ছেপ্তেম্বৰৰ ৫ তাৰিখে বাণিজ্যিকভাৱে মুকলি হ’বলগীয়া ৰিলায়েঞ্চলৰ জিঅ’ গিগা ফাইবাৰক লৈ জনসাধাৰণৰ আগ্ৰহ বৃদ্ধি পোৱা পৰিলক্ষিত হৈছে।
গ্ৰাহকৰ বৰ্ধিত আগ্ৰহৰ প্ৰতি লক্ষ্য ৰাখি ষড়যন্ত্ৰকাৰীসকলে গিগা ফাইবাৰ সক্ৰিয় কৰাৰ নাম লৈ মিছা ইমেইল প্ৰেৰণ কৰা আৰম্ভ কৰিছে।
ষড়যন্ত্ৰকাৰীসকলে গ্ৰাহকসকলৰ বেংক একাউণ্টৰ বিষয়ে তথ্য সংগ্ৰহৰ বাবেই ‘এক্টিভেশ্যন ৰিকুৱেষ্ট’ৰ নামত ইমেইল প্ৰেৰণ কৰা আৰম্ভ কৰিছে।
ভুৱা ইমেইলৰ বিষয়ে আপুনি জানিবলগীয়া কিছু কথা-
ভুৱা ইমেইলৰ বিষয়ে
জানিব পৰা মতে ষড়যন্ত্ৰকাৰীসলে প্ৰথমে ‘গিগা ফাইবাৰ-এক্টিভেশ্যন ৰিকুৱেষ্ট ৰিচিভদ’ বিষয়েৰে ভুৱা ইমেইল পঠায়।
ইমেইলটোৰ বিষয়বস্তৱে আপোনাক এইটো এটা কোম্পানীয়ে পঠোৱা ইমেইল বুলি ভাবিবলৈ বাধ্য কৰাব কিয়নো ইয়াত কোম্পানীৰ লগো আৰু লিংক পৰ্যন্ত সংলগ্ন হৈ থাকে।
এবাৰ আপুনি লিংকত গৈ ক্লিক কৰিলে ই আপোনাৰ বেংক একাউণ্টৰ তথ্যৰ বিষয়ে জানিব বিচাৰিব।
ভুৱা ইমেইলৰ উৎসৰ বিষয়ে কেনেদৰে জানিব?
প্ৰথমে ডোমেইন নামটো চিনাক্ত কৰক(@ৰ পাছৰ অংশখিনি)। যদিহে এইটো এটা অফিচিয়েল ডোমেইন হয় তেনেহ’ল তাত মাত্ৰ jio.com বুলি উল্লেখ থাকিব।
ভুৱা ৱেবচাইটৰ বিষয়ে জানিবলৈ ইয়াৰ http আৰু https অংশলৈ ভালদৰে মন কৰক। এই ক্ষেত্ৰত কেতিয়াও প্ৰথমে ব্যক্তিগত বিবৰণ অন্তৰ্ভূক্ত কৰি কাকো বিশ্বাস নকৰিব।
তাৰোপৰি, ভুৱা ৱেবচাইটৰ বিষয়ে জানিবলৈ কপিৰাইট সম্বন্ধীয় তথ্য, কোম্পানীৰ সবিশেষ, বানানৰ ভুল, ব্ৰোকেন লিংক আদিৰ বিষয়ে চাব পাৰে।
এনে ইমেইল লাভ কৰিলে আপুনি কি কৰিব?
জিঅ’ গিগা ফাইবাৰৰ পঞ্জীয়ণ ইতিমধ্যে আৰম্ভ হৈছে। আপুনি ইয়াৰ অফিচিয়েল ৱেবচাইটলৈ গৈ নিজৰ পৰিচয় সম্বন্ধীয় তথ্য অন্তৰ্ভুক্ত কৰি নতুন সংযোগৰ বাবে আবেদন কৰিব পাৰে।
এবাৰ আপোনাৰ পঞ্জীয়ন সম্পূৰ্ণ হ’লে আৰু জিঅ’ৰ তৰফৰ পৰা আপোনাৰ স্থান সত্যাপিত হোৱাৰ পাছত কোম্পানীৰ অভিযন্তা আপোনাৰ ঘৰত উপস্থিত হৈ নতুন সংযোগ স্থাপন কৰি দিব।
জিঅ’ৰ পৰিসেৱা মুকলিৰ প্ৰাৰম্ভিক পৰ্যায়ত নতুন সংযোগ স্থাপন প্ৰক্ৰিয়া সম্পূৰ্ণৰূপে বিনামূলীয়াভাৱে কৰা হয়।
গতিকে এনে ধৰণৰ ভুৱা ইমেইল লাভ কৰিলে কেতিয়াও এনে ইমেইলৰ উত্তৰ নিদিব বৰঞ্চ ইয়াক নপঢ়াকৈ ডিলিট কৰি দিব পাৰে।
