নাগৰিকত্ব সংশোধনী বিধেয়কৰ বিৰোধিতা কৰিলে অসম বিশ্ববিদ্যালয়ত অসমীয়া ছাত্ৰ-ছাত্ৰীক নামভৰ্তি কৰিব নোৱাৰিব বুলি হুংকাৰ দিয়াৰ এদিন পিছতে নিজৰ ভাষ্য সলালে বৰাকৰ বিতৰ্কিত বিজেপি নেতা প্ৰদীপ দত্তৰয়ে।
আজি নৰ্থ-ইষ্ট নাওৰ আগত নিজৰ স্থিতি সম্পূৰ্ণ ওলোটাই প্ৰদীপ দত্তৰয়ে কয় যে তেওঁ কেতিয়াও অসম বিশ্ববিদ্যালয়ত অসমীয়া ছাত্ৰ-ছাত্ৰীক পঢ়িবলৈ নিদিওঁ বুলি কোৱা নাছিল।
“মোৰ স্পষ্ট কথা হ’ল আমি কেতিয়াও অসমীয়া ল’ৰা, ষ্টুডেণ্টৰ বিৰুদ্ধে নহয়। আৰু আমি আছুকো ব্লেম কৰিব খোজা নাই। আছুৰ ইয়াত ৰেছপনছিবিলিটি নাই।”
“পিছত মই জানিব পাৰিছো যে এইটো আছুৰ কাম নহয়। কিছুমান ছাত্ৰই, যিসকল বিশ্ববিদ্যালয়খনৰ ছাত্ৰ নহয়, ৯ জানুৱাৰি দিনা নাগৰিকত্ব সংশোধনী বিধেয়কখনৰ বিৰোধিতাত মমবাতি জ্বলাইছিল।” ১১ জানুৱাৰিত নতুনকৈ দিয়া এটা ভাষ্যত তেওঁ ‘পূৰ্বে ভবাৰ দৰে ছাত্ৰ-ছাত্ৰীসকল বিশ্ববিদ্যালয়ৰ নাছিল’ বুলি লুটিবাগৰ মাৰি এইদৰে কয়।
“মই এটা কথা ক’ব বিচাৰিছো, আমি আছাম য়ুনিভাৰ্ছিটি আনিছো ১০ বছৰ আন্দোলনৰ ফলত। আছু, অগপই ইয়াৰ যেনেকৈ বিৰোধিতা কৰিছিল সেইটো সকলোৱে জানে।”
“ইয়াৰ পৰিসৰ হৈছে বৰাক ভেলি, এন চি হিলছ আৰু কাৰ্বি আংলঙলৈকে। প্ৰথমে গোটেই অসমত লোৱা হৈছিল। কিন্তু আছু আৰু অগপৰ বিৰোধিতাৰ বাবে এইটো বৰাক ভেলি, এন চি হিলছ আৰু কাৰ্বি আংলং থাকিল। তথাপি ইয়াত অসমীয়া ল’ৰাবিলাক ইয়াত নিশ্চিন্তে পঢ়া-শুনা কৰি আছে।” দত্তৰয়ে কয়। তেওঁ প্ৰায় ৩০০ অসমীয়া ছাত্ৰ-ছাত্ৰীয়ে বিশ্ববিদ্যালয়খনত শান্তিৰে পঢ়া-শুনা কৰি আছে বুলি কয়।
তেওঁ বিতৰ্কিত মন্তব্যৰ পাছত আছুৱে দিয়া সকীয়নিক সহজভাৱে লৈ কয়, “আছুৱে মোৰ বিৰুদ্ধে মন্তব্য দিছে। দিব পাৰে। সেইটো গণতান্ত্ৰিক অধিকাৰ। কিন্তু ব্ৰহ্মপুত্ৰ উপত্যকাৰ যিবোৰ ল’ৰা-ছোৱালী পঢ়ি আছে তেওঁলোকৰ অভিভাৱকক মই আশ্বাস দিছো। ইয়াত সম্পূৰ্ণ নিৰাপদ। যিবোৰ অসমীয়া মানুহ আছে সম্পূৰ্ণ নিৰাপদ হৈ আছে। বৰাকৰ মানুহ ইমান কমিউনেল নহয়।”
‘বিধেয়কখনৰ বিৰোধিতা কৰাৰ অধিকাৰ অসম বিশ্ববিদ্যালয়ৰ ছাত্ৰ-ছাত্ৰীৰ নাই নেকি’ বুলি নৰ্থ-ইষ্ট নাও-এ সোধাত তেওঁ তৎপৰভাৱে মোট সলাই কয়, “বিৰোধিতা কৰাৰ গণতান্ত্ৰিক অধিকাৰ আছে। তেওঁলোকে বিৰোধিতা কৰিব পাৰে। কিন্তু বৰাক ভেলিৰ মানুহৰ এটা ছেণ্টিমেণ্ট আছে। তেওঁলোকে সেইবাবে বিধেয়কখনৰ বিৰোধিতা কৰিব নালাগে। কিন্তু অসমীয়া ছাত্ৰ-ছাত্ৰীক আমি পঢ়িবলৈ নিদিওঁ বুলি কেতিয়াও কোৱা নাই।”
তেওঁ লগতে কয়, “এই বিৰোধিতা কৰি আছে অখিল গগৈৰ কৃষক মুক্তি মৰ্চা আৰু অসম খিলঞ্জীয়া মঞ্চই। অখিল গগৈয়ে অসমীয়া আৰু বাঙালীৰ মাজত বিভাজন আনিব বিচাৰিছে।”
উল্লেখযোগ্য যে যোৱা ৯ জানুৱাৰিত অসম বিশ্ববিদ্যালয়ৰ একাংশ ছাত্ৰ-ছাত্ৰীয়ে বিশ্ববিদ্যালয়খনত নাগৰিকত্ব সংশোধনী বিধেয়কখনৰ বিৰোধিতাত কৰি প্ৰতিবাদ কৰাৰ পিছতে বিজেপিৰ নেতাজনে বিশ্ববিদ্যালয়খনৰ অসমীয়া ছাত্ৰ-ছাত্ৰীসকলক এক প্ৰকাৰৰ হুমকি দিছিল।
“যিসকলে বিধেয়কখনৰ বিৰোধিতা কৰি এই আন্দোলন কৰিলে, তেওঁলোক বৰাকৰ শত্ৰু। এইটো জঘন্য কাণ্ড। আৰু অসমীয়া ছাত্ৰ-ছাত্ৰীক সাৱধান কৰি দিছো। তোমালোকে কেৱল পঢ়া-শুনা কৰা। ৰাজনীতি জড়িত নহ’বা। নহ’লে ভৱিষ্যতে ইয়াত অসমীয়া ছাত্ৰ-ছাত্ৰীয়ে যাতে নামভৰ্তি কৰিব নোৱাৰে তাৰ ব্যৱস্থা কৰিবলৈ বাধ্য হ’ম।” এয়া আছিল তেওঁৰ মূল বক্তব্য। আনহাতে এওঁলোকৰ বিৰুদ্ধে ‘বিশ্ববিদ্যালয়খনৰ উপাচাৰ্য্যক ব্যৱস্থা ল’বলৈ আৱেদন কৰিছো’ বুলি কৈছিল।
তেওঁৰ এই অগণতান্ত্ৰিক মন্তব্য আৰু ভাবুকিৰ বিৰুদ্ধে আজি কটনিয়ানসকলকে ধৰি কেইবা ঠাইতো দল-সংগঠনবোৰে তেওঁৰ বিৰুদ্ধে থানাত গোচৰ দিয়ে।