আজি দেশজুৰি ট্ৰেড য়ুনিয়ন আৰু কৰ্মচাৰী ফেডাৰেশ্যন সমূহৰ যৌথ মঞ্চ আহ্বানত কেইবাটাও দাবীৰ ভিত্তিত ভাৰত বচাও আন্দোলনৰ কাৰ্যসূচী শিৱসাগৰতো শ্ৰমিক সংগঠন সমূহে ৰূপায়ণ কৰে।
শিৱসাগৰ জিলা শ্ৰম বিভাগৰ কাৰ্যালয়ৰ সন্মুখত গ্ৰহণ কৰা হয় এই প্ৰতিবাদী কাৰ্যসূচী।
অ’এন জি চি ঠিকা শ্ৰমিক য়ুনিয়নৰ নেতা মদন বৰুৱাই আঁত ধৰা এই প্ৰতিবাদী কাৰ্যসূচীৰ দাবী সমূহৰ তাৎপৰ্য ব্যাখ্যা কৰে চি পি আই নেতা কনক গগৈয়ে৷
কনক গগৈয়ে কেন্দ্ৰীয় চৰকাৰে গ্ৰহণ কৰা শ্ৰমিক বিৰোধী নীতি সমূহক চোকা সমালোচনা কৰে আৰু চৰকাৰে ক’ৰ’না সংকটৰ সময়ত ৰাজনীতি কৰিছে বুলি মন্তব্য কৰে৷
লগতে চিপিআই নেতা গৰাকীয়ে ই এ আই ২০২০ উত্তৰ-পূবৰ বাবে অতিকে ভয়াবহ বুলি কয় আৰু নতুন শিক্ষা নীতিকো চোকা সমালোচনা কৰি সাম্প্ৰদায়িকীকৰণ বাণিজ্যিকীকৰণ তথা ব্যৱসায়ীকৰণ বন্ধ কৰিবলৈও দাবী জনায়৷
আজি কাৰ্যসূচীৰ জৰিয়তে চৰকাৰক সকলোৱে বাবে স্বাস্থ্য সেৱা বিনামূলীয়া আৰু সাৰ্বজনীন কৰিবলৈ দাবী কৰে৷ ইয়াৰ উপৰি ৰেইল, বিদ্যুত, তেল, কয়লা, প্ৰতিৰক্ষা আৰু বেংকসহ দেশৰ ৰাজহুৱা খণ্ড ব্যক্তিগতকৰণ অভিযান বন্ধ কৰিবলৈ দাবী জনায়৷
তদুপৰি আঁচনিভুক্ত কৰ্মচাৰীসকলক নিয়মীয়া কৰ্মচাৰী স্বীকৃতি দিবলৈ দাবী জনোৱাৰ লগতে মাননি সলনি মজুৰি আদায় দিবলৈ দাবী জনায়।
ইয়াৰ উপৰি ক’ৰ’না পৰিস্থিতিয়ে আয়হীন কৰি তোলা প্ৰতি শ্ৰমিকক মাহে ১০ কিলোগ্ৰাম চাউলসহ অত্যাৱশ্যকীয় সামগ্ৰী যোগান ধৰিবলৈ দাবী জনায়৷
ইয়াৰ উপৰি ক’ৰ’না পৰিস্থিতিত কৰ্মহীন হৈ পৰা মটৰ পৰিবহণ শ্ৰমিকসহ অসংগঠিত খণ্ডৰ সকলো শ্ৰমিকক মাহে ৭৫০০ টকা সাহায্য প্ৰদান কৰিবলৈ দাবী কৰে৷
আনহাতে MGNREGA শ্ৰমিকক মজুৰি ৬০০ টকালৈ বৃদ্ধি আৰু কৰ্মদিন ২০০ দিনলৈ বৃদ্ধি কৰিবৰ বাবে দাবী জনায়৷ আৰু ঘৰলৈ ঘূৰি অহা প্ৰব্ৰজিত শ্ৰমিকক সংস্থাপন দিবলৈও দাবী জনায়৷
আনহাতে চাহ শ্ৰমিকৰ দিন মজুৰি ৩৫১ টকা ধাৰ্য কৰিবলৈ দাবী উত্থাপন কৰে।
বান খহনীয়াত ক্ষতিগ্ৰস্তক পৰ্যাপ্ত সাহায্য দি এই সমস্যাক ৰাষ্ট্ৰীয় সমস্যা ঘোষণা কৰিবলৈ দাবী জনায়৷ কৃষি ভূমি অধিগ্ৰহণ আইন, শ্ৰম সংস্কাৰ আইন বাতিল কৰাৰ লগতে পৰিৱেশিক প্ৰভাৱ নিৰূপণ বিল ২০২০ বাতিল কৰিবলৈ দাবী জনায়।