আইপিএলৰ নতুন বৰ্ষৰ খেল আৰম্ভ হোৱাৰ আগতে কেইবাটাও দলত যে ডাঙৰ সালসলনি হ’ব, সেয়া যোৱাবাৰৰ খেল শেষ হোৱাৰ লগে লগেই প্ৰায় নিশ্চিত হৈ পৰিছিল। ইতিমধ্যে লক্ষ্ণৌ দলৰ অধিনায়কৰ দায়িত্ব এৰিছে ঋষভ পন্তে। তেওঁ হয়তো দিল্লী দললৈ ঘূৰি যাব। কলকাতা দলেও নতুন অধিনায়কৰ সন্ধান কৰি আছে। এতিয়া জানিব পৰা গৈছে যে, অহা বছৰত ৰাজস্থান দলেও সম্ভৱতঃ নতুন অধিনায়ক পাব।
অহা বছৰৰ খেলত ৰাজস্থান দলৰ পোছাক পিন্ধিব পাৰে হাৰ্দিক পাণ্ডিয়াই। মুম্বাই দলৰ সৈতে তেওঁৰ যাত্ৰা যে শেষ, সেয়া যোৱাবাৰৰ খেলৰ শেষতেই স্পষ্ট হৈ পৰিছিল। প্ৰায় তিনি বছৰ আগতে ৰোহিত শৰ্মাক আঁতৰাই হাৰ্দিকক অধিনায়ক কৰিছিল মুম্বাই দলে। সেই সময়ত সমগ্ৰ দেশৰ ক্ৰিকেট অনুৰাগীৰ খং উঠা দেখা গৈছিল তেওঁৰ ওপৰত। মুম্বাই দলৰ মালিকপক্ষই আশা কৰিছিল যে নিজৰ ভাল খেলৰ জৰিয়তে সকলো পাহৰাই দিব হাৰ্দিকে। কিন্তু তেনে নহ’ল। এই তিনি বছৰত মুম্বাই দলে বিশেষ একো কৰিব নোৱাৰিলে। আনকি, এইবাৰৰ আইপিএলত নৱম স্থানতহে শেষ কৰিবলগীয়া হৈছিল তেওঁলোকে।
হাৰ্দিকক যে মুম্বাই দলে এৰি দিব সেই উমান আগতেই পোৱা গৈছিল। সূত্ৰৰ পৰা জানিব পৰা মতে, হাৰ্দিকক এইবাৰ ল’ব বিচাৰিছে ৰাজস্থান দলে। যোৱাবাৰ ৰাজস্থান দলে ৰিয়ান পৰাগৰ অধিনায়কত্বত খেলিছিল। কিন্তু এইবাৰ ৰাজস্থান দলৰো বহুত সালসলনি হৈছে। দলৰ মালিকানাও সলনি হৈছে। শুনা গৈছে যে, ৰিয়ানৰ সলনি আৰু অধিক ডাঙৰ নাম থকা কাৰোবাক অধিনায়ক কৰাৰ কথা ভাবিছে ৰাজস্থান দলে। সেই দৌৰত আগবাঢ়ি আছে হাৰ্দিক পাণ্ডিয়া। তেওঁক কেন্দ্ৰ কৰিয়েই দল সজাব বিচাৰিছে ৰাজস্থানে।
আনহাতে, ইয়াৰ সলনি মুম্বাই দলে বিচাৰিছে যশস্বী জয়চোৱালক। যশস্বীয়ে বহু দিন ধৰি ৰাজস্থানৰ হৈ খেলি আহিছে। কিন্তু বহুতে ভাৱে যে, তেওঁ পাবলগীয়া সন্মান পোৱা নাই। সঞ্জু ছেমছনে দল এৰাৰ পিছত ধৰি লোৱা হৈছিল যে যশস্বীকেই অধিনায়ক কৰা হ’ব। কিন্তু তেনে নহ’ল। তাৰ সলনি ৰিয়ান পৰাগক অধিনায়ক কৰা হ’ল। তদুপৰি, বৰ্তমান ৰাজস্থান দলত সকলোৰে চকু বৈভৱ সূৰ্যবংশীৰ ওপৰত পৰিছে। সেয়েহে যশস্বীয়েও নতুন দলত যোগদান কৰিব বিচাৰিব। সেয়া যদি মুম্বাই হয়, তেন্তে তেওঁৰ বাবে বহুত ভাল কথা হ’ব। লগতে খবৰ আহিছে যে, মুম্বাই দলে এইবাৰ হাৰ্দিকৰ লগতে সূৰ্যকুমাৰ যাদৱকো এৰি দিয়াৰ সম্ভাৱনা আছে। ৰোহিত শৰ্মাও নিজৰ খেলুৱৈ জীৱনৰ একেবাৰে শেষ পৰ্যায়ত আছে। সেয়েহে যশস্বীয়ে অনাগত দিনত মুম্বাইৰ মূল তাৰকা হিচাপে নিজকে প্ৰতিষ্ঠা কৰাৰ সুযোগ পাব। বৰ্তমানলৈ পোৱা খবৰ অনুসৰি, এই কথাবোৰ বহুদূৰ আগবাঢ়িছে। মোটামুটিভাৱে যশস্বীৰ মুম্বাই যাত্ৰা আৰু হাৰ্দিকৰ ৰাজস্থান যাত্ৰা প্ৰায় নিশ্চিত।
