৭ নং গুৱাহাটী লোকসভা সমষ্টিৰ বিজেপিৰ প্ৰাৰ্থী কুইন ওজাৰ শিক্ষাগত অৰ্হতাক লৈ ৰাজ্যজুৰি ব্যাপক চৰ্চা চলি থকাৰ সময়তে প্ৰতিবন্ধী সুৰক্ষা সংস্থা অসমে পোহৰলৈ আনিছে অন্য এক তথ্য। গুৱাহাটী প্ৰেছ ক্লাবত এখন সংবাদমেল অনুষ্ঠিত কৰি সংস্থাৰ অভিযোগ, “কুইন ওজাই নাজানে ‘প্ৰতিবন্ধী’ শব্দটোৰ অৰ্থ।”
“আটাইতকৈ লজ্জাজনক কথা যে, কালি গুৱাহাটী লোকসভা সমষ্টিৰ বিজেপি প্ৰাৰ্থী কুইন ওজাক টেলিফোন কৰি সোধা হৈছিল যে প্ৰতিবন্ধীসকলক লৈ আপুনি কিবা ক’ব বিচাৰে নেকি? আশ্চৰ্য্যৰ কথা যে তেওঁ প্ৰতিবন্ধী শব্দটোৰ অৰ্থই বুজি নাপায়। মোক ক’লে, ‘প্ৰতিবন্ধী মানে কি?’ মোদীয়ে দিব্যাংগ সম্বোধন কৰিলে কি হ’ব, বিজেপি দলৰ প্ৰাৰ্থীয়ে ‘বিকলাংগ’ শব্দটো ক’লেহে বুজি পায়।” সংবাদমেলত ক’লে প্ৰতিবন্ধী সুৰক্ষা সংস্থা, অসমৰ সাধাৰণ সম্পাদক নৃপেন মালাকাৰে।
সংবাদমেলত মুকলিমুৰীয়াকৈ বিজেপি দলক প্ৰশ্ন কৰি মালাকাৰে কয়, “দলটোৱে তেওঁক সুৰক্ষা দি থাকিলেও কুইন ওজাৰ শিক্ষাগত অৰ্হতা এনেকুৱাই নেকি?”
“তেওঁ যদি গমেই নাপায় প্ৰতিবন্ধী ব্যক্তি মানে কি? তেওঁ প্ৰতিবন্ধীসকলৰ বাবে কি কৰিব?” বিজেপিৰ লগতে কুইন ওজালৈ প্ৰশ্ন মালাকাৰৰ।
আনহাতে, একেখন সংবাদমেলতে ৰাজ্যৰ সমূহ প্ৰতিবন্ধী লোকক দল নাচাই প্ৰাৰ্থী চাই ভোটদান কৰিবৰ বাবে মালাকাৰে আহ্বান জনায়। প্ৰয়োজন সাপেক্ষে ন’টাৰ আশ্ৰয় ল’বলৈ তেওঁ আহ্বান জনায়।
তেওঁ কয়, “ৰাজ্যৰ দিব্যাংগসকলে প্ৰত্যেকটো সমষ্টিৰ সাংসদ প্ৰাৰ্থীসকলৰ সৈতে কথা পাতক, যদি লগত লগত প্ৰাৰ্থীগৰাকীয়ে স্থিতি স্পষ্ট নকৰে বা সমস্যাসমূহক লৈ মাত নামাতে, তেন্তে ন’টাত ভোট দিয়ক। কি কংগ্ৰেছ, কি বিজেপি যদি প্ৰাৰ্থীগৰাকীয়ে দিব্যাংগসকলৰ আশা-আকাংক্ষা তথা সমস্যাসমূহ গুৰুত্ব সহকাৰে নলয় বা এই বিষয়ত অনীহা প্ৰকাশ কৰিব, তেওঁক ভোট দিয়াৰ পৰা বিৰত থাকক।”
মালাকাৰে দাবী কৰা মতে, ৰাজ্যত আছে ৮ লক্ষাধিক দিব্যাংগ ভোটাৰ। তেওঁলোকৰ পৰিয়ালৰ অন্য সদস্যক ধৰি প্ৰায় ৪৪ লাখ ভোটাৰ আছে। দিব্যাংগ লোক থকা পৰিয়ালে দিব্যাংগ লোকজনে কি সাহায্য পাইছে সেই কথাত গুৰুত্ব দিয়ে।
ইপিনে, তেওঁলোকৰ দাবীসমূহ পূৰণ নকৰা প্ৰাৰ্থীৰ উপৰি নাগৰিকত্ব সংশোধনী বিধেয়কৰ সমৰ্থনত থকা প্ৰাৰ্থীক প্ৰতিবন্ধী সুৰক্ষা সংস্থাই সমৰ্থন নকৰে বুলি সংবাদমেলত মালাকাৰে কয়।
উল্লেখযোগ্য যে অসম চৰকাৰৰ ৫৪টা বিভাগত খালী থকা প্ৰতিবন্ধীসকলৰ বাবে সংৰক্ষিত ৪৪১৯টা পদত নিযুক্তি দিবৰ বাবে তথা দীনদয়াল দিব্যাংগ আঁচনিৰ অধীনত অসমৰ প্ৰতিবন্ধীক ৫০০০ টকাকৈ দিয়াৰ বাবে দাবী জনাই আহিছিল সংস্থাই। কিন্তু তাৰ বিপৰীতে দিব্যাংগৰ বাবে বিজেপিয়ে নিৰ্বাচনী ইস্তাহাৰত আশাপ্ৰদ কোনো প্ৰতিশ্ৰুতিয়েই আগ নবঢ়োৱাত ক্ষুভিত হৈ পৰিছে দিব্যাংগসকল। তাৰ বিপৰীতে কংগ্ৰেছে ৬০ বছৰ শাসনত পুতৌৰ দৃষ্টিৰেহে দিব্যাংগসকলক চালে বুলিও মন্তব্য কৰে মালাকাৰে।
