পশ্চিমবংগৰ পৰা মহাৰাষ্ট্ৰলৈ, ঝাৰখণ্ডৰ পৰা পঞ্জাৱলৈ। আগ্ৰাসী ‘অপাৰেচন লোটাছ’ৰ জৰিয়তে বিৰোধী দলক ভাঙি সাংসদ-বিধায়কক নিজৰ ফাললৈ টানি আনিছে গেৰুৱা শিবিৰে। সেই অপ্ৰতিৰোধ্য অভিযানৰ মাজতে হঠাৎ স্তম্ভিত হৈ পৰিছে বিজেপি। কাৰণ, এইবাৰ কৰ্ণাটকত বিজেপিৰ ঘৰতে সিন্ধি খান্দিছে কংগ্ৰেছে।
দক্ষিণৰ এই ৰাজ্যখনত কমেও পাঁচজন বিজেপি আৰু ছয়জন জেডিএছ বিধায়কে দলীয় হুইপ অমান্য কৰি বিধান পৰিষদৰ নিৰ্বাচনত ‘ক্ৰছ ভোট’ দিছে। আৰু তাৰ বাবেই কংগ্ৰেছ বিধান পৰিষদৰ পাঁচজন প্ৰাৰ্থীয়ে বিজেপি-জেডিএছৰ মিত্ৰতাৰ দেৱাল ভাঙি জয়লাভ কৰিছে।
বিজেপিৰ অস্ত্ৰৰেই তেওঁলোকক এইদৰে ধৰাশায়ী কৰাৰ আঁৰৰ মাষ্টাৰমাইণ্ড হৈছে ডি কে শিৱকুমাৰ। কৰ্ণাটকত কংগ্ৰেছ চৰকাৰৰ নতুন মুখ্যমন্ত্ৰী। তেওঁ বহু বছৰ ধৰি দলীয় শিবিৰৰ সংকট মোচক হিচাপে কাম কৰি আহিছে। বহু অপেক্ষাৰ অন্তত এতিয়া তেওঁ কৰ্ণাটকত মুখ্যমন্ত্ৰীৰ কাৰ্যভাৰ গ্ৰহণ কৰিছে। আৰু ক্ষমতালৈ অহাৰ লগে লগে তেওঁ নিজৰ সক্ৰিয়তাকো প্ৰমাণ কৰিবলৈ আৰম্ভ কৰিছে, যিয়ে বিজেপিৰ শীৰ্ষ নেতৃত্বকো জোকাৰি গৈছে। এই ঘটনাত গেৰুৱা শিবিৰ ইমানেই ক্ষুব্ধ আৰু আতংকিত হৈ পৰিছে যে দলটোৰ ৰাষ্ট্ৰীয় সভাপতিয়ে নিজেই ৰাজ্যিক সভাপতি বি ৱাই বিজয়েন্দ্ৰক দিল্লীলৈ তলব কৰিছে।
কেইবাবছৰ ধৰি দেৱগৌড়াৰ দল জেডিএছ বিজেপিৰ মিত্ৰদল। কৰ্ণাটক বিধানসভাত সংখ্যাৰ ভিত্তিত তেওঁলোকৰ এজন প্ৰাৰ্থীয়ে বিধান পৰিষদত জয়ী হোৱাৰ আশা কৰা হৈছিল। কিন্তু সেই প্ৰাৰ্থী পৰাজিত হ’ল। কাৰণ, জেডিএছ আৰু বিজেপিৰ বিধায়কৰ এটা অংশই গোপনে কংগ্ৰেছক ভোট দিছিল। ৰাজ্যখনৰ বিধান পৰিষদৰ নিৰ্বাচনত কংগ্ৰেছে মুঠ ১৪০টা ভোট লাভ কৰিব বুলি আশা কৰা হৈছিল। কিন্তু কংগ্ৰেছে পালে ১৫১ টা। অৰ্থাৎ ১১ টা অতিৰিক্ত ভোট। আৰু সেইটো আহিছিল বিজেপি আৰু জেডিএছৰ পৰা।
সেই খবৰ পোৱাৰ লগে লগে শুকুৰবাৰে কৰ্ণাটক শাখাক বিজেপিৰ ৰাষ্ট্ৰীয় সভাপতি নীতিন নবীনে এক তীব্ৰ বাৰ্তা প্ৰেৰণ কৰে। তাত স্পষ্টকৈ কোৱা হৈছে যে এই দলবিৰোধী কাৰ্য, বিশ্বাসঘাতকতা সহ্য কৰা নহ’ব। বিজয়েন্দ্ৰই কঠোৰতম ব্যৱস্থা গ্ৰহণ কৰা হ’ব বুলিও কৈছে। ২৩ জুনত তেওঁক দিল্লীলৈ আহিবলৈ কোৱা হৈছে। একেদৰে ৰাজ্যিক পৰ্যবেক্ষকক বেংগালুৰুলৈ প্ৰেৰণ কৰা হ’ব।
বিজেপি বিধায়কক নিৰীক্ষণৰ বাবে গ্ৰহণ কৰা হৈছে বিশেষ ব্যৱস্থা। গেৰুৱা শিৱিৰে জানে যে ডি কে শিৱকুমাৰৰ কামৰ পদ্ধতি অতি আগ্ৰাসী। গতিকে কংগ্ৰেছে যেতিয়া বিজেপিৰ ঘৰত সিন্ধি দিছে সেয়া মাত্ৰ এটা বিধান পৰিষদৰ নিৰ্বাচনত ক্ৰছ ভোটিঙতেই সীমাবদ্ধ নাথাকিব।
দেৱগৌড়াৰ দলৰ মুৰব্বী তথা কেন্দ্ৰীয় মন্ত্ৰী কুমাৰস্বামীয়ে স্বীকাৰেই কৰিছে যে দলৰ বিধায়কৰ এটা অংশ কংগ্ৰেছলৈ যাব পাৰে। ২০২৮ চনত কৰ্ণাটকত অনুষ্ঠিত হ’ব বিধানসভা নিৰ্বাচন। ২ বছৰ পূৰ্বে তাত বিজেপিৰ ঘৰত বিভাজন হোৱাটো নৰেন্দ্ৰ মোডী আৰু অমিত শ্বাহৰ বাবে এক অতি বিপদজনক বাৰ্তা। কাৰণ, কৰ্ণাটক দক্ষিণ ভাৰতৰ একমাত্ৰ ৰাজ্য য’ত বিজেপিৰ শক্তি সৰ্বাধিক। তাতো যদি দুৰ্বল হয়, তেন্তে মোডী-শ্বাহৰ দলটো আকৌ এবাৰ উত্তৰ বলয়ৰ দলত পৰিণত হ’ব। যিটো ২০২৯ চনৰ প্ৰাকক্ষণত বিজেপিৰ বাবে উদ্বেগজনক।
