উৰুকা বুলি কলেই অসমৰ প্ৰতিখন গাঁও, চহৰ নগৰৰ মানুহৰ মন প্ৰাণ উথলি উঠে। ডেকা-গাভৰু, বৃদ্ধ-বৃদ্ধা, কিশোৰ-কিশোৰীৰ মনত জাগি উঠে আনন্দ উল্লাস।
ঠিক একেই সময়তে অসমৰে এখন গাঁও যি খন গাঁৱত। উৰুকা বুলি কলেই নামি আহে বিষাদৰ ঢল, নামি আহে অশ্ৰু। যিখন গাঁৱত আজিৰ প্ৰজন্মই নাজানে উৰুকা কি, দেখা নাই ভেলা ঘৰ, ভেলা পুঁজি।
গাঁও খনত ২৪ বছৰে পালন কৰা নাই মাঘ বিহুৰ উৰুকা। কিন্তু কিয় উৰুকাই বিষাদৰ ঢল নমাই আনে গাঁও খনলৈ!
ৰাজ্যৰ চৌদিশে হেপাহৰ ভোগালীক আদৰাৰ বাবে চলিছে ব্যাপক প্ৰস্তুতি। কিন্তু বাক্সা জিলাৰ তামুলপুৰ মহকুমাৰ এখন গাঁও য’ত নাই ভোগালীৰ আনন্দ।
এই বিশেষ গাঁওখন হৈছে বাক্সা জিলাৰ তামুলপুৰৰ কেকৰীকুছী গাওঁ ৷ বিগত ২৪ টা বছৰে গাঁওখনৰ কোনো এটা পৰিয়ালে উদযাপন কৰা নাই ভোগালী বিহু, উপভোগ কৰা নাই উৰুকাৰ আনন্দ৷ এই দিনটো গাঁওখনৰ প্ৰতি গৰাকী লোকৰ বাবে বিষাদৰ দিন।
গাঁওবাসীৰ বাবে উৰুকাৰ দিনটো হৈছে এটা অভিশপ্ত দিন।
সেয়া আছিল ১৯৯৮ চনৰ ১৩ জানুৱাৰী। সেইদিনা আছিল উৰুকাৰ নিশা। এই বিশেষ দিনটোত গাঁও খনত সংঘটিত হৈছিল এক নাৰকীয় হত্যাকাণ্ডৰ ঘটনা৷
গাঁও খনত নিশা চলি আছিল উৰুকাৰ ভোজ ভাতৰ আয়োজন। সেই সময়তে গাঁও খনত কেইজনমান অস্ত্ৰধাৰী আততায়ীৰ প্ৰৱেশ ঘটিছিল। গাঁও খনত চলিছিল অততায়ীৰ নিৰ্বিচাৰ গুলী চালনা।
এই গুলি চালনাত কেকেৰিকুছি গাঁওৰ ৪ টাকৈ পৰিয়ালৰ শিশু-মহিলা, যুৱক যুৱতী, বৃদ্ধ বৃদ্ধাসহ ১৭ গৰাকীকৈ লোকে হেৰুৱাইছিল প্ৰাণ ৷ আৰু সেই দিন ধৰি আজিলৈকে কেকেৰীকুছী গাঁওৰ ৰাইজে পালন কৰা নাই উৰুকা আৰু ভোগালী বিহু৷
গাঁও খনৰ দুৰ্ভগীয়া ৰাইজে পাহৰি গৈছে ভোগালী বিহু আৰু উৰুকাৰ আনন্দ কি। গাঁওবাসীৰ বাবে উৰুকা আৰু ভোগালী বিহু এতিয়া পাহৰণিৰ গৰ্ভত।
গাঁও খনৰ নৱ প্ৰজন্মইও নাজানে ভোগালীৰ উৰুকা মানে কি! ২৪ টা বছৰে গাঁও খনৰ ৰাইজে খাই পোৱা নাই অসমীয়াৰ হেঁপাহৰ ভোগালী বিহুৰ পিঠা-লাৰু।
বিগত ২৪ বছৰে গাঁওখনত দেখা নাই ভেলাঘৰ কিম্বা মেজী। গাঁও খনৰ বয়োজেষ্ঠ সকলৰ মনৰ পৰা আজিও আঁতৰ হোৱা নাই সেই ভয়াবহ নিশাৰ আতংক৷
২৪ বছৰ ধৰি উৰুকাৰ নিশাটোত আততায়ীৰ হাতত নিহত লোক কেইজনৰ আত্মাৰ সদগতি কামনা কৰি কেকেৰীকুছীত থকা সমাধিত চাকি বন্তি জ্বলাই উপবাসে থাকে গাঁও খনৰ ৰাইজ আৰু পাৰ কৰে উজাগৰী নিশা৷
নিহত লোক সকলৰ আত্মাৰ সদগতি কামনা কৰি কৰা হয় নাম-কীৰ্তন। উৰুকাৰ দিনটোত ২৪ বছৰে বিষাদ বেদনা লৈ কটাইছে কেকেৰিকুছিৰ ৰাইজে।
