজনৰ নাম মুৰলীধৰ দেশপাণ্ডে। জানিব পৰা মতে আফান নামৰ এজন ছাত্ৰই মঙলবাৰে ক্লাছৰ সময়ত বাহিৰলৈ যাবলৈ অনুমতি বিচাৰিছিল। কিন্তু আফানৰ কথা শুনি অধ্যাপকজনৰ খং উঠিল।
ভাইৰেল ভিডিঅ’টোত তেওঁ কোৱা শুনা যায় যে, “তোমাৰ লাজ লগা নাইনে? ইৰাণৰ যুদ্ধখন তোমাৰ দৰে মানুহৰ বাবেই চলি আছে। তোমালোক সন্ত্ৰাসবাদী। তুমি নৰকলৈ যোৱা উচিত।” ক্লাছৰ আন এজন ছাত্ৰই সমগ্ৰ ঘটনাটো ৰেকৰ্ডিং কৰিছিল। এই ভিডিঅ’ ভাইৰেল হৈ পৰিছে।
জানিব পৰা মতে, অভিযুক্ত অধ্যাপক মুৰলীধৰক নিলম্বন কৰা হৈছে যদিও সেয়া ঘটনাৰ তিনিদিন পিছত। বিশ্ববিদ্যালয় কৰ্তৃপক্ষই ছাত্ৰজনৰ এজাহাৰ পোৱা বুলি জানিবলৈ দিয়ে। ঘটনাৰ তদন্ত অব্যাহত আছে। বিভিন্ন কাৰণত আৰু তিনিগৰাকী ছাত্ৰ-ছাত্ৰীক নিলম্বন কৰা হৈছে। বিশ্ববিদ্যালয়ৰ উপাচাৰ্যগৰাকীয়ে কয় যে প্ৰতিজন অধ্যাপকক শ্ৰেণীত সঠিক আচৰণ কৰিবলৈ কোৱা হয়। অৱশ্যে বিশ্ববিদ্যালয়খনত এনে ঘটনা কেতিয়াও হোৱা নাই বুলিও তেওঁ কয়।
অৱশ্যে এই ঘটনাত আৰক্ষীক কোনো অভিযোগ দাখিল কৰা হোৱা নাই। তথাপিও ভাইৰেল ভিডিঅ’টো চাই বেংগালুৰু আৰক্ষীয়ে বিশ্ববিদ্যালয়খনৰ সৈতে নিজেই যোগাযোগ কৰে। বিশ্ববিদ্যালয়ে অভিযোগ দাখিল কৰিলে অধ্যাপকজনৰ বিৰুদ্ধে আৰক্ষীয়ে ব্যৱস্থা ল’ব পাৰিলেহেঁতেন, কিন্তু সেয়া নহ’ল।
কংগ্ৰেছৰ ছাত্ৰ সংগঠন এন এছ ইউ আইয়ে আৰক্ষীৰ কাষ চাপিছে আৰু অধ্যাপকগৰাকীৰ বিৰুদ্ধে তেওঁলোকে কঠোৰ ব্যৱস্থা গ্ৰহণৰ দাবী উত্থাপন কৰিছে। লগতে অধ্যাপকগৰাকীৰ পৰা ক্ষমা বিচাৰিছে। কিন্তু অধ্যাপকগৰাকীৰ পৰা এতিয়ালৈকে কোনো প্ৰতিক্ৰিয়া পোৱা হোৱা নাই।
