দেশৰ ক্ষমতাৰ বাঘজৰী দ্বিতীয়বাৰলৈ নৰেন্দ্ৰ মোদী নেতৃত্বাধীন বিজেপিয়ে দখল কৰিবলৈ সক্ষম হোৱা আৰু লোকসভা নিৰ্বাচনত ত্ৰিপুৰাৰ দুয়োখন আসনতে বিজেপিয়ে জয়লাভ কৰিবলৈ সক্ষম হোৱাৰ আনন্দত ত্ৰিপুৰাত বিজেপি সমৰ্থক সকলে বিজয় উৎসৱ পালন কৰে।
বিজয় উৎসৱত অংশ লৈ বিজেপিৰ ৰাষ্ট্ৰীয় সাধাৰণ সম্পাদক ৰাম মাধৱে বিজেপিয়ে কংগ্ৰেছৰ একেৰাহে ২৭ বছৰ ধৰি দেশ শাসন কৰাৰ অভিলেখ ভংগ কৰিব বুলি গুৰুত্বপূৰ্ণ মন্তব্য কৰে।
ত্ৰিপুৰাৰ ৰবীন্দ্ৰ শতবাৰ্ষিকী প্ৰেক্ষাগৃহৰ সন্মুখত ধন্যবাদ ৰেলীৰ বাবে উপস্থিত হোৱা বিজেপি সমৰ্থক সকলে ফাকু খেলি আৰু ফটকা ফুটাই আনন্দ প্ৰকাশ কৰে। আগৰতলাত অনুষ্ঠিত হোৱা ধন্যাবাদ ৰেলীত ৰাম মাধৱৰ উপৰিও অংশগ্ৰহণ কৰে ত্ৰিপুৰাৰ মুখ্য মন্ত্ৰী বিপ্লৱ কুমাৰ দেৱকে ধৰি দলটোৰ সকলো জেষ্ঠ নেতা, বিধায়ক আৰু সাংসদ সকলে।
ৰেলীত দলৰ কৰ্মী-সমৰ্থকসকলক সম্বোধন কৰি বিপ্লৱ কুমাৰ দেৱে কৰ্মীসকলক এনেদৰে কষ্ট কৰিবলৈ কয় যাতে সকলো স্তৰৰ জনসাধাৰণৰ কাষলৈ নৰেন্দ্ৰ মোদী নেতৃত্বাধীন বিজেপি চৰকাৰৰ আঁচনি সমূহ লৈ যাব পাৰি।
বিপ্লৱ দেৱৰ পাছতে ৰাষ্ট্ৰীয় সাধাৰণ ৰাম মাধৱে ত্ৰিপুৰাৰ জনসাধাৰণক ৰাজ্যখনৰ পৰা বামপন্থীসকলক বিধানসভা আৰু লোকসভা দুয়োটাতে উৎখাত কৰাৰ বাবে ধন্যাবাদ জ্ঞাপন কৰে।
ৰাম মাধৱে নৰেন্দ্ৰ মোদীৰ দিনত ভাৰত আৰু ভাৰতীয়সকলৰ সন্মান বিশ্বৰ মজিয়াত বৃদ্ধি পোৱা বুলিও মন্তব্য কৰে। তেওঁ বিজেপিৰ সমৰ্থকসকলক নিৰ্বাচন অনুষ্ঠিত হৈ যোৱাৰ পাছত বিজেপিক সমৰ্থন কৰা আৰু নকৰা সকলৰ মাজত বিভাজন নানিবলৈ অনুৰোধ কৰি কয় যে এইখন এশ ত্ৰিশ কোটি জনসাধাৰণৰ চৰকাৰ আৰু নৰেন্দ্ৰ মোদীয়ে এশ ত্ৰিশ কোটি জনতাৰ উন্নয়ণৰ হকে কাম কৰি যাব।
আনহাতে, বিজেপিৰ ৰাষ্ট্ৰীয় সভাপতিগৰাকীয়ে ২০২২ চনৰ ভিতৰত নৰেন্দ্ৰ মোদীৰ নেতৃত্বত দেশত কোনো গৃহহীন নাগৰিক নাথাকিব আৰু ২০৪৭ চনত যেতিয়া ভাৰতে স্বাধীনতাৰ ১৫০ বছৰীয়া জয়ন্তী উদযাপন কৰিব তেতিয়া বিশ্ব গুৰু হিচাপে স্বীকৃতি লাভ কৰিব বুলি মত প্ৰকাশ কৰে।
