কেন্দ্ৰীয় মন্ত্ৰীসভাৰ পৰা পদত্যাগ কৰিলে বিজেপিৰ জ্যেষ্ঠ নেতা জৰ্জ কুৰিয়ানে। ৰাজ্যসভাৰ সদস্য হিচাপে ছবছৰীয়া কাৰ্যকাল শেষ হোৱাত তেওঁ মন্ত্ৰালয় এৰিবলগীয়া হৈছে। বিজেপিয়ে তেওঁক পুনৰ ৰাজ্যসভালৈ মনোনীত নকৰাত কেন্দ্ৰীয় মন্ত্ৰালয়ত তেওঁৰ অধ্যায়ৰো আপাততঃ অন্ত পৰিছে।
ৰাষ্ট্ৰপতি ভৱনৰ সূত্ৰ অনুসৰি ৰাষ্ট্ৰপতি দ্ৰৌপদী মুৰ্মুৱে জৰ্জ কুৰিয়ানৰ পদত্যাগ পত্ৰ গ্ৰহণ কৰিছে। সংবিধানৰ ৭৫(২) অনুচ্ছেদৰ অধীনত প্ৰধানমন্ত্ৰী নৰেন্দ্ৰ মোডীৰ পৰামৰ্শ মতে এই সিদ্ধান্ত কাৰ্যকৰী কৰা হৈছে। এই সন্দৰ্ভত ৰাষ্ট্ৰপতি ভৱনেও এক আনুষ্ঠানিক বিবৃতি প্ৰকাশ কৰিছে।
৬৫ বছৰীয়া জৰ্জ কুৰিয়ান কেৰেলাৰ কোট্টায়মৰ বাসিন্দা। পেছাত এজন অধিবক্তা কুৰিয়ান দীৰ্ঘদিন ধৰি বিজেপিৰ কেৰালা ৰাজ্যিক ইউনিটৰ গুৰুত্বপূৰ্ণ মুখ হিচাপে পৰিচিত হৈ আহিছে। তেওঁ বিজেপিৰ কেৰালা শাখাৰ উপ-সভাপতি হিচাপেও কাৰ্যনিৰ্বাহ কৰিছিল।
ৰাজনীতিৰ বাহিৰেও কুৰিয়ানে নিয়মিতভাৱে টেলিভিছনৰ বিতৰ্কত অংশগ্ৰহণ কৰিছিল। কেৰালাত বিজেপিৰ প্ৰচাৰ অভিযানত তেওঁৰ ভূমিকা বিশেষভাৱে উল্লেখযোগ্য আছিল। প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহৰ ভাষণ কেৰালা ভ্ৰমণৰ সময়ত বহুবাৰ মালয়ালম ভাষালৈ অনুবাদ কৰিছে। ফলস্বৰূপে কুৰিয়ানে বিজেপিৰ বাৰ্তা স্থানীয় ৰাইজলৈ প্ৰেৰণ কৰাত গুৰুত্বপূৰ্ণ ভূমিকা পালন কৰিছিল।
২০২৪ চনত কেন্দ্রীয় মন্ত্রীসভাত তেওঁ অন্তর্ভুক্ত হয়৷ ৰাজনৈতিক মহলৰ মতে কেৰালাত বিজেপিৰ সংগঠন আৰু অধিক শক্তিশালী কৰাৰ লগতে বিশেষকৈ খ্রীষ্টান সমাজৰ মাজত দলটোৰ গ্রহণযোগ্যতা বৃদ্ধিৰ বাবে এই পদক্ষেপ লোৱা হৈছিল৷ দক্ষিণ ভাৰতত বিজেপিৰ অন্যতম চিনাকি মুখ হিচাপে জৰ্জ কুৰিয়ানৰ উপস্থিতি দলটোৰ ৰাজনৈতিক কৌশলৰ এক গুৰুত্বপূৰ্ণ অংশ আছিল।
ৰাজ্যসভাৰ কাৰ্যকাল শেষ হোৱাৰ লগে লগে তেওঁৰ মন্ত্ৰলয়ৰো অন্ত পৰিল। বিজেপিৰ নেতৃত্বই তেওঁক পুনৰ উচ্চ সদনলৈ পঠোৱাৰ সিদ্ধান্ত নোলোৱাৰ বাবে তেওঁ চৰকাৰ এৰিবলগীয়া হৈছে। অৱশ্যে ভৱিষ্যতে তেওঁৰ ৰাজনৈতিক ভূমিকা কি হ’ব সেই সন্দৰ্ভত এতিয়ালৈকে কোনো আনুষ্ঠানিক তথ্য ওলোৱা নাই।
