”বিজেপি চৰকাৰে কেবল খিলঞ্জীয়া মুছলমানকে নহয় সকলো জাতি-জনগোষ্ঠীক প্ৰতাৰণ কৰিছে। অখিল গগৈৰ গ্ৰেপ্তাৰ অগণতান্ত্ৰিক,” মেহেদী আলম বড়াই এইদৰে মন্তব্য কৰে।
আজি শিৱসাগৰত উজনি অসম মুছলিম কল্যান পৰিষদৰ এক সংবাদ মেলত সংঠনটোৰ কেন্দ্ৰীয় উপদেষ্টা মেহেদী আলম বড়াই বিজেপি চৰকাৰক তীব্ৰ সমালোচনা কৰি এইদৰে সমালোচনা কৰাৰ লগতে সত্যৰঞ্জন বৰা আৰু গীত কামৰূপাৰ দৰে ব্যক্তিক চৰকাৰে কিয় অসমৰ প্ৰান্তে প্ৰান্তে ধৰ্মীয় বিষবাষ্প সিঁচিবলৈ এৰি দিছে বুলি প্ৰশ্ন কৰে।
বড়াই অখিল গগৈৰ গ্ৰেপ্তাৰ অবৈধ আৰু অগণতান্ত্ৰিক বুলি মন্তব্য কৰাৰ লগতে অতি শীঘ্ৰে অখিল গগৈক মুকলি কৰি দিবলৈয়ো দাবী জনায়।
আনহাতে, বৰাই সমাজত সাম্প্ৰদায়িক বিষবাষ্প বিয়পোৱা সত্যৰঞ্জন বৰা আৰু গীত কামৰূপাক আইন ভংগকাৰী বুলি কোৱাৰ লগতে চৰকাৰে তেওঁলোকক গ্ৰেপ্তাৰ কৰিব নোৱাৰাটো চৰকাৰৰ দুৰ্বলতা বুলি কয়।
ইপিনে, শিৱসাগৰৰ নাৰী সমাজ, সংবাদ মাধ্যম তথা দল সংগঠনক অপমানসূচক মন্তব্য কৰা গীত কামৰূপাৰ বিৰুদ্ধে শিৱসাগৰ সদৰ থানাত ২৪ খনকৈ এজাহাৰ দাখিল হোৱাৰ পিছতো শিৱসাগৰ জিলা প্ৰশাসন তথা আৰক্ষী প্ৰশাসন নিশ্চুপ হৈ থকা বিষয়টোৱে কোনো ৰাজনৈতিক শক্তিৰ ওচৰত প্ৰশাসন বন্দী হৈ থকাৰ উমান পোৱা গৈছে বুলি কটাক্ষ কৰে বড়াই
তদুপৰি, জাতি-মাটি-ভেটি ৰক্ষা কৰা তথা পৰিৱৰ্তনৰ কথা কোৱা বিজেপি চৰকাৰে কেৱল খিলঞ্জীয়া মুছলমানকেই নহয় অসমৰ সকলো জাতি-জনগোষ্ঠীক প্ৰতাৰণা কৰিছে বুলিও মন্তব্য কৰে বড়াই।
আজিলৈকে ৰাজনৈতিক, আর্থিক, সামাজিকভাৱে পিছপৰা খিলঞ্জীয়া মুছলমান সকলৰ জৰীপৰ বাবে ১০০ কোটি টকা ধাৰ্য্য কৰিও জৰীপ সম্পন্ন নকৰিলে চৰকাৰে। আজানপীৰ কলাক্ষেত্ৰৰ ১০০ কোটি টকাৰ আৱন্টনৰ দাবী আজিলৈ পূৰ্ণ নকৰিলে বুলিও চৰকাৰক সমালোচনা কৰে নেতা গৰাকীয়ে।
কংগ্ৰেছ চৰকাৰৰ দিনত কাম আগবঢ়া উচ্চ সদন গঠন প্ৰক্ৰিয়া এইখন চৰকাৰে স্থবিৰ কৰি দিলে। উজনি অসম মুছলিম কল্যাণ পৰিষদে ২০২১ ৰ নির্বাচনত অসমীয়া জাতি আৰু সমাজক সুৰক্ষিত কৰা আঞ্চলিকতাবাদ সম্পন্ন দলক খিলঞ্জীয়া মুছলমানে সমর্থন কৰিব বুলিও সংগঠনটোৱে স্পষ্ট কৰি দিয়ে।
সংবাদ মেলত উজনি অসম মুছলিম কল্যাণ পৰিষদৰ সভাপতি ছৌকত লতিফ আৰু উপ সভাপতি মণিৰুল ইছলাম বড়া উপস্থিত থাকে।