বিশিষ্ট সাহিত্যিক, সু-লেখিকা তথা নগাঁও চহৰৰ আমোলাপট্টিৰ বাসিন্দা বীণা শৰ্মা (৭৫)ৰ আজি পুৱা গুৱাহাটীৰ এখন ব্যক্তিগত চিকিৎসালয়ত চিকিৎসাধীন অৱস্থাতে মৃত্যু হয় ।
১৯৪৬ চনত গোলাঘাট জিলাৰ জামুগুৰিত জন্ম গ্ৰহণ কৰা বীণা শৰ্মাই প্ৰাথমিক আৰু হাইস্কুলীয়া শিক্ষা গোলাঘাটত সমাপ্ত কৰাৰ পিছত গুৱাহাটীৰ সন্দিকৈ ছোৱালী কলেজৰ পৰা১৯৬৯ স্নাতক আৰু ১৯৭০ চনত নগাঁৱৰ পৰা বি টি ডিগ্ৰী লাভ কৰে ।
নগাঁৱৰ শৰৎ চন্দ্ৰ শৰ্মাৰ লগত ১৯৬৭ চনত তেওঁ বিবাহপাশত আৱদ্ধ হয় ।
পৰৱৰ্তী সময়ত কিৰণবালা গোস্বামী ছোৱালী হাইস্কুলত শিক্ষকতা কৰি তাৰ পৰাই অৱসৰ গ্ৰহণ কৰে । অষ্টম শ্ৰেণীত এটি শিশু গল্পৰে সাহিত্যিক জীৱন আৰম্ভ কৰা বীণা শৰ্মা আজীৱন সাহিত্য চৰ্চাত ব্ৰতী আছিল ।
প্ৰায় কুৰিখনৰো অধিক গল্প , উপন্যাস,কবিতা,ভ্ৰমণ কাহিনী আদি বিভিন্ন বিষয়ৰ গ্ৰন্থ ৰচনা কৰাৰ লগতে শিশু সাহিত্যিক হিচাপেও তেওঁ পৰিচিতি লাভ কৰিছিল ।
তেওঁৰ গল্প সংকলন সমূহ হল- জীৱন জিজ্ঞাসা , প্ৰতিবিম্ব,দুবৰী বন মুকুতা,পশ্চিমৰ বেলি , ৰাঙলী জীৱনৰ হেৰুৱা ৰং।উপন্যাস সমূহ হল- দৈয়াং আজিও বয়,প্ৰতিচ্ছবিত জীৱনৰ ছন্দ , পাখি ভঙা পখী,পদূলিত প্ৰজাপতি আৰু ৰূপালীৰ মনৰ কথা,ৰূপহী নদীৰ ঘাট,দূৰণীত বাঁহীৰ মাত,ৰাতিৰ পোহৰ,শিশু সাহিত্য সমূহৰ ভিতৰত পলাশৰ জীৱনৰ ৰং,পদুম ফুল বোকাত হে ফুলে,দুগদুগী আৰু জীপুৰ কথা,ৰিণিকি ৰিণিকি দেখিছো যমুনা,আকাশত বহুতো জোনাক অন্যতম ।
তেওঁৰ অনুবাদ সাহিত্য- আকাশত বহুতো জোন,ভ্ৰমন কাহিনী- ৰাডুকাৰ চীন ভ্ৰমণ । তেওঁৰ পখিলা নামৰ এখন প্ৰবন্ধ সংকলন আৰু ডাক পখিলা নামৰ এখন কবিতা পুথিও প্ৰকাশ হয় ।
তেওঁ কেইবাখনো আলোচনী সম্পাদনা কৰাৰ লগতে বিভিন্ন কাকতত লেখা মেলা কৰিছিল । তেওঁ অসম চৰকাৰৰ ৰাজ্যিক শিক্ষয়িত্ৰী পুৰস্কাৰ,সদৌ অসম ছাত্র সন্থাৰ কৃতি শিক্ষিয়ত্ৰী বঁটা,অসম লেখিকা সংস্থাৰ কৃষ্ণ প্ৰিয়া হাজৰিকা বঁটাকে ধৰি বহুকেইটা বঁটা আৰু সন্মান লাভ কৰিছিল ।
বীণা শৰ্মা অসম লেখিকা সংস্থাৰ প্ৰাক্তন কাৰ্যকৰী সভানেত্ৰী আৰু নগাঁও জিলাৰ প্ৰতিষ্ঠাপক সভানেত্ৰী হিচাপে কাৰ্যনিৰ্বাহ কৰিছিল ।মৃত্যুৰ সময়লৈকে অসম লেখিকা সংস্থাৰ লগত জৰিত আছিল ।
তেওঁৰ মৃত্যুৰ বাতৰি পোৱাৰ লগে লগে গুণ মুগ্ধ সকলে তেওঁৰ বাসগৃহলৈ গৈ শেষ শ্ৰদ্ধা জ্ঞাপন কৰে ।
তেওঁৰ মৃত্যুত নগাঁৱৰ বিধায়ক ৰূপক শৰ্মাই গভীৰ শোক প্ৰকাশ কৰি কয়- বীণা শৰ্মাৰ মৃত্যু নগাঁৱৰ সমাজ জীৱনৰ লগতে অসমৰ সাহিত্য ক্ষেত্ৰখনৰ বাবে অপূৰণীয় ক্ষতি । প্ৰাক্তন মন্ত্ৰী গিৰিন্দ্ৰ কুমাৰ বৰুৱাই কয় বীণা শৰ্মা এগৰাকী সহজ সৰল মনৰ ব্যক্তি আছিল ।
শিশু সাহিত্যিক গৰাকীৰ মৃত্যু আমাৰ ভাষা সাহিত্য সংস্কৃতিৰ ক্ষেত্ৰখনৰ বাবে অপূৰণীয় ক্ষতি । তেওঁৰ মৃত্যুত প্ৰাক্তন বিধায়ক ডা: দুৰ্লভ চমুৱা , সমাজকৰ্মী শান্তনু শৰ্মা , অসম লেখিকা সংস্থা,নগাঁও জিলা লেখিকা সংস্থা , নগাঁও জিলা সাহিত্য সভা,সুৰৰ পানচৈ শিল্পী সমাজ,নগাঁও প্ৰেছ ক্লাৱ,অকণি সাহিত্য সভা,সদৌ অসম সাংবাদিক সন্থা (আজু)ৰ নগাঁও জিলা সমিতি,
চন্দ্ৰজ্যোতি সংঘ,সদৌ নগাঁও জিলা মইনা পাৰিজাত,কলংপাৰ কাকত গোষ্ঠী,ৰণাংগন কাকত গোষ্ঠী,লায়ঞ্চ ক্লাৱ নগাঁও,তৰা আলোচনী আদিৰ লগতে বিভিন্ন অনুষ্ঠান- প্ৰতিষ্ঠানে গভীৰ শোক প্ৰকাশ কৰাৰ লগতে পৰিয়ালবৰ্গলৈ গভীৰ সমবেদনা জ্ঞাপন কৰিছে ।
মৃত্যুৰ সময়ত তেওঁ স্বামী,পুত্ৰ,কন্যা সহ বহু আত্মীয় স্বজনক এৰি থৈ যায় ।