বিহাৰ বিধানসভা নিৰ্বাচনৰ প্ৰথম পৰ্যায়ত অংশ লোৱা প্ৰাৰ্থীসকলৰ বিষয়ে এছ’চিয়েশ্যন ফৰ ডেম’ক্ৰেটিক ৰিফৰ্মছ (ADR) আৰু বিহাৰ ইলেকচন ৱাটচৰ এক প্ৰতিবেদনে ৰাজ্যখনৰ ৰাজনীতিত অপৰাধ আৰু ধনশক্তিৰ গভীৰ সম্পৰ্ক পুনৰ উদঙাই দিছে। ১৩০৩ জন প্ৰাৰ্থীৰ শপতনামাৰ আধাৰত প্ৰস্তুত কৰা এই প্ৰতিবেদনত বিহাৰৰ ৰাজনৈতিক দৃশ্যপটৰ উদ্বেগজনক তথ্য প্ৰকাশ পাইছে।
অপৰাধমূলক গোচৰৰ ভয়াবহতা:
প্ৰথম পৰ্যায়ৰ মুঠ ১৩০০৩ জন প্ৰাৰ্থীৰ ভিতৰত ৪২৩ জন (৩২%) প্ৰাৰ্থীৰ বিৰুদ্ধে অপৰাধমূলক গোচৰ আছে।
ইয়াৰ ভিতৰত ৩৫৪ জন (২৭%) প্ৰাৰ্থীৰ বিৰুদ্ধে হত্যা (৩৩ টা), হত্যাৰ চেষ্টা (৮৬ টা), মহিলাৰ বিৰুদ্ধে অপৰাধ (৪২ টা), আৰু ধৰ্ষণ (২ টা)ৰ দৰে গুৰুতৰ অপৰাধমূলক গোচৰ চলি আছে।
ৰাষ্ট্ৰীয় জনতা দল (RJD)ৰ ৭০ জনৰ ভিতৰত ৪২ জন (৬০%), ভাৰতীয় জনতা পাৰ্টী (BJP)ৰ ৪৮ জনৰ ভিতৰত ২৭ জন (৫৬%), আৰু কংগ্ৰেছৰ ২৩ জনৰ ভিতৰত ১২ জন (৫২%) প্ৰাৰ্থী গুৰুতৰ অপৰাধমূলক গোচৰত অভিযুক্ত। চি পি আই (এম এল)ৰ ৬৪% আৰু চি পি আইৰ ৮০% প্ৰাৰ্থীৰ বিৰুদ্ধেও অপৰাধমূলক গোচৰ আছে।
ধনশক্তিৰ প্ৰভাৱ:
প্ৰতিবেদনত কোৱা হৈছে যে মুঠ ১৩০৩ জন প্ৰাৰ্থীৰ ভিতৰত ৫১৯ জন (৪০%) কোটিপতি।
প্ৰায় প্ৰতিটো ডাঙৰ ৰাজনৈতিক দলেই ধনী প্ৰাৰ্থীক অগ্ৰাধিকাৰ দিছে, যাৰ ফলত ৰাজনীতিত পুঁজিৰ আধিপত্য বিস্তাৰ হৈছে।
জ্যেষ্ঠ সাংবাদিক প্ৰবীণ বাগীৰ মতে, “টিকট বিতৰণৰ ক্ষেত্ৰত সকলো ডাঙৰ ৰাজনৈতিক দলে ধনী প্ৰাৰ্থীক অগ্ৰাধিকাৰ দিছে। যিয়ে নিৰ্বাচনত জয়ী হোৱাত ধনৰ শক্তিয়ে নিৰ্ণায়ক ভূমিকা পালন কৰা বুলি স্পষ্ট ইংগিত দিয়ে।”
অন্যান্য গুৰুত্বপূৰ্ণ তথ্য:
শিক্ষা: ৬৫১ জন প্ৰাৰ্থী (৫০%) স্নাতক বা তাতোকৈ অধিক শিক্ষিত, আনহাতে ৫১৯ জন প্ৰাৰ্থী পঞ্চমৰ পৰা দ্বাদশ শ্ৰেণীলৈকে পঢ়া-শুনা কৰা।
মহিলাৰ প্ৰতিনিধিত্ব: প্ৰথম পৰ্যায়ত মহিলা প্ৰাৰ্থীৰ অংশ মাত্ৰ ৯%, যিয়ে ৰাজ্যখনৰ ৰাজনীতিত মহিলাৰ দুৰ্বল প্ৰতিনিধিত্বৰ ইংগিত দিয়ে।
ইফালে ৰাজনৈতিক দলসমূহে অপৰাধমূলক গোচৰ চলি থকা লোকক টিকট দিয়াৰ সুনিৰ্দিষ্ট কাৰণ দাঙি ধৰাৰ বাবে উচ্চতম ন্যায়ালয়ে দিয়া নিৰ্দেশনা সম্পূৰ্ণৰূপে আওকাণ কৰা হৈছে বুলি প্ৰতিবেদনত উল্লেখ কৰা হৈছে।
