Tamulpur By-election ৫৮ নং তামুলপুৰ বিধানসভা সমষ্টিত সঘনে পৰিবৰ্তন হৈছে নিৰ্বাচনী প্ৰেক্ষাপট। বিজেপিৰ পৰা তীব্ৰ প্ৰাৰ্থিত্বৰ দাবীদাৰ আছিল প্ৰাক্তন বিধায়ক ইমানুৱেল মোছাহাৰী। মুখ্যমন্ত্ৰীৰ আহ্বান মৰ্মে তামুলপুৰৰ প্ৰাক্তন বিধায়ক ইমানুৱেল মোছাহাৰীয়ে মনোনয়ন পত্ৰ প্ৰত্যাহাৰ কৰিছিল যদিও মিত্ৰজোঁটৰ প্ৰাৰ্থী জলেন দৈমাৰীৰ প্ৰচাৰ কাৰ্যৰ পৰা বিৰত আছিল।
কিন্তু অৱশেষত ঠেহ ভাঙিল ইমানুৱেল মোছাহাৰীৰ আৰু তামুলপুৰত মনিকাঞ্চন সংযোগ ঘটিল প্ৰমোদ বড়ো আৰু ইমানুৱেল মোছাহাৰীৰ ৷
দুয়োগৰাকী নেতাৰ মাজৰ বৈঠকৰ পিছত মিত্ৰজোঁট সমৰ্থিত ইউপিপিএলৰ প্ৰাৰ্থী জলেন দৈমাৰীৰ জয়ৰ পথ সুগম হোৱা বুলি অনুমান কৰা হৈছে ৷
কমলপুৰ সমষ্টিৰ বিধায়ক দিগন্ত কলিতা আৰু তামুলপুৰৰ প্ৰাৰ্থী জলেন দৈমাৰীৰ উপস্থিতিত বিটিচি প্ৰধান প্ৰমোদ বড়ো আৰু বিজেপিৰ জ্যেষ্ঠ নেতা ইমানুৱেল মোছাহাৰীৰ মাজত নাগ্ৰীজুলিত বৃহস্পতিবাৰে আবেলি অনুষ্ঠিত হয় এখন বৈঠক।
Also Read: ৰাজ্যত বৃদ্ধি পাইছে ক’ভিডৰ সংক্ৰমণ; কামৰূপ মহানগৰ জিলাৰ পৰিস্থিতি উদ্বেগজনক!
ইমানুৱেল মোছাহাৰীয়ে নিজৰ সমৰ্থকক লগত লৈ সোহাৰ্দপূৰ্ণ আলোচনাত মিলিত হয় ৷
বৈঠকৰ অন্তত প্ৰমোদ বড়োৱে সংবাদ মাধ্যমৰ আগত কয়, ‘’বিজেপি নেতা ইমানুৱেল মোছাহাৰী এগৰাকী অভিজ্ঞ ব্যাক্তি। ভৱিষ্যতে তেখেতৰ ৰাজনৈতিক জীৱনৰ দিশৰ ওপৰত চিন্তা চৰ্চা কৰা হ’ব ৷ ইমানুৱেল মোছাহাৰীয়ে আমাৰ প্ৰাৰ্থীক সমৰ্থন দিয়াত আমাৰ প্ৰাৰ্থী অধিক শক্তিশালী হ’ল।‘’
আনহাতে,সাংবাদিকৰ সৈতে হোৱা সাক্ষাৎকাৰত কমলপুৰৰ বিধায়ক দিগন্ত কলিতাই কয়, ‘’এতিয়া বিজেপি-অগপ- ইউপিপিএল মিত্ৰজোXটৰ প্ৰাৰ্থী জলেন দৈমাৰীৰ জয় সুনিশ্চিত ৷ আমাৰ মাজত সোহাৰ্দপূৰ্ণ আলোচনা হৈ গ’ল। জলেন দৈমাৰীয়ে এক লাখ ত্ৰিশ হাজাৰ ভোটত জয়লাভ কৰিব ৷’’
ইপিনে, নিৰ্বাচনী প্ৰচাৰৰ পৰা আঁতৰি থকা ইমানুৱেল মোছাহাৰীয়ে বৈঠকৰ অন্তত উৎফুল্লিত হৈ কয়, ‘’মুখ্যমন্ত্ৰীৰ আহ্বানত মই মনোনয়ন পত্ৰ প্ৰত্যাহাৰ কৰিছিলো৷ মোৰ সমৰ্থকসকলৰ সৈতে আলোচনা কৰা হ’ল৷ আজিৰ পৰা সমৰ্থকসকলক লগত লৈ জলেন দৈমাৰীৰ সমৰ্থনত কাম কৰি যাম।‘’
