পূৰ্বৰ কংগ্ৰেছ চৰকাৰৰ দিনত গঠন কৰা জনগোষ্ঠীয় উন্নয়ন পৰিষদসমূহ অসাংবিধানিক বুলি ঘোষণা কৰাৰ পিছত পুঁজি আবণ্টন, অনুমোদন আদি বন্ধ কৰি দিয়া বৰ্তমানৰ বিজেপি নেতৃত্বাধীন ৰাজ্য চৰকাৰে পুনৰ উন্নয়ন পৰিষদসমূহ গঠন কৰাৰ চিন্তা-চৰ্চা কৰা বুলি জানিব পৰা গৈছে।
এক সূত্ৰ পৰা জানিব পৰা মতে পূৰ্বৰ জনগোষ্ঠীয় উন্নয়ন পৰিষদসমূহৰ নীতি-নিয়মসমূহ সাধাৰণ সলনি কৰি সেইবোৰ পুনৰ গঠনৰ বাবে চৰকাৰে নীতি-কৌশল নিৰ্দ্ধাৰণৰ কামকাজ আৰম্ভ কৰিছে। বিজেপি চৰকাৰে গঠন কৰিবলগীয়া এই উন্নয়ন পৰিষদসমূহত চৰকাৰৰ বিৰুদ্ধে অৱস্থান গ্ৰহণ কৰা জনগোষ্ঠীয় নেতাসকলক দায়িত্ব দিয়াৰ সম্ভাৱনা আছে।
আনহাতে, বিজেপি নেতৃত্বাধীন চৰকাৰখনে গ্ৰহণ কৰা পৰিকল্পনা অনুসৰি সকলো ঠিকে ঠাকে আগবাঢ়িলে আগন্তুক লোক সভাৰ নিৰ্বাচনৰ পূৰ্বেই উন্নয়ন পৰিষদসমূহ গঠন কৰি জনগোষ্ঠীয় সংগঠনৰ নেতাক দায়িত্ব দিয়া হ’ব পাৰে।
কিন্তু এইক্ষেত্ৰত জনজাতিকৰণৰ দাবী তুলি আন্দোলন কৰি অহা জনগোষ্ঠীসমূহে পুনৰ উন্নয়ন পৰিষদৰ প্ৰস্তাৱ গ্ৰহণ কৰিব নে নাই সেয়া এক গুৰুত্বপূৰ্ণ প্ৰশ্ন। অৱশ্যে, বিজেপি চৰকাৰে উন্নয়ন পৰিষদত পূৰ্ৰ চৰকাৰৰ তুলনাত পুঁজি আবণ্টন বৃদ্ধি কৰাৰ প্ৰলোভনেৰে জনগোষ্ঠীয় সংগঠনৰ নেতাক হাত কৰাৰ প্ৰচেষ্টা চলোৱাৰ কৌশল ৰচনা কৰিছে।
উল্লেখযোগ্য যে নাগৰিকত্ব সংশোধনী বিধেয়ক ২০১৬’ বাতিলৰ দাবীত ৬০টাকৈ জাতীয়-জনগোষ্ঠীয় সংগঠন ঐক্যবদ্ধ হৈ প্ৰতিবাদ কৰি থকাৰ পৰিপ্ৰেক্ষিতত বিজেপি নেতৃত্বাধীন ৰাজ্য চৰকাৰে সংগঠনসমূহৰ একাংশ নেতাক নিজৰ পক্ষলৈ অনাৰ বাবে এই কৌশল ৰচনা কৰা বুলি জানিব পৰা গৈছে।
আনহাতে, জনগোষ্ঠী কেইটাই উন্নয়ন পৰিষদক জনজাতিকৰণৰ বিকল্প হিচাপে গ্ৰহণ কৰাৰ সম্ভাৱনা নাই বুলি জানিব দিয়ে একাংশ নেতাই।
