বিশ্ব ঐতিহ্যক্ষেত্ৰ শান্তিনিকেতনৰ বিশ্বভাৰতী বিশ্ববিদ্যালয়ৰ কলাভৱনত আজিৰে পৰা অসম তথা দেশৰ বৰেণ্য শিল্পী বেণু মিশ্ৰৰ এক বিশেষ মৰণোত্তৰ কলা প্ৰদৰ্শনী আৰম্ভ হৈছে। কলাভৱনৰ নন্দন কলাবীথিকাত আয়োজিত ‘বিটুইন ৰিভাৰলাইট এণ্ড ৰেড ছ’ইল : আ ৰেট্ৰ’স্পেক্টিভ অব্ বেণু মিশ্ৰ’ (Between Riverlight and Red Soil: A Retrospective of Benu Misra) শীৰ্ষক এই বৃহৎ প্ৰদৰ্শনীখন আজি পুৱা আনুষ্ঠানিকভাৱে উদ্বোধন কৰে কলাভৱনৰ অধ্যক্ষ অধ্যাপক শিশিৰ সাহানাই। উল্লেখ্য যে, ১৯৫৭ চনৰ পৰা ১৯৬১ চনলৈ এইখন শিক্ষানুষ্ঠানতে বেণু মিশ্ৰই ৰামকিঙ্কৰ বেইজ আৰু বিনোদবিহাৰী মুখাৰ্জীৰ দৰে কিংবদন্তি শিল্পীৰ তত্ত্বাৱধানত শিল্প শিক্ষা গ্ৰহণ কৰিছিল। নিজৰ একালৰ সেই সাধনা ক্ষেত্ৰতে শিল্পীগৰাকীৰ নিৰ্বাচিত শিল্পকৰ্মৰ এই ৰেট্ৰ’স্পেক্টিভ প্ৰদৰ্শনীয়ে এক আৱেগিক আৰু সাংস্কৃতিক গুৰুত্ব বহন কৰিছে।
বিশ্বভাৰতীৰ কলাভৱনৰ সহযোগী অধ্যাপিকা ডঃ মেঘালী গোস্বামীৰ কিউৰেচন আৰু বেণু মিশ্ৰ স্মাৰক ন্যাসৰ উদ্যোগত আয়োজিত এই অনুষ্ঠানত কেইবাগৰাকীও বিশিষ্ট ব্যক্তি উপস্থিত থাকে। দিনৰ ১১:৩০ বজাত অনুষ্ঠিত হোৱা এই উদ্বোধনী অনুষ্ঠানত বিশ্বভাৰতীৰ শ্ৰীমন্ত শংকৰদেৱ আসনৰ অধ্যাপক তথা প্ৰসিদ্ধ সমালোচক ৰঞ্জিৎ কুমাৰ দেৱ গোস্বামী, প্ৰথিতযশা শিল্পী ঝনক ঝংকাৰ নাৰ্জাৰী, অজিত শীল, সৌমিক নন্দী মাজুমদাৰৰ লগতে কলাভৱনৰ উপাৰ্ধক্ষদ্বয় লাৱনছাইভ’ খাওমাওলং আৰু ভাবনা খাজুৰিয়া বসুমতাৰী উপস্থিত থাকে। ইয়াৰ উপৰিও অসমীয়া বিভাগৰ সহযোগী অধ্যাপিকা ডঃ সংগীতা শইকীয়াৰ লগতে বহুসংখ্যক শিল্পী, গৱেষক আৰু ছাত্ৰ-ছাত্ৰীয়ে এই ঐতিহাসিক ক্ষণত অংশগ্ৰহণ কৰে।
প্ৰদৰ্শনীখনত বেণু মিশ্ৰৰ বহুমুখী শিল্প প্ৰতিভাৰ নিদৰ্শন স্বৰূপ তেওঁৰ চিত্ৰকৰ্ম, ভাস্কৰ্য, গ্ৰাফিক ডিজাইন আৰু বহুতো দুৰ্লভ আৰ্কাইভেল সামগ্ৰী দৰ্শকৰ বাবে মুকলি কৰি দিয়া হৈছে। এই সংগ্ৰহে শিল্পীগৰাকীৰ পঞ্চাশৰ দশকৰ পৰা আৰম্ভ হোৱা অনন্য শিল্প যাত্ৰাৰ এক সামগ্ৰিক চিত্ৰ ডাঙি ধৰিছে। উদ্বোধনী ভাষণত বক্তাসকলে উত্তৰ-পূৰ্ব ভাৰতত আধুনিক শিল্প আন্দোলন গঢ়ি তোলাত বেণু মিশ্ৰৰ অগ্ৰণী ভূমিকাৰ কথা গভীৰ শ্ৰদ্ধাৰে স্মৰণ কৰে। তেওঁলোকে মত প্ৰকাশ কৰে যে এই প্ৰদৰ্শনী কেৱল এগৰাকী শিল্পীৰ সাধনাৰ উদযাপনেই নহয়, বৰঞ্চ ই শান্তিনিকেতন আৰু অসমৰ মাজত থকা সুদীৰ্ঘ সাংস্কৃতিক মৈত্ৰীবন্ধনক পুনৰবাৰ দৃঢ় কৰি তুলিছে।
অসমৰ আধুনিক শিল্পকলাৰ ইতিহাসত এক বিশিষ্ট স্থান দখল কৰা বেণু মিশ্ৰৰ এই কৰ্মৰাজি অহা ১ এপ্ৰিললৈকে সৰ্বসাধাৰণৰ বাবে নন্দন কলাবীথিকাত মুকলি থাকিব। বিশেষকৈ নতুন প্ৰজন্মৰ শিল্পী আৰু গৱেষকসকলৰ বাবে এই প্ৰদৰ্শনীয়ে মিশ্ৰদেৱৰ শিল্পদৰ্শন আৰু শৈলীৰ সৈতে গভীৰভাৱে পৰিচিত হোৱাৰ এক সুবৰ্ণ সুযোগ প্ৰদান কৰিছে। শান্তিনিকেতনৰ ৰঙা মাটি আৰু অসমৰ নদীৰ পোহৰৰ মাজৰ যি একাত্মবোধ মিশ্ৰৰ শিল্পত প্ৰতিফলিত হৈছিল, তাক এই ৰেট্ৰ’স্পেক্টিভে এক নতুন মাত্ৰা প্ৰদান কৰিছে বুলি উপস্থিত শিল্পপ্ৰেমীসকলে মত ব্যক্ত কৰে।
