অৱশেষত ভাৰতৰ নিৰ্বাচন আয়োগে ঘোষণা কৰিলে বিহাৰ বিধানসভা নিৰ্বাচনৰ তাৰিখ। দুটা পৰ্যায়ত অনুষ্ঠিত হ’ব নিৰ্বাচন। প্ৰথম পৰ্যায়ত ৬ নৱেম্বৰত ১২১খন আসনৰ বাবে ভোটগ্ৰহণ হ’ব, দ্বিতীয় পৰ্যায়ত ১১ নৱেম্বৰত ১২২খন আসনৰ বাবে ভোট হ’ব। আয়োগে ঘোষণা কৰা অনুসৰি ১৪ নৱেম্বৰত ফলাফল ঘোষণা কৰা হ’ব। আৰু বৰ্তমানৰ বিধানসভাৰ কাৰ্যকাল ২২ নৱেম্বৰত অন্ত পৰিব।
নিৰ্বাচন আয়োগৰ মুখ্য নিৰ্বাচন আয়ুক্তই সাংবাদমেলত কয় যে, এইবাৰ নিৰ্বাচন নিকা আৰু স্বচ্ছ হ’ব। ভুৱা বাতৰিৰ ওপৰত কঠোৰ নিৰীক্ষণ ৰখা হ’ব আৰু কোনো ধৰণৰ হিংসা সহ্য কৰা নহ’ব বুলি মত পোষণ কৰিছে। ইয়াৰোপৰি ১৭টা নতুন পদক্ষেপ গ্ৰহণ কৰাৰ লগতে ভোটাৰ তালিকাত নাম নথকা লোকে মনোনয়নৰ ১০ দিন আগলৈকে নাম যোগ কৰিব পাৰিব, কিন্তু মনোনয়নৰ পিছত ভোটাৰ তালিকাত নাম অন্তৰ্ভুক্ত কৰিব নোৱাৰিব।
উল্লেখ্য যে আয়োগে ৩০ ছেপ্টেম্বৰত বিহাৰত চূড়ান্ত ভোটাৰ তালিকা প্ৰকাশ কৰে। বিহাৰত মুঠ ভোটাৰৰ সংখ্যা ৭.৩২ কোটি, য’ত ৩.৯২ কোটি পুৰুষ আৰু ৩.৪০ কোটি মহিলা। আৰু ১৪ লাখ ভোটাৰে প্ৰথমবাৰৰ বাবে ভোট দান কৰিব। ২৪৩খন আসনৰ ভিতৰত ২০৩খন সাধাৰণ, ২খন এছটি আৰু ৩৮খন এছচিৰ বাবে সংৰক্ষিত।
নিৰ্বাচন আয়োগে প্ৰকাশ কৰা তথ্য অনুসৰি ৯০,৪১২টা ভোটগ্ৰহণ কেন্দ্ৰ স্থাপন কৰা হৈছে। প্ৰতিটো কেন্দ্ৰত সৰ্বাধিক ১২০০ ভোটাৰে ভোট দান কৰিব আৰু সকলো কেন্দ্ৰত ৱেবকাষ্টিং হ’ব। বিশেষভাৱে সক্ষম লোকসকলে প্ৰ-পত্ৰ ২০ৰ জৰিয়তে ঘৰতে ভোট দিব পাৰিব। লক্ষণীয় যে ভোটগ্ৰহণ কেন্দ্ৰলৈ মোবাইল ফোন লৈ যোৱাৰ অনুমতি প্ৰদান কৰিছে আয়োগে। আৰু ২০০৫ চনৰ পিছত প্ৰথম বাৰৰ বাবে বিহাৰ নিৰ্বাচন দুটা পৰ্যায়ত অনুষ্ঠিত হ’ব। বিহাৰ বিধানসভা নিৰ্বাচন ২০২০ চনত তিনিটা আৰু ২০১৫ চনত পাঁচটা পৰ্যায়ত অনুষ্ঠিত হৈছিল।
