সমগ্ৰ উত্তৰ-পূব বাসীৰ আপত্তি, প্ৰতিবাদ নেওচি নাগৰিকত্ব সংশোধনী বিধেয়ক ১২ ফেব্ৰুৱাৰিত ৰাজ্যসভাত উত্থাপন হোৱাৰ দিশত। সংসদৰ বিশেষ অধিৱেশ আৰু মাত্ৰ দুদিন বাকী থকা অৱস্থাত মঙলবাৰে গৃহ মন্ত্ৰী ৰাজনাথ সিঙে বিধেয়কখন ৰাজ্যসভাত আলোচনাৰ বাবে উত্থাপন কৰাৰ কথা।
যদিও আলোচ্য বিষয়ৰ মূল সূচীত বিধেয়কখন উত্থাপনৰ কথা উল্লেখ নাছিল, শাসক বিজেপিয়ে কাইলৈ এইখন উত্থাপন কৰিবলৈ পৰিপূৰক সূচীত অন্তৰ্ভুক্ত কৰিছে বুলি এটা নিৰ্ভৰযোগ্য সূত্ৰই দাবী কৰিছে।
ইতিপূৰ্বে ইয়াৰ পূৰ্বৱৰ্তী অধিৱেশনত লোকসভাত গৃহীত হৈ থকা বিধেয়কখন আনুষ্ঠানিক আলোচনাৰ পিছতে ভোটৰ বাবে আগ বঢ়াই দিয়া হ’ব। ৰাজ্যসভাত শাসক বিজেপিৰ সংখ্যাগৰিষ্ঠতাৰ বাবে ২০-২২জন সাংসদ কম আছে যদিও বিজেপিয়ে সেয়া মেনেজ কৰিবলৈ চেষ্টা কৰিব।
ইপিনে বিৰোধীৰ শক্তি বেছি থকা সত্ত্বেও বিধেয়কখনক লৈ বিৰোধী শিবিৰ যে বিভক্ত নহ’ব সেয়া নিশ্চিত নহয়। আনকি প্ৰধান বিৰোধী কংগ্ৰেছে কি স্থিতি লয়, সিও হ’ব এটা কোটি টকীয়া প্ৰশ্ন।
উল্লেখ কৰিব পাৰি যে সংসদৰ বিশেষ অধিৱেশ আৰু মাত্ৰ দুদিন বাকী থকাক চাই এইকেইদিনৰ ভিতৰতে যিকোনো সময়ত বিধেয়কখন ৰাজ্যসভাত উত্থাপিত হ’ব পাৰে বুলি শংকা কৰিয়েই উত্তৰ-পূবৰ দল-সংগঠন, ৰাজনৈতিক দল আদিৰ প্ৰতিনিধিয়ে ইয়াক প্ৰতিৰোধৰ বাবে দিল্লীত বাহৰ পাতি ৰাজনৈতিক তৎপৰতা চলাই আছে।
এই সকলোবোৰ সত্ত্বেও বদ্ধপৰিকৰ বিজেপিয়ে যিকোনো পৰ্য্যায়লৈ গৈ হ’লেও বিধেয়কখন গৃহীত কৰাৰ চেষ্টা কৰিলে অসম তথা উত্তৰ-পূবত জুই জ্বলাৰ সম্ভাৱনা প্ৰবল। অসমৰ লগতে সমগ্ৰ উত্তৰ-পূবতে অসম আন্দোলন সদৃশ পৰিস্থিতিয়ে মূৰ দাঙি উঠিব পাৰে।