এইবাৰ ভাৰত পেট্ৰলিয়ামক ব্যক্তিগত খণ্ডক বিক্ৰী কৰিব কেন্দ্ৰ চৰকাৰে।
ৰাষ্ট্ৰায়ত্ত তেল সংস্থা বিপিচিএলৰ নিয়ন্ত্ৰণাধীন ভাৰত পেট্ৰলিয়ামৰ ৫২.৯৮ শ্বেয়াৰ বিক্ৰী কৰিবলৈ সাজু হৈছে নৰেন্দ্ৰ মোদীৰ চৰকাৰে।
ভাৰতীয় দ্বিতীয়টো বৃহত্তম ৰন্ধন গেছ বিক্ৰেতা সংস্থা ভাৰত পেট্ৰলিয়ামক ব্যক্তিগত খণ্ডক বিক্ৰীৰ কৰাৰ লগে লগে উপভোক্তাই পাই অহা ভৰ্তুকী বন্ধ হৈ যাব বুলি আশংকা কৰা হৈছে।
শনিবাৰে সংসদত এই সংক্ৰান্তীয় এক প্ৰশ্নৰ স্পষ্ট উত্তৰ দিবলৈ অপৰাগ হয় কেন্দ্ৰীয় চৰকাৰ। চৰকাৰৰ তৰফৰ পৰা জনোৱা হৈছে যে নিলাম কৰাৰ পূৰ্বে এই সম্পৰ্কে আলোচনাহে কৰা হ’ব। শ্বেয়াৰ ক্ৰয় কৰা প্ৰতিষ্ঠানটোক কোনো নিৰ্দেশনা দিয়াৰ কথা উল্লেখ কৰা নাই চৰকাৰে।
ইফালে বিপিচিএল ক্ৰয় কৰিবলৈ আগ্ৰহী ব্যক্তিখণ্ডৰ প্ৰতিষ্ঠানসমূহে অহা ৩০ ছেপ্টেম্বৰৰ পূৰ্বে ক্ৰয় সম্পৰ্কীয় ইচ্ছাপত্ৰ জমা দিব লাগিব। ইয়াৰ পিছতে উক্ত প্ৰতিষ্ঠানসমূহৰ পৰা নিবিদা আহ্বান কৰিব চৰকাৰে।
“গ্ৰাহকৰ কথা ভাবিয়েই নিবিদা পত্ৰ চোৱাৰ পূৰ্বে প্ৰতিষ্ঠানসমূহৰ সৈতে গ্ৰাহকৰ ভৰ্তুকী সম্পৰ্কীয় বিষয়টো চিন্তা চৰ্চা কৰা হ’ব।” শনিবাৰে সংসদত ৰাজ্যিক বিত্ত মন্ত্ৰী অনুৰাগ ঠাকুৰে এইদৰে কয়।
মন্ত্ৰী অনুৰাগ ঠাকুৰৰ এই বক্তব্যৰ পৰা স্পষ্ট হৈ পৰিছে যে কেন্দ্ৰই গ্ৰাহকৰ ভৰ্তুকীৰ সম্পৰ্কীয় বিষয়টো নিয়ন্ত্ৰণ সম্পৰ্কে কোনো সিদ্ধান্ত গ্ৰহণ কৰা নাই অথবা ক্ৰয় কৰা ব্যক্তিগহত প্ৰতিষ্ঠানৰ বাবে কোনো স্পষ্ট নিৰ্দেশনাও প্ৰস্তুত কৰা নাই।
অথচ অক্টোবৰত ভাৰত পেট্ৰলিয়ামক বিক্ৰী কৰাৰ আনুষ্ঠানিক প্ৰক্ৰিয়া আৰম্ভই হ’ব। ব্যক্তিগত খণ্ডক গটোৱাৰ পিছত গ্ৰাহকৰ ভৰ্তুকী নিয়ন্ত্ৰণৰ কোনো অধিকাৰ নাথাকিব কেন্দ্ৰৰ।
উল্লেখ্য যে বিগত কিছুমাহৰ পৰা ৰন্ধন গেছৰ গ্ৰাহকসকলৰ ভৰ্তুকীৰ পৰিমাণ যথেষ্ট পৰিমাণে কমাই দিছে কেন্দ্ৰই।
ইফালে ৰন্ধন গেছৰ ভৰ্তুকী সম্পৰ্কীয় তৃণমূলৰ সাংসদ মালা ৰায়ৰ এক প্ৰশ্নৰ উত্তৰ পেট্ৰলিয়াম মন্ত্ৰী ধৰ্মেন্দ্ৰ প্ৰধানে কয়, “এতিয়াও কেন্দ্ৰই ৰন্ধন গেছৰ ভৰ্তুকীৰ সম্পূৰ্ণৰূপে উঠাই দিয়া নাই। ভৰ্তুকীযুক্ত গেছৰ দামহে নিয়ন্ত্ৰণ কৰিছে। আন্তৰ্জাতিক বজাৰত গেছৰ দাম উঠা নমা কৰি থকাৰ ফলত ভৰ্তুকীৰ পৰিমাণো উঠা নমা কৰি থাকে।”
