কুখ্যাত গঁড় চিকাৰী জাকিৰ আলিৰ ‘এনকাউন্টাৰ’ সন্দৰ্ভত বিশ্বনাথ জিলা আৰক্ষী অধীক্ষক নবীন সিঙ আৰক্ষী অধীক্ষকৰ কাৰ্যালয়ত আজি এখন সংবাদ মেল সম্বোধন কৰে।
সংবাদ মেলযোগে আৰক্ষী অধীক্ষক নবীন সিঙে জানিবলৈ দিয়ে যে কিছুদিন পূৰ্বে কাজিৰঙা ৰাষ্ট্ৰীয় উদ্যানত গঁড় হত্যা কৰা হৈছিল। সেই গঁড় হত্যাৰ লগত জড়িত ব্যক্তিসকলক বিচাৰি থকা হৈছিল।
উক্ত গঁড় হত্যাৰ লগত জড়িত থকা সন্দৰ্ভত নগাঁও জুৰীয়াৰ পৰা গ্ৰেপ্তাৰ কৰি অনা হৈছিল জাকিৰ আলি ওৰফে জাগিৰ আলিক। জাগিৰে সেই গঁড় হত্যা কাণ্ডৰ বাবে ডিমাপুৰৰ পৰা অস্ত্ৰ কিনি আনিছিল আৰু সেই অস্ত্ৰ লুকুৱাই থৈছিল বিশ্বনাথৰ ছোৱাগুৰী অঞ্চলত।
যোৱা নিশা বিশ্বনাথ জিলা আৰক্ষীৰ এটা অভিযানকাৰী দলৰ সৈতে কুখ্যাত গঁড় চিকাৰী জাগিৰ গৈছিল সেই অস্ত্ৰ লুকুৱাই ৰখা স্থান দেখুৱাবলৈ। কিন্তু হাঠাৎ আৰক্ষীক কনিষ্টবল ইছমাইল আলিক কুখ্যাত গঁড় চিকাৰী জাগিৰে আক্ৰমণ কৰি পলায়ন কৰিবলৈ চেষ্টা কৰে।
আৰক্ষীয়ে বহুবাৰ কুখ্যাত গঁড় চিকাৰীজনক পলাই নাযাবলৈ কয় আৰু শূন্যলৈও গুলী চালনা কৰে যদিও আৰক্ষীৰ আহ্বানৰ প্ৰতি সঁহাৰি নজনালে গড় চিকাৰীজনে। যাৰ বাবে বিশ্বনাথ জিলা আৰক্ষীয়ে অবশেষত গঁড় চিকাৰী জাগিৰক লক্ষ্য কৰি গুলী চলাবলৈ বাধ্য হয়।
তাৰ পিছতে বিশ্বনাথ জিলা আৰক্ষীয়ে গঁড় চিকাৰী জাগিৰক চিকিৎসাৰ বাবে প্ৰথমে বিশ্বনাথ চাৰিআলি অসামৰিক চিকিৎসালয়লৈ আনে যদিও পিছত তেজপুৰ মেডিকেল কলেজলৈ উন্নত চিকিৎসাৰ বাবে প্ৰেৰণ কৰে।
লগতে পঢ়ক: বটদ্ৰৱা থানা আক্ৰমণৰ ঘটনাৰ অন্যতম অভিযুক্ত আশ্বিকুল ইছলাম আৰক্ষীৰ গাড়ীৰ খুন্দাত নিহত!
আনহাতে, ৰাজ্য চৰকাৰৰ এসময়ৰ মুৰৰ কামোৰণি তথা কুখ্যাত গঁড় চিকাৰী নালকোৰ সহযোগী আছিল জাগিৰ। গঁড় চিকাৰী জাগিৰ পুৰ্বতেও গঁড় চিকাৰৰ গোচৰত অভিযুক্তহৈ জেলত থাকি আহিছিল।
গঁড় চিকাৰী জাগিৰৰ ঘৰ বিশ্বনাথৰ চতিয়া সমষ্টিৰ ভোজমাৰিত আছিল যদিও পৰবৰ্তী সময়ত নাগালেণ্ড, মৌৰাবাৰী আৰু শেহতীয়াকৈ নগাঁও জুৰীয়াৰ বাসিন্দা হিচাপে থকা সময়তে বিশ্বনাথ জিলা আৰক্ষীয়ে জাগিৰক গ্ৰেপ্তাৰ কৰি বিশ্বনাথলৈ লৈ আনিছিল।
