অসমৰ চহকী জৈৱ বৈচিত্ৰক ধ্বংস কৰিবলৈ বণিক গোষ্ঠীক ৰঙা দলিচা পৰা কাৰ্যত সৰৱ হৈ পৰিছে অসম তৃণমূল কংগ্ৰেছ। অসম তথা উত্তৰ-পূৰ্বাঞ্চলৰ জৈৱ বৈচিত্ৰতা চিৰদিনৰ বাবে নিঃশেষ কৰিব পৰা পাম অইল (তৈল খেজুৰ) খেতিৰ বিৰুদ্ধে কঠোৰ স্থিতি গ্ৰহণ কৰিছে দলটোৱে।
বাবা ৰামদেৱৰ “ৰুছি ছয়া”ৰ পিছতে অসমত গ’ডৰেজ এগ্ৰোভেট কেন্দ্ৰৰ বিজেপি চৰকাৰে ৰঙা দলিচা পাৰি দিয়া কাৰ্যক তীব্ৰ ভাষাৰে গৰিহণা দিছে অসম তৃণমূল কংগ্ৰেছৰ সভাপতি ৰিপুণ বৰাই।
এই সন্দৰ্ভত ৰিপুণ বৰাই কয় যে বিজেপিয়ে একমাত্ৰ পুজিপতি বণিয়াৰ বাবেই অসমক মৰুভূমিত পৰিণত কৰিব বিচাৰিছে। ৰাজ্যত বণিকগোষ্ঠীত জৈৱ বৈচিত্ৰতাৰ প্ৰতি ভাবুকি অনা পাম অইলৰ খেতিত অনুমতি প্ৰদান কৰি অসমৰ জৈৱিক পৰিস্থিতিতন্ত্ৰ ভাঙি দিব খুজিছে।
বৰাই লগতে কয়, “পাম খেতিত যঠেষ্ট পৰিমাণে পানীৰ প্ৰয়োজন হয়। লগতে যি ঠাইত এই খেতি কৰা হয় তাৰ মাটি অনুৰ্বৰ হৈ পৰে। শ শ বিঘা মাটিত এই গছৰ খেতি কৰিলে হাতী, বাঘ, গড়ৰ বিচৰণ ভূমি সংকুচিত হৈ পৰা সম্ভাৱনা আছে।”
ইতিমধ্যে বিশ্বৰ মালয়েছিয়া, ইন্দোনেছিয়া, লেটিন আমেৰিকা, আফ্ৰিকাৰ অনেক দেশত পাম খেতিয়ে পৰিৱেশ বিনষ্ট কৰা কথাটো বিভিন্ন প্ৰতিবেদনত প্ৰকাশ হৈছে বুলি ৰিপুণ বৰাই লগতে দাবী কৰে।
শ শ বিঘা মাটিত কৰিবলগীয়া এই পাম খেতিয়ে অসমৰ চহকী জৈৱ বৈচিত্ৰক ধ্বংস কৰাৰ লগতে ৰাজ্যৰ বন্য জীৱজন্তুৰ জীৱনো বিপদাপন্ন হৈ পৰিব বুলি বৰাই মন্তব্য কৰে।
ইমানৰ পাছতো মোদী চৰকাৰে অসমত পাম অইল খেতি কৰিব খোজাতো আশ্চৰ্যজনক বুলি উল্লেখ কৰি বৰাই লগতে পাম খেতিৰ ইমান ক্ষতিকাৰক দিশ থকাৰ পিছতো মুখ্যমন্ত্ৰী হিমন্ত বিশ্ব শৰ্মাই অসমৰ মাটি ৰামদেৱ আৰু গডৰেজ এগ্ৰোভেটক এৰি দিবলৈ মান্তি হোৱাটো অসমবাসীৰ বাবে দুৰ্ভাগ্যজনক বুলি মন্তব্য কৰে।
উল্লেখ্য যে ৰামদেৱৰ প্ৰতিষ্ঠানৰ পিছত অসমত পাম খেতিৰ বাবে কেন্দ্ৰই গডৰেজ এগ্ৰোভেটক সেউজ সংকেত দিছে। মঙ্গলবাৰে এই সন্দৰ্ভত কেন্দ্ৰ আৰু গডৰেজ এগ্ৰোভেটৰ সৈতে চুক্তি সম্পাদন কৰিছে।
ইতিমধ্যে কেন্দ্ৰই ভাৰতত পাম অইলৰ খেতিৰ বাবে নেশ্যনেল মিছন প্ৰেছ ইডিবল অইল-অইল পাম নামেৰে এক আঁচনি প্ৰস্তুত কৰিছে আৰু ইয়াত ১১০৪০ কোটি টকা অনুমোদন জনাইছে। এই আঁচনিৰ অধীনত অসম, মণিপুৰ আৰু ত্ৰিপুৰাত ৫৮৫০ কোটি কেন্দ্ৰই পাম খেতিৰ বাবে বিনিয়োগ কৰিব।