প্ৰতিশ্ৰুতি আৰু আদৰ্শৰ দোহাই দিয়া বিজেপি দলৰ অন্তঃসাৰশূন্যতা এতিয়া নিজৰ দলৰে কেন্দ্ৰীয় নেতৃত্বৰ মুখত প্ৰকাশ পাবলৈ ধৰিছে। শেহতীয়াকৈ গুৱাহাটীত এক জনসভাত কেন্দ্ৰীয় গৃহমন্ত্ৰী অমিত শ্বাহে অসমৰ প্ৰাক্তন কংগ্ৰেছ চৰকাৰৰ স্বাস্থ্য বিভাগৰ কেলেংকাৰীৰ কথা উল্লেখ কৰিবলৈ গৈ বৰ্তমানৰ বিজেপিৰ মুখ্যমন্ত্ৰী হিমন্ত বিশ্ব শৰ্মাকেই ৰাজহুৱাভাৱে কাঠগড়াত থিয় কৰাইছে। গৃহমন্ত্ৰীগৰাকীয়ে কংগ্ৰেছৰ ১৫ বছৰীয়া শাসনকালত স্বাস্থ্য বিভাগত বছৰি ১৫০ কোটি টকাকৈ কেলেংকাৰী হোৱাৰ যি অভিযোগ উত্থাপন কৰিছে, সি আচলতে সেই সময়ৰ স্বাস্থ্যমন্ত্ৰী তথা বৰ্তমানৰ মুখ্যমন্ত্ৰী হিমন্ত বিশ্ব শৰ্মাৰ ফালেহে আঙুলি টোঁৱাইছে। একপ্ৰকাৰে ক’বলৈ গ’লে, বিজেপিৰ মঞ্চত হিমন্ত বিশ্ব শৰ্মাৰ উপস্থিতিতেই তেওঁক এজন দুৰ্নীতিপৰায়ণ নেতা হিচাপে অমিত শ্বাহে মোহৰ মাৰিলে।
বিজেপিৰ এই বৈপৰীত্যক তীব্ৰ সমালোচনা কৰি নিখিল ভাৰত কংগ্ৰেছ কমিটিৰ সংবাদ মাধ্যম বিভাগৰ অধ্যক্ষ পৱন খেৰাই কটাক্ষ কৰি কয় যে যিগৰাকী ব্যক্তিক কেন্দ্ৰীয় চৰকাৰে নিজেই দুৰ্নীতিগ্ৰস্ত বুলি স্বীকাৰ কৰিছে, তেওঁৰ বিৰুদ্ধে কেন্দ্ৰীয় তদন্তকাৰী সংস্থা চিবিআই বা ইডিৰ তদন্ত কেতিয়া আৰম্ভ হ’ব? অমিত শ্বাহৰ ভাষণৰ সময়ত একেখন মঞ্চতে বহি থকা মুখ্যমন্ত্ৰীগৰাকীয়ে নিজৰ বিৰুদ্ধে অহা দুৰ্নীতিৰ অভিযোগ শুনি হাতচাপৰি বজোৱা কাৰ্যই ৰাজ্যৰ সচেতন মহলক আমোদ দিয়াৰ লগতে বিজেপিৰ নীতি-আদৰ্শক লজ্জানত কৰিছে। যিটো সময়ত বিজেপিয়ে দুৰ্নীতিমুক্ত চৰকাৰৰ শ্লোগান দি থাকে, সেই একেটা সময়তে এগৰাকী অভিযুক্তক মুখ্যমন্ত্ৰীৰ আসনত বহুৱাই ৰখাটোৱে দলটোৰ নৈতিকতাক লৈ ডাঙৰ প্ৰশ্নচিহ্নৰ সৃষ্টি কৰিছে।
আনহাতে, ৰাজ্যসভাৰ নিৰ্বাচনত বিজেপি নেতৃত্বাধীন এনডিএই এআইইউডিএফৰ সমৰ্থন লোৱা বিষয়টোৱেও দলটোৰ সুবিধাবাদী ৰাজনীতিৰ স্বৰূপ উদঙাই দিছে। যিটো এআইইউডিএফক বিজেপিয়ে সদায় এক সাম্প্ৰদায়িক আৰু শত্ৰু শক্তি হিচাপে প্ৰক্ষেপ কৰি আহিছে, ক্ষমতাৰ স্বাৰ্থত সেই দলটোৰ সৈতে হাত মিলোৱা কাৰ্যই প্ৰমাণ কৰে যে বিজেপিৰ বাবে আদৰ্শ নহয়, কেৱল ক্ষমতাহে শেষ কথা। পৱন খেৰাই স্পষ্ট কৰি দিয়ে যে বিজেপিৰ এই মেৰুকৰণৰ ৰাজনীতি আৰু দুৰ্নীতিৰ সৈতে কৰা আপোচ এতিয়া ৰাইজৰ আগত সম্পূৰ্ণ উন্মোচিত হৈ পৰিছে।
