আজি বিশ্ব ৰক্তদান দিৱস। আজিৰ এই বিশেষ দিনটোতে চৰ্চালৈ আহিছে এগৰাকী যুৱক। আজি আমি চিনাকি কৰি দিবলৈ লৈছো বিশ্বনাথৰ এনে এজন ৰক্তদাতাক, যিগৰাকীয়ে শতাধিকবাৰ ৰক্ত দান কৰি আনক জীৱন দান কৰি আহিছে। এগৰাকী সুস্থ লোকে জীৱনত কিমান বাৰ ৰক্ত দান কৰিব পাৰে? আপুনি শুনি আচৰিত হ’ব যে এই গৰাকী যুৱকে ৰক্তদান কৰি শতক অতিক্ৰম কৰিলে।
মুছলমান সম্প্ৰদায়ৰ এই যুৱকগৰাকীৰ নাম বিলাল শ্বেখ। এই বিলাল শ্বেখে আজি পৰ্যন্ত এশ আঠত্ৰিশ গৰাকী বিভিন্ন ধৰ্মালম্বীলোকক ৰক্তদান কৰি জীৱন দান কৰিছে। এই বিলাল শ্বেখে আজিও বিশ্ব ৰক্তদান দিৱস উপলক্ষে বিশ্বনাথ চাৰিআলি অসামৰিক চিকিৎসালয়ৰ ৰক্ত ভাণ্ডাৰত ৰক্তদান কৰি সাংবাদিকৰ আগত নিজৰ অভিজ্ঞাতৰ বিষয়ে জনালে।
লগতে পঢ়ক: পিপিই কিট কেলেংকাৰীৰ বিৰুদ্ধে সৰৱ আম আদমী পাৰ্টি; শিৱসাগৰত ল’লে প্ৰতিবাদী কাৰ্যসূচী
ৰক্তদান কৰোতে কোন কি সম্প্ৰদায়ৰ আজি পৰ্যন্ত বিলাল শ্বেখে নিৰ্বাচন কৰা নাই। মুঠতে বিশ্বনাথত কাৰোবাৰ যদি ৰক্তৰ প্ৰয়োজন হয়, প্ৰথম বিলাল শ্বেখৰে নাম সকলোৰে মনলৈ আহে। এই বিলাল শ্বেখে বৰ্তমান আনৰ গেলামাল দোকানত কৰ্মচাৰী হিচাপে থাকি নিজৰ পৰিয়াল পোহ পাল দি আহিছে।
অসমত হয়তো এনে খুব কম উদাহৰণ ওলাব যিয়ে এশজনতকৈ অধিক লোকক ৰক্তদানেৰে জীৱন দান কৰিছে। তথাপি আজি পৰ্যন্ত এই বিলাল শ্বেখে কোনো চৰকাৰী অথবা প্ৰশাসনৰ পৰা স্বীকৃতি লাভ কৰিবলৈ সক্ষম হোৱা নাই। নীৰবে কৰি অহা আনৰ জীবন ৰক্ষা কৰা এই যুঁজত বিলাল শ্বেখৰ অৱদান কি সেয়া কেবল ভূক্তভোগীয়েহে ভালকৈয়ে জানে।
লগতে পঢ়ক: স্বামীক হত্যা: ‘হাউ টু মাৰ্ডাৰ ইয়ৰ হাজবেণ্ড’ গ্ৰন্থৰ লেখিকাক যাৱজ্জীৱন কাৰাদণ্ড!
জীবিকা অৰ্জন প্ৰক্ৰিয়া অতি সাধাৰণ হ’লেও বিলাল শ্বেখ কৰ্মৰে মহান। যি সময়ত দেশৰ বিভিন্ন স্থানত ধৰ্মক লৈ অসহিষ্ণু পৰিবেশ সৃষ্টি হৈছে, হিন্দু মুছলমানকলৈ একাংশ লোকে লেতেৰা ৰাজনীতি আৰম্ভ কৰিছে, সেই সময়তে বিশ্বনাথৰ এই বিলাল শ্বেখ তেনে ধৰ্মীয় অসহিষ্ণুতাৰ বিৰুদ্ধে ৰক্তদানৰ জৰিয়তে মানৱতাৰ নিদৰ্শন দাঙি ধৰিবলৈ সক্ষম হৈছে।