অসম তথা উত্তৰ-পূবত পিঠা-পনা তথা অসমীয়া জলপানৰ ব্যৱসায় আৰম্ভ কৰি ইয়াৰ গ্ৰাহকসকলক এক সুকীয়া স্বাদ আৰু মাদকতা প্ৰদান কৰা ভোগালী জলপান তথা ভোগালী ফুড প্ৰডাক্টছ প্ৰাইভেট লিমিটেডে আজি ইয়াৰ এটা নতুন সংযোজন ‘ভোগালী জলপান গৱেষণা আৰু প্ৰশিক্ষণ প্ৰতিষ্ঠান’ আনুষ্ঠানিকভাৱে মুকলি কৰে।
অসম তথা উত্তৰ-পূবৰ উপৰি ভাৰত তথা বিদেশৰো বিভিন্ন প্ৰান্তত সমাদৰ লাভ কৰা ভোগালী জলপানৰ এই নতুন গৱেষণা আৰু প্ৰশিক্ষণ প্ৰতিষ্ঠানৰ জৰিয়তে অসমীয়া পিঠা-পনা তথা জলপান সমূহ পৃথক-পৃথক ৰূপত গ্ৰাহক তথা অনুষ্ঠান-প্ৰতিষ্ঠানলৈ আগবঢ়াই দিয়া হ’ব আৰু তেওঁলোকৰ সঁহাৰি তথা মতামতৰ ভিত্তিতে এই জলপান তথা পিঠা-পনা সমূহলৈ নতুনত্ব অনা হ’ব।
ইয়াৰ ওপৰত সামগ্ৰীকভাৱে গৱেষণা প্ৰক্ৰিয়া চলাই সকলোৱে ভালপোৱাকৈ পিঠা-পনা আৰু জলপান তৈয়াৰ কৰি ইয়াক বিশ্ব দৰবাৰলৈ লৈ যোৱাৰ প্ৰয়াসৰ বাবেই এই প্ৰতিষ্ঠানটি শুভাৰম্ভ কৰা হৈছে বুলি জানিবলৈ দিয়ে ভোগালী জলপানৰ প্ৰতিষ্ঠাপক তথা স্বত্বাধিকাৰী অজিত শৰ্মা বৰুৱাই।
ইয়াৰ উপৰি তেওঁ কয় যে প্ৰতিষ্ঠানখনত পৰ্যায়ক্ৰমে উৎসাহী, উদ্যমী যুৱক-যৱতীসকলক প্ৰশিক্ষণ প্ৰদানৰো ব্যৱস্থা গ্ৰহণ কৰা হৈছে যাতে প্ৰশিক্ষিত যুক-যুৱতী সকলে ভৱিষ্যতে নিজাববীয়াকৈ অসমীয়া পিঠা-পনা আৰু জলপানৰ প্ৰস্তুত তথা বিতৰণৰ ব্যৱসায় আৰম্ভ কৰিব পাৰে।
তেওঁ আৰু কয় যে বছৰটোৰ ভোগালী, ৰঙালী আৰু কাতি বিহুৰ সময়ছোৱাত ইয়াত বিশেষ ধৰণৰ পৰম্পৰাগত জলপানৰ ব্যৱস্থা গ্ৰহণ কৰা হ’ব আৰু প্ৰতিদিনে এজন-এজন বিশিষ্ট জলপান বা পিঠা-পনা প্ৰস্তুতকৰ্তাৰ নামত এই খাদ্য সম্ভাৰ গ্ৰাহকলৈ আগবঢ়াই দিয়া হ’ব।
উল্লেখ্য যে অসমীয়া পিঠা-পনা আৰু জলপানো যে উত্তৰ আৰু দক্ষিণ ভাৰতৰ বিভিন্ন খাদ্য সম্ভাৰৰ দৰে এটা ব্যৱসায় হ’ব পাৰে সেই সম্পৰ্কে প্ৰতিযোগিতামূলক বাতাবৰণ সৃষ্টি কৰাৰ উদ্দেশ্যে ভোগালী জলপানে উক্ত প্ৰতিষ্ঠানটো আনুষ্ঠানিকভাৱে মুকলি কৰে।
এই খিনিতে উল্লেখ কৰিব পাৰি যে ভোগালী ফুড প্ৰডাক্টছ প্ৰাইভেট লিমিটেড হৈছে এটা আই এছ অ’ (ISO) স্বীকৃতিপ্ৰাপ্ত অনুষ্ঠান।
আজিৰ এই উদ্বোধনী অনুষ্ঠানত বিশিষ্ট খাদ্য-ৰসিক ড০ সুনীলপবন শইকীয়া, খাদ্য বিশেষজ্ঞ জ্যোতি দাস, সাংবাদিক মনময়ুৰী মহন্ত, বিশিষ্ট সাংস্কৃতিক কৰ্মী পবিত্ৰ কুমাৰ শৰ্মা উপস্থিত থাকে।
