ভাৰতীয় মহিলা মল্লযুঁজাৰু বিনীশ ফোগাটলৈ দিল্লী উচ্চ ন্যায়ালয়ৰ পৰা এক ডাঙৰ সকাহ আহিছে। আদালতে তেওঁক আগন্তুক ২০২৬ বৰ্ষৰ এছিয়ান গেমছৰ বাবে হ’বলগীয়া বাছনি ট্ৰায়েলত অংশগ্ৰহণ কৰিবলৈ সম্পূৰ্ণ অনুমতি প্ৰদান কৰিছে। ভাৰতীয় মল্লযুঁজ ফেডাৰেচনৰ বাছনি নীতি আৰু কাৰ্যপন্থাক লৈ তীব্ৰ প্ৰশ্ন উত্থাপন কৰি আদালতে কয় যে ক্ৰীড়া সংগঠনসমূহে খেলুৱৈ আৰু খেলৰ স্বাৰ্থত কাম কৰা উচিত, কোনো ধৰণৰ প্ৰতিশোধমূলক মনোভাৱেৰে নহয়। ইয়াৰ পূৰ্বে উচ্চ ন্যায়ালয়ৰ একক বিচাৰপীঠৰ পৰা বিনীশে কোনো তৎকালীন সকাহ পোৱা নাছিল, যাৰ পিছত তেওঁ সংমণ্ডল বিচাৰপীঠৰ কাষ চাপিছিল।
মুখ্য ন্যায়াধীশ ডি কে উপাধ্যায় আৰু ন্যায়াধীশ তেজস কাৰিয়াৰ বিচাৰপীঠে তেওঁলোকৰ নিৰ্দেশত কয় যে অহা ৩০ আৰু ৩১ মে’ত হ’বলগীয়া বাছনি ট্ৰায়েলত বিনীশ ফোগাটক অংশ ল’বলৈ দিয়া উচিত। ইয়াৰ উপৰিও আদালতে এক গুৰুত্বপূৰ্ণ নিৰ্দেশ দি কয় যে এই বাছনি ট্ৰায়েলৰ সম্পূৰ্ণ ভিডিঅ’ ৰেকৰ্ডিং কৰিব লাগিব। খেলপথাৰত যাতে কোনো ধৰণৰ অনিয়ম নহয়, তাৰ বাবে ট্ৰায়েলৰ সময়ত ভাৰতীয় ক্ৰীড়া প্ৰাধিকৰণ আৰু ভাৰতীয় অলিম্পিক সংঘৰ স্বতন্ত্ৰ পৰ্যবেক্ষক উপস্থিত থকাটো আদালতে বাধ্যতামূলক কৰিছে।
উচ্চ ন্যায়ালয়ে ভাৰতীয় মল্লযুঁজ ফেডাৰেচনৰ নীতিক কঠোৰ ভাষাৰে সমালোচনা কৰি কয় যে তেওঁলোকৰ এই নিয়মসমূহ এজন খেলুৱৈক আঁতৰাই ৰখাৰ দৰে। কিয়নো যিসকল মহিলা খেলুৱৈয়ে মাতৃত্বকালীন সময় বা অন্য কোনো বিশেষ পৰিস্থিতিৰ পিছত খেলপথাৰলৈ ঘূৰি আহিব বিচাৰে, তেওঁলোকৰ বাবে এই নীতিত কোনো বিশেষ ব্যৱস্থা ৰখা হোৱা নাই। আদালতে স্পষ্টকৈ কয় যে আমাৰ দেশত মাতৃত্বক সন্মান কৰা হয় আৰু ইয়াক এটা উৎসৱ হিচাপেহে চোৱা উচিত। ইয়াক কোনো মহিলা খেলুৱৈৰ কেৰিয়াৰ ধ্বংস কৰাৰ বাবে ব্যৱহাৰ কৰিব নোৱাৰি। বিনীশ ফোগাট যোৱা ২০২৫ বৰ্ষৰ জুলাই মাহত মাতৃ হৈছিল আৰু তাৰ মাত্ৰ ১০ মাহৰ পিছতে তেওঁক ট্ৰায়েলৰ পৰা বাহিৰ কৰি ৰখাৰ কোনো যুক্তি নাই। বিনীশৰ দৰে এগৰাকী আন্তঃৰাষ্ট্ৰীয় পৰ্যায়ৰ খেলুৱৈক কেৱল কাৰিকৰী কাৰণতে ট্ৰায়েলৰ পৰা বঞ্চিত কৰাটো ক্ৰীড়া আৰু ন্যায় কাৰো বাবেই উচিত নহয়।
উল্লেখ্য যে ভাৰতীয় মল্লযুঁজ ফেডাৰেচনে অলপতে বিনীশ ফোগাটক ২০২৬ চনৰ ২৬ জুনলৈকে ঘৰুৱা প্ৰতিযোগিতাত অংশ লোৱাৰ ক্ষেত্ৰত অযোগ্য ঘোষণা কৰিছিল। ফেডাৰেচনৰ যুক্তি আছিল যে অৱসৰৰ পিছত খেলপথাৰলৈ ঘূৰি অহা খেলুৱৈসকলে বিশ্ব মল্লযুঁজৰ নিয়ম অনুসৰি অন্ততঃ ছয় মাহ আগতে জাননী দিয়াটো প্ৰয়োজনীয়, যিটো বিনীশে কৰা নাছিল। ফেডাৰেচনে বিনীশলৈ প্ৰেৰণ কৰা ১৫ পৃষ্ঠাৰ কাৰণ দৰ্শোৱাৰ জাননীত তেওঁৰ বিৰুদ্ধে অনুশাসনহীনতাৰ অভিযোগ উত্থাপন কৰিছিল আৰু পেৰিছ অলিম্পিকৰ পৰা তেওঁ বাদ পৰা ঘটনাটোক ৰাষ্ট্ৰীয় লজ্জাজনক বুলি অভিহিত কৰিছিল। এই বিষয়ত আদালতে তীব্ৰ অসন্তুষ্টি প্ৰকাশ কৰি কয় যে যদি কাৰোবাৰ সৈতে ব্যক্তিগত মতানৈক্য বা বিবাদ আছে, তেন্তে তাৰ বাবে খেলখনক কিয় বলি দিয়া হ’ব। আদালতে বিনীশলৈ জাৰি কৰা এই জাননীখনক পূৰ্বপৰিকল্পিত বুলি অভিহিত কৰি তেওঁক দেশৰ স্বাৰ্থত ট্ৰায়েলত ভাগ ল’বলৈ নিৰ্দেশ দিয়ে।
