হোজাই সমষ্টিকলৈ বিজেপিৰ শীৰ্ষ নেতৃত্বই কথাবোৰ যিমান সহজ ভাবে ভাবিছিল সিমান সহজ হৈ নাথাকিল।
সমষ্টিটোৰ বিজেপি বিধায়ক শিলাদিত্য দেৱক দলীয় টিকটৰ পৰা বঞ্চিত কৰি ৰাম কৃষ্ণ ঘোষক প্ৰাৰ্থিত্ব দিয়াৰ পিছতে বিজেপিৰ ৰাজনৈতিক সমীকৰণত আউল লাগিছে।
দলৰ পৰা এলাগী কৰাৰ ক্ষোভত প্ৰৱীণ বিজেপি নেতা শিলাদিত্যই দলৰ পৰা পদত্যাগ কৰাৰ কথা ঘোষণা কৰে।
ইমান খিনিলৈকে শিলাদিত্য বিজেপিৰ বাবে মুঠেও মূৰ কামোৰণি হৈ উঠা নাছিল। বৰঞ্চ বাটৰ কাঁইট আঁতৰিল বুলি বহু বিজেপি নেতাই হয়তো আনন্দহে কৰিলে। কিন্তু লেঠা লাগিল তেতিয়াহে যেতিয়া টিকট বঞ্চিত শিলাদিত্যই হোজাইৰ পৰা নিৰ্দলীয় প্ৰাৰ্থী হিচাবে নিৰ্বাচন খেলাৰ কথা ভাবিলে।
শিলাদিত্যৰ এনে স্থিতিয়ে বিজেপিৰ শীৰ্ষ নেতৃত্বৰ অৱস্থা চাবলগীয়া কৰি তুলিলে। হোজাই সমষ্টিত ৰাম কৃষ্ণ ঘোষক টিকট দিয়াৰ সময়ত এবাৰলৈয়ো শিলাদিত্যৰ কথা নভবা বিজেপি নেতৃত্বই এই কথা হাড়ে-হিমজুৱে উপলদ্ধি কৰিলে যে শিলাদিত্যই হোজাইত নিৰ্দলীয় প্ৰাৰ্থী হিচাবে নিৰ্বাচন খেলিলে সমষ্টিটোত যে বিজেপিৰ নাও ডুবিব সেয়া নিশ্চিত।
সেইবাবেই অভিমানী শিলাদিত্যক ভালৰি লগাবলৈ তৎপৰ হৈ পৰিল বিজেপি নেতৃত্ব। প্ৰথমে বিজেপিৰ ৰাষ্ট্ৰীয় সাধাৰণ সম্পাদক দিলীপ শইকীয়াই শিলাদিত্যক বিভিন্ন ধৰণে বুজনি দিলে।
হোজাইতে নহয়, পুৰণি বিজেপি তথা আৰএছএছৰ বাবে শিলাদিত্য এটা জনপ্ৰিয় নাম।অসমত যেতিয়া বিজেপিয়ে বিধানসভা নিৰ্বাচনত এখন আসন পোৱাৰো পৰিবেশ নাছিল সেই সময়ৰে পৰাই শিলাদিত্যৰ দৰে নেতাসকলে চৰম কষ্ট তথা ত্যাগ স্বীকাৰ কৰি বিজেপিক মানুহৰ গ্ৰহণযোগ্য দল এটাত পৰিণত কৰোৱালে। আজি দলটোত যিসকল নেতাই দপদপাই আছে তেওঁলোকৰ ৯৫ শতাংশৰে বিজেপিৰ সৈতে পূৰ্বে কোনো সম্পৰ্ক নাছিল। বৰঞ্চ তেনে নেতাৰ ভিতৰৰে বহু নেতাই বিজেপি আৰু মোদীক কুকুৰে কাঁইট নোখোৱাকৈ গালিহে পাৰিছিল।
তেনে ৰূপ সলোৱা নেতাই এতিয়া বিজেপিৰ ভাগ্য নিয়ন্তা। যিকি নহওঁক, পুৰণি বিজেপি শিলাদিত্যৰ বিদ্ৰোহৰ পৰিণতি উপলদ্ধি কৰি আজি হোজাইলৈ তৰা-নৰা চিগি দৌৰ দিলে মন্ত্ৰী হিমন্ত বিশ্ব শৰ্মাই।
লংকাস্থিত শিলাদিত্যৰ বাসভৱনত উপস্থিত হৈ হিমন্ত বিশ্বই দিলে এখন সংবাদমেল। সংবাদমেলত সৌসিদিনালৈ দলৰ পৰা একপ্ৰকাৰ এলাগী কৰি থোৱা শিলাদিত্যক উচ্চ প্ৰশংসা কৰিলে হিমন্তই।
হিমন্তই কয়—‘শিলাদিত্য বিজেপিত তাহানিতো আছিল, এতিয়াও আছে আৰু ভৱিষ্যতেও থাকিব’। শিলাদিত্যক উদ্দেশ্যি পুনৰ কোৱা হ’ল—শিলাদিত্যক দলে সন্মানজনক স্থানত উপবিষ্ট কৰিব।
কি হ’ব সেই সন্মানজনক স্থান সেয়া অৱশ্যে স্পষ্টকৈ কোনেও একো নক’লে।নিৰ্বাচন হৈ যোৱাৰ পিছত শিলাদিত্যক দিয়া কথাবোৰ পাহৰণিৰ গৰ্ভত লীন হ’ব পাৰে বুলিও বহুতে আশংকা কৰিছে।
যিকি নহওঁক দলে ফেক্টৰ নহয় বুলি ভবা শিলাদিত্যই যে এনেদৰে দলৰ নেতাসকলক জিকাৰ খুৱাই দিব পাৰিছে সেয়াও তেওঁৰ এক কৃতিত্ব বুলি বহুতে আলোচনা কৰা দেখা গৈছে।
