হাগ্ৰামা মহিলাৰী নেতৃত্বাধীন বি পি এফ প্ৰশাসনে বি টি এ ডিত বসবাস কৰা সকলো শ্ৰেণীৰ ৰাইজৰ উন্নয়নৰ হকে কাম কৰি আহিছে। স্বাধীনোত্তৰ কালত বি টি এ ডি অঞ্চলৰ উন্নয়নৰ ওপৰত কোনোখন চৰকাৰে গুৰুত্ব আৰোপ কৰা নাছিল যাৰ ফলত সৰ্বদিশত পিছপৰি আছিল বৰ্তমানৰ বি টি এ ডি অঞ্চল। এই ভাষ্য বি টি চিৰ কাৰ্যবাহী সদস্য গণেশ কছাৰীৰ।
আজি বাক্সা জিলাৰ শুক্লাই চেৰফাং পৰিষদীয় সমষ্টিৰ অন্তৰ্গত খাটৰবাৰীত খাটৰবাৰী চ’কৰ পৰা বৰলীয়াপাৰলৈ নিৰ্মাণ কৰিবলগীয়া এটা পথৰ আধাৰশিলা স্থাপন কৰি কাৰ্যবাহী সদস্য গৰাকীয়ে এইদৰে কয়।
শুক্লাই চেৰফাং পৰিষদীয় সমষ্টিৰ টি চি এল চি চিৰ সভাপতি ৰুদ্ৰ সুবেদী, বি পি এফ নেতা জিনাৰাম বড়ো, খাটৰবাৰী ভি চি ডি চিৰ সভাপতি ফাগুনী স্বর্গীয়াৰী, খাটৰবাৰী ভি চি ডি চিৰ প্ৰাক্তন সভাপতি ৰাজু বড়ো, স্থানীয় বি পি এফ নেতা ফ্ৰাইদে স্বৰ্গীয়াৰী, কৃষ্ণকান্ত ব্ৰহ্ম, ব্ৰজেন বড়োৰ উপৰিও বিভিন্ন নেতা কৰ্মীৰ উপস্থিতিত গণেশ কছাৰীয়ে শুক্লাই চেৰফাং সমষ্টিৰ উন্নয়নৰ খতিয়ান দাঙি ধৰে।
পথচোৱাৰ আধাৰশিলা স্থাপন কৰি কাৰ্যবাহী সদস্য গণেশ কছাৰীয়ে কয় যে বি পি এফে ৰাজনীতিৰ বাবে ৰাজনীতি কৰা নাই। উন্নয়নৰ কাম কৰি ৰাইজৰ সমস্যা সমাধানৰ পথ প্ৰশস্ত কৰাৰ বাবেহে দলটোৱে কাম কৰি আহিছে।