‘‘বাংলাদেশী মুছলমান সংগঠনে অসমৰ পৰা হিন্দুসকলক বাহিৰ কৰি অসমখনক এখন মুছলিম প্ৰধান ৰাজ্য বনোৱাৰ চেষ্টা কৰি আছে।‘’ শুকুৰবাৰে দিছপুৰ প্ৰেছ ক্লাৱত বিজেপি বিধায়ক শিলাদিত্য দেবে পুনৰবাৰ এক বিতৰ্কিত মন্তব্য কৰে।
তেওঁ লগতে কয়, ‘’এনআৰচিত নাম বাদ পৰা ৪০ লাখৰ ভিতৰত ২৫ লাখ ভাৰতীয়ৰ নাম বাদ পৰিছে। তেওঁলোকৰ হকে কোনেও মাত মতা নাই। কিন্তু সত্ৰৰ মাটি বেদখল কৰি থকা সকলৰ নাম অন্তৰ্ভুক্ত কৰাৰ বাবে এচাম বাংলাদেশী মূলৰ সংগঠন উঠি-পৰি লাগিছে।‘’
‘’অসম বন্ধ বে-আইনী, অসম বন্ধই জাতিটোক ক্ষতি কৰে,‘’ এইদৰে মন্তব্য কৰি তেওঁ লগতে কয়, ‘’সাহস আছে যদি বন্ধ দিয়া সংগঠনসমূহে খানাপাৰাত ১ লাখ মানুহ গোটাই সভা পাতক। ঘৰতে থাকি ৪০ টা সংগঠনে বন্ধ দিয়া বুলি ঘোষণা কৰিলেই নহয়। ৪০ টা সংগঠনৰ প্ৰায়বোৰ সংগঠনৰেই সভাপতি-সম্পাদকক অসমৰ ৰাইজে চিনি নাপায়।‘’
তেওঁৰ মতে উজনি অসমৰ ফালে বন্ধৰ প্ৰভাৱ একেবাৰে পৰা নাছিল তথা বন্ধ মানিবলৈ সকলোকে বাধ্য কৰোৱা হৈছিল।তেওঁ লগতে কয়, ‘‘টায়াৰ জ্বলাই, দোকানত গৈ দম দি দোকান বন্ধ কৰা হৈছিল।‘’
আনহাতে, নামনি অসমত বন্ধৰ প্ৰভাৱ সৰ্বাত্মক হৈছিল বুলি উল্লেখ কৰি পুনৰ বিতৰ্কিত মন্তব্য কৰি কয়, ‘’প্ৰথমবাৰৰ বাবে নামনি অসমত বন্ধ দেখা পাইছো। সত্ৰৰ মাটি বেদখল কৰা মুছলমান বাংলাদেশীসকলে ডাঙৰ বন্ধ পালন কৰিছে।‘’
তদুপৰি, সত্ৰৰ মাটি বেদখল কৰা সকলক দেখা পায়ো বন্ধ দিয়া সংগঠনসমূহে তেওঁলোকৰ বিৰুদ্ধে মাত নামাতে বুলি বিতৰ্কিত মন্তব্য কৰে। লগতে তেওঁলোকৰ ৰাজনৈতিক এজেণ্ডা আছে বুলিও মন্তব্য কৰে বিধায়কগৰাকীয়ে।
তেওঁৰ মতে অখিল গগৈ বৰ্তমান সময়ত এগৰাকী ৰাজনৈতিক নেতা তথা তেওঁ কৰা আন্দোলনত অসমীয়া খিলঞ্জীয়া যুৱক-যুবতী নাথাকে বুলিও বিস্ফোৰণ ঘটায় বিধায়ক শিলাদিত্যই। তেওঁৰ মতে ‘’বাংলাদেশী মূছলমান সকলৰ মাজত অখিল গগৈ প্ৰিয়। যিসকলে সত্ৰৰ মাটি অবৈধভাৱে দখল কৰিছে, তেওঁলোকে অখিল গগৈৰ লগত আন্দোলন কৰি আছে।‘’
তদুপৰি অখিল গগৈয়ে নিজৰ স্বাৰ্থ সদায় ঠিকে ৰাখে বুলি মন্তব্য কৰাৰ লগতে বিতৰ্কিত বিধায়কগৰাকীয়ে কয়, ‘’বন্ধৰ দিনটোত কাজিৰঙা বন্ধ নাছিল, অৰ্কিড পাৰ্ক বন্ধ নাছিল। অখিল গগৈয়ে নিজৰ ব্যৱসায় ঠিক ৰাখে, কিন্তু অসম বন্ধ দিয়ে।‘‘
সেই একেখন সংবাদমেলতে অসমৰ বিশিষ্ট বুদ্ধিজীৱিসকলকো সমালোচনা কৰিবলৈ নেৰিলে বিতৰ্কিত তথা বৰ্তমান বিজেপিৰ ‘সৰ্বে-সৰ্বা’ বিধায়কগৰাকীয়ে।
উক্ত সংবাদমেলতে বুদ্ধিজীৱিসকলক কটাক্ষ কৰি শিলাদিত্যই কয়, ‘’বুদ্ধিজীবিসকলে অসমীয়াৰ স্বাৰ্থত তথা অসমৰ স্বাৰ্থত মাত নামাতে। তেওঁলোকে কেবল বাংলাদেশী মূলৰ মানুহখিনিৰ স্বাৰ্থত মাত মাতে, যাতে তেওঁলোকক অসমীয়ালৈ ৰূপান্তৰিত কৰি ভাৰতীয় হিচাপে চিনাকি দিব পাৰে।‘’
মুখ মেলিলেই বিতৰ্কৰ সৃষ্টি কৰা বিধায়কজনে বুদ্ধিজীৱিসকলক ‘জ্ঞানজীৱি’ হ’বলৈ পৰামৰ্শ দিয়াৰ লগতে তেওঁলোকৰ জ্ঞানৰ পৰিসৰ বৃদ্ধি কৰিবলৈ আহ্বান জনায়
তেওঁৰ মতে ‘নিজকে বুদ্ধিজীৱি বুলি নকৈ জ্ঞানজীৱি বুলি ক’লে অসম বাছি যাব।‘
অৱশ্যে, এনআৰচিত যদি প্ৰকৃত ভাৰতীয়সকলৰ নাম অন্তৰ্ভুক্ত হৈ যায়, তেন্তে নাগৰিকত্ব সংশোধনী বিধেয়কৰ কোনো প্ৰয়োজনীয়তা নাই বুলি তেওঁ সংবাদমেলত কয়।
তেওঁ কয়, ‘‘১৯৭১ চনৰ আগত অহা যিসকল লোকৰ নথি-পত্ৰ নাই, সেইসকল লোকক যদি ৰক্ষা কৰিব পাৰো তেন্তে নাগৰিকত্ব সংশোধনী বিধেয়কৰ প্ৰয়োজন নাই। কি উপায়েৰে এইসকল লোকৰ নাম এনআৰচিত অন্তৰ্ভুক্ত কৰিব পাৰি, তাৰে অন্য এক উপায় নাগৰিকত্ব সংশোধনী বিধেয়ক আমি বিচাৰিছিলো।‘’
